Drew Nacino

Seryoso umanong ikinukunsidera ni Pangulong Ferdinand “Bongbong” Marcos, Jr. ang panukalang magtatag ng Maharlika Wealth Fund (MWF).

Ito ang inihayag ni Senate President Juan Miguel Zubiri makaraang magkausap sila ng pangulo hinggil sa naturang panukala na tinatalakay ngayon sa mababang kapulungan ng Kongreso.

Ayon kay Zubiri, hindi naman inatasan ng punong ehekutibo ang Senado na madaliin ang pagpasa ng panukalang maharlika o sovereign wealth fund.

Sinabi anya sa kanya ni Pangulo Marcos na kailangang pag-aralan nang husto ang naturang bill kaya hindi nila papaspasan ang pagpasa nito bagay na naintindihan ni PBBM dahil naging senador din ito.

Ipinunto ng mambabatas na mahalagang walang trust issue sa ipapasang MWF kaya hindi nila ito mamadaliin at kailangan umanong maglagay ng “economic geniuses” bilang head ng wealth fund. — Mula sa ulat ni Cely Ortega-Bueno (Patrol 19)

Magsisimula na sa Disyembre a – 27 ang implementasyon ng Republic Act 11934 o Sim Registration Act.

Ito’y makaraang ilabas na ng National Telecommunications Commission ang implementing rules and regulations (IRR) ng nasabing batas kahapon.

Sa ilalim ng R.A. 11934, ang lahat ng mga sim, kabilang ang mga embedded sim at mga sim na inilaan para sa data lamang o ginagamit para sa fixed wireless broadband modem ay kailangang i-parehistro.

Sa ilalim ng batas, ang kabiguang i-parehistro sa loob ng 120 araw ay magreresulta sa otomatikong pag-deactivate ng sim.

Maaari lamang i-reactivate ang na-deactivate na sim pagkatapos ng pagpaparehistro, sa kondisyon na ang muling activation ay gagawin nang hindi lalampas sa limang araw matapos ang automatic deactivation.

Inatasan naman ang public telecommunication entities na magtatag ng mga secured online platform ng registration ng sim.

Nakasaad din sa IRR na ang mga magbibigay ng maling impormasyon o gagamit ng kaduda-dudang identity para magparehistro ng sim ay maaaring mabilanggo ng dalawang taon o pagmultahin ng hanggang P300,000.

Isang guro ang patay habang tatlong iba pa ang sugatan sa salpukan ng truck at kotse sa Orani, Bataan.

Kinilala ang nasawing si Aileen Dulay, 31- anyos, residente ng Bayan ng Mariveles.

Patungo sanang Mariveles mula Pampanga ang fuel tanker nang salpukin at kaladkarin nito ang Toyota Vios ng biktima sa kahabaan ng Roman Highway, sa Barangay Dona, noong Sabado ng gabi.

Ayon kay Bataan Provincial Police Director, Col. Rommell Velasco, naisugod pa sa Dinalupihan Municipal Hospital si Dulay subalit idineklara itong dead-on-arrival.

Naisugod naman sa Jose Payumo Memorial Hospital ng Rescue Team ng Metro Bataan Development Authority ang mga nasugatan.

Samantala, mahaharap sa kasong Reckless Imprudence Resulting to Homicide at Multiple Physical Injuries ang truck driver.

Lumobo pa sa P378.9M ang premyo sa 6/58 Ultra Lotto.

Gayunman, wala pa ring nakasungkit sa jackpot matapos hindi matumbok ang winning combination na 4 – 34 – 13 – 16 – 10 – 07 sa draw ng Philippine Charity Sweepstakes Office, kagabi.

64 na mananaya naman ang nakahula ng limang digit at kumubra ng second prize na tig-P120,000.00.

Sa iba pang game, isang masuwerteng bettor ang nakasungkit ng premyong P23.9M sa 6/49 Super Lotto makaraang mahulaan ang kombinasyong 3 -24 – 07 – 41 – 11 – 16.

34 na manlalaro rin ang nakasikwat ng second prize na tig-P50,000 matapos matumbok ang 5 digit combination.

Nakukulangan pa ang grupong Samahang Industriya ng Agrikultura (SINAG) sa ginagawa ng gobyerno upang mapigilan ang smuggling ng agricultural products sa bansa.

Ayon kay SINAG chairman Rosendo So, 10% pa lamang ng puslit na sibuyas na pumapasok sa merkado ang nasasabat ng mga otoridad.

Dapat anyang mas maghigpit ang Department of Agriculture at Bureau of Customs sa pag-monitor sa pagpasok ng mga ganitong imported agricultural products.

Iginiit ni So na ang problema sa nakalipas na taon ay walang mga inihaing kaso laban sa mga smuggler at mga broker.

Magugunita noong isang linggo ay nakasabat ang mga otoridad ng tone-toneladang puslit na sibuyas sa Divisoria, Maynila.

Mararamdaman na simula ngayong buwan ng milyun-milyong consumer ng MERALCO ang panibagong dagdag-singil sa kuryente.

Inihayag ito ni MERALCO Public Relations Head Claire Feliciano matapos suspendihin ng South Premiere Power Corporation ang power supply agreement sa naturang power distributor, kamakailan.

Gayunman, nilinaw ni Feliciano na hindi nila inaasahang magiging masyadong mataas ang konsumo ngayong buwan dahil sa paglamig ng panahon.

Nakasalalay pa rin anya sa mga costumer kung paano gagamitin nang tama ang kanilang appliances lalo ang mga aircon at refrigerator ngayong holiday season.

Maling diskarte kung uutang lang para mapondohan ang pang-kapital sa isinusulong na Sovereign Wealth Fund o Maharlika Investment Fund.

Tugon nito ni Senador Sherwin Gatchalian sa sinasabi ni Finance secretary Ben Diokno na uutang o huhugot sa Land Bank at Development Bank of the Philippines upang i-pondo sa naturang panukala.

Ayon kay Gatchalian, hindi rin nakaugalian sa private sector na ang pondong dapat na i-invest ay manggaling sa utang dahil may kaakibat itong tubo o interes na kailangan din bayaran.

Kailangan anyang maging malinaw kung saan huhugutin ang pondo para sa SWF upang umusad ito sa Kongreso, lalo sa Senado.

Pinayuhan ni Chief Presidential Legal Counsel, Secretary Juan Ponce Enrile si Pangulong Bongbong Marcos na pag-aralang mabuti ang planong pagtatatag ng Maharlika Wealth Fund (MWF).

Ito, ayon kay Enrile, ay upang hindi mapag­buntunan ng sisi ang Pangulo at hindi mapagsamantalahan sakaling magkaroon ng problema lalo’t pondo ang pinag-uusapan.

Ang Punong Ehekutibo anya ang lalagda sa batas sakaling makalusot ito sa Kongreso kaya mahalagang maging maingat upang hindi masisi kapag nagka-aberya.

Idinagdag pa ni Enrile na kailangan ding magkaroon ng safeguards sa MWF papanagutin ang mga opisyal na hahawak at mangangasiwa sa pondo kung sumablay at hindi naging maayos ang pagpapatakbo nito.

Hindi naman anya nakatitiyak kung magiging maayos magpatakbo sa pondo ang mga susunod na hahawak Sovereign Wealth Fund dahil maaaring matapat ito sa mga taong nakatutok lamang sa pang-sariling interes.

Nilinaw naman ni Manong Johnny na hindi siya kontra sa plano subalit tanging hangad niya ay makatiyak na hindi makokompromiso si Pangulong Marcos sakaling magkaroon ng problema.

Nagkasundo na ang mga Alkaldeng miyembro ng Metro Manila Council, Land Transportation Office at Department of Interior and Local Government na magpatupad ng Single Ticketing System sa unang quarter ng susunod na taon.

Sa ilalim ng Single Ticketing System, magiging standardized o magkakaparehas na ang halaga ng multa sa traffic violations sa National Capital Region.

Nagkasundo rin ang Metro Manila Mayors na magpatupad ng moratorium sa pagkumpiska sa driver’s licenses ng traffic violators, maging sa interconnectivity sa LTO upang mapabilis ang pagtukoy sa mga driver na may multiple violations.

Ito, ayon kay MMDA Acting Chairman Romando Artes, ay bilang tugon sa panawagan ni Interior secretary Benhur Abalos kaugnay sa pagkumpiska lisensya ng mga lumalabag na motorista.

Alinsunod sa moratorium, wala ng confiscation ng lisensya sa Metro Manila subalit ililista lamang ng mga LGU ang mga mahuhuli at ibibigay sa LTO upang i-record.

Pero kung hindi naman matutubos ay masususpinde ang lisensya ng mga traffic violator at sakaling lumampas ng sampung araw ay papatawan na ng interes at hanggang sampu lamang ang pinapayagang paglabag bago tuluyang kumpiskahin ang lisensya.

Sa sandaling ipatupad, halimbawa kung ang motorista ay taga-Bulacan at nakagawa ng traffic violation sa Pasig City, maaari itong magbayad ng multa kung saan siya malapit sa halip na pumunta pa sa naturang lungsod.

Inihahanda na ng Municipal Local Government ng Tanay, Rizal ang tulong pinansyal sa mga pamilya ng walong nasawi matapos tangayin ng baha ang sinasakyan nilang jeep.

Ayon kay Joicee Gapido, kinatawan mula sa tanggapan ni Tanay Mayor Rafael Tanjuatco, nagpadala na sila ng team ng social workers sa Barangay Sta. Ines upang ayudahan ang mga naulilang pamilya.

Pito sa mga biktima ay senior citizens habang isang limang taong gulang din ang binawian ng buhay.

Kinilala ng Pulisya ang mga nasawing sina Teresita Quinto, Maylard Keith Fernandez, Leonida Doroteo, Salvacion Delgado, Carmen Dela Cruz, Esmena Doroteo, Avelino Buera at Teodora Buera.

Patungo sana ang mga biktima sa isa sa mga branch ng Land Bank of the Philippines o ATM sa bayan upang kumuha ng senior citizen pension ng DSWD nang maganap ang trahedya noong Sabado.