Drew Nacino

Nag-issue na ang Energy Regulatory Commission (ERC) ng status quo orders upang mapigilan ang retail electricity suppliers na taasan ang kanilang singil sa malalaking kumpanya.

Una nang hiniling ng mga malaking kumpanya sa ERC na mag-issue ng temporary restraining orders at cease-and-desist orders upang mapigilan ang retail electricity suppliers na putulan sila ng supply.

Iginiit ng mga kumpanya na lumabag ang mga supplier sa kanilang mga kontrata sa pamamagitan ng pagtataas ng singil na lampas sa napagkasunduan at nais ipataw na fuel cost recovery adjustments bunsod ng umano’y extraordinary increase sa fuel costs.

Ayon kay ERC Chairperson Monalisa Dimalanta, mananatili ang status quo hangga’t hindi nakapag-dedesisyon ang komisyon sa mga mosyong inihain sa kanilang tanggapan.

Kabilang naman sa mga sinampahan ng kaso ng mga kumpanya sa ERC ang Mpower, Incorporated at Vantage Energy Solutions Management Incorporated, na retail electricity suppliers ng Meralco.

Ilan sa mga itinurong dahilan ng mga electricity suppliers ng mataas nilang singil ang “hindi inasahang” increase sa global price ng krudo, uling at iba pang fuel sources.

Nagpasaklolo na ang mga pasahero ng barko sa Department of Transportation sa gitna ng sobra umanong taas ng pasahe ng mga shipping liner sa bansa.

Kabilang sa mga nagrereklamo ang mga dumaraan sa Batangas Port, lalo na ang mga patungong Oriental Mindoro ngayong holiday season.

Pinaka-mahal sa fastcat kung saan 542 na mula sa dating P420 ang pasahe patungong Calapan City; P528 mula sa dating P468 sa Montenegro shipping habang P530 mula sa dating P450 na ang kada pasahero sa Starlite Ferries.

Nagpag-alaman din na may ilan pang biyahero na hindi nakasakay dahil sa napakamahal na pasahe na ipinatupad nang wala umanong abiso sa publiko.

Samantala, wala pang tugon si transportation Secretary Jaime Bautista, maging si Undersecretary for Maritime Sector Elmer Sarmiento at maritime Industry Authority Administrator Hernani Fabia sa hinaing ng mga pasahero.

Namemeligrong bumagsak ang produksyon ng bigas sa buong mundo sa susunod na taon kumpara sa naging ani ngayong taon.

Batay sa datos ng United States Department of Agriculture (U.S. – D.A), hihina ang produksyon ng lahat ng rice producing country.

Mula sa produksyon na 515 million tons ng bigas ngayong taon, nakikita ng U.S. – D.A na sasadsad ito sa 503.27 million sa taong 2023.

Ayon sa ahensya, 6.2 million tons ang mababawas sa produksyon ng bigas sa india habang 2.5 million sa pakistan sa nasabing panahon.

Damay din ang Pilipinas kung saan inaasahan ng USDA na bababa ang produksyon ng bigas ng 130,000 tons.

Dahil magiging mas kaunti ang ani ng palay sa susunod na taon, magmamahal ang presyo nito sa pandaigdigang merkado.

Nag-issue na ng notice of claim ang Meralco sa south Premiere Power Corporation (SPPC), na subsidiary ng san Miguel Corporation (SMC), upang pagbayarin sa dagdag-gastos na idinulot ng 60-day temporary restraining order ng Court of Appeals sa kanilang Power Supply Agreement (PSA).

Magugunitang sinuspinde ng SMC ang pag-su-supply sa Meralco ng 670 megawatts mula Ilijan power plant, noong isang linggo sa katuwirang naglabas ng TRO ang C.A laban sa kanilang PSA.

Ito ang dahilan kaya’t napilitan ang Meralco na kumuha ng mas mahal na supply ng kuryente sa Wholesale Electricity Spot Market (WESM).

Sa liham na ipinadala kay SPPC General Manager Ellen Go, iginiit ng Meralco sa SMC subsidiary na bayaran ang price difference sa pagitan ng contract price at spot market price, kung saan bantad ang naturang power distributor sa gitna ng effectivity ng TRO.

Bukod pa ito sa fines, penalties at liquidated damages sa ilalim ng PSA sakaling resolbahin ng appellate court ang pangunahing kaso at ibasura ang petisyon ng SPPC.

Kasalukuyang nakikipag-negosasyon ang Meralco sa iba pang generation companies para sa emergency Power Supply Agreements (EPSA) upang ma-protektahan ang mga customer laban sa mas mataas na presyo ng kuryente sa WESM.

Posible pang lumobo sa P500 ang kada kilo ng sibuyas, partikular ng pula.

Ito, ayon sa Samahan ng Industriya at Agrikultura (Sinag), ay kung hindi papayagan ang pag-a-angkat ng pula at puting sibuyas.

Inihayag ni Sinag Chairman Rosendo So na dapat payagan na ng gobyerno ang importasyon ng nasa animnalibong metrikong toneladang sibuyas upang mapunan ang kakulangan sa local supply.

Naglalaro na anya sa P380 per kilo ng sibuyas sa ilang pamilihan, partikular sa metro manila kaya’t panahon na upang mag-angkat muli upang mapigilan ang pagtaas pa ng presyo nito.

Binigyang-diin ni So na pawang smuggler lamang ang kumikita sa napakamahal na sibuyas at hindi rin nila mabatid kung sino ang mga kasabwat ng mga ito sa Department of Agriculture at Bureau of Customs.

Tila iginigiit anya ng DA na mayroong stock gayong hindi naman nila nakikita kung saan kukuha ng supply.

Samantala, ipinunto naman ni DA deputy Spokesman Rex Estoperez na kailangang pag-aralang maigi ang hirit na importasyon dahil maaaring abusuhin ito ng mga smuggler.

Sa ika-apat na sunod na linggo, muling nagpatupad ng tapyas-presyo sa kanilang mga produkto ang mga kumpanya ng langis.

Alas dose uno kaninang hatinggabi, buena manong inilarga ng Caltex ang piso at sitenta sentimos na bawas singil sa kada litro ng gasolina; tres pesos at kwarenta sentimos sa diesel habang kwatro pesos at kwarenta sentimos sa kerosene o gaas.

Umarangkada naman kaninang ala sais ang kahalintulad na price adjustments ng Petron, Shell, Flying V, Jetti Petroleum, Phoenix Petroleum, PTT Philippines, Petrogazz at Seaoil.

Samantala, alas otso uno rin mamayang umaga ilalarga ng Cleanfuel ang kanilang rollback.

Kabilang sa tinukoy ng Department of Energy na dahilan ng pagmura ng krudo ang pasya ng organization of petroleum exporting countries na pigilan ang pagbabawas ng supply.

Apatnapung volcanic earthquakes sa Taal Volcano sa nakalipas na 24 oras.

Sa inilabas na volcano bulletin ng Phivolcs, dalawa sa mga pagyanig ang tumagal ng tatlo hanggang apat na minuto.

Aabot naman ng 1,500 meters “moderate” emission ng steam-laden plume at mayroong “pag-akyat” ng volcanic fluids sa main crater lake.

Nakapagtala rin ng average na 2,318 tons kada araw ng asupre ang bulkan hanggang nitong Disyembre a – 8.

Sa kabila nito, nananatili sa level 1 ang alert status sa naturang bulkan.

Isang residential area ang natupok sa barangay Poblacion, Pateros.

Ala sais y medya kagabi nang magsimula ang sunog sa isang bahay at umabot sa unang alarma.

Dakong ala syete naman nang tuluyang maapula ang sunog kung saan walang nasugatan habang iniimbestigahan ang sanhi nito at inaalam ang halaga ng mga napinsalang ari-arian.

Sa Parañaque City, umabot sa ika-apat na alarma ang sunog sa isang residential area sa barangay Don Bosco.

Ayon sa Bureau of Fire Protection-National Capital Region, nagsimula ang sunog sa San Lorenzo Ruiz, Doña Soledad Avenue alas tres y medya ng hapon.

Mabilis na kumalat ang apoy at itinaas sa ika-apat na alarma hanggang maapula pasado ala syete ng gabi.

Wala namang napaulat na nasugatan o namatay sa insidente habang inaalam pa ang sanhi ng pagkalat ng apoy.

Samantala, nasunog ang isang christmas tree sa open area sa ika-apat na palapag ng Uptown Mall sa Bonifacio Global City sa Taguig, dakong ala singko ng hapon.

Naapula naman ng mga security personnel ang sunog makaraan ang ilang minuto.

Naka-handa na ang Bureau of Immigration sa pagbubukas ng international flights sa Kalibo at Caticlan airports sa Malay, Aklan.

Magsisimula na ngayong buwan sa mga nasabing paliparan ang ilang flights patungo at pabalik ng taiwan.

Inatasan na ni BI Commissioner Norman Tansingco ang port operations division na tiyaking may sapat na personnel na naka-deploy sa dalawang airport para sa inaasahang dagsa ng mga pasahero.

Ang kauna-unahang flight ng Royal Air mula Caticlan patungong Taipei ay nakatakda ngayong araw.

Magsisimula naman sa Disyembre a – bente nwebe ang flight ng Tiger Air mula Kalibo-Taipei-Kalibo na pina-planong gawing apat na beses kada linggo.

Inaasahan na anya nila ang dagsa ng mga international passenger sa lahat ng international port sa susunod na taon dahil sa pagluwag sa covid-19 restrictions.

Muling ipagpapaliban ng makapangyarihang Commission on Appointments (CA) ang confirmation sa appointment ni Social Welfare Secretary Erwin Tulfo.

Inihayag ni Senate President Juan Miguel Zubiri na hindi pa nagbibigay ng pruweba si Tulfo na ni-renounce na nito ang kanyang American citizenship na nakuha niya noong dekada otsenta at ni-renounce sa unang bahagi ng taon.

Ayon kay Zubiri, na namumuno sa CA, maaaring magbigay ang kalihim ng kahit na “documentary proof” o “certification” na wala na siyang U.S citizenship.

Kailangan din anyang maresolba ang issue sa hatol na guilty kay Tulfo sa kasong libel at mag-iimbita sila ng mga dati at kasalukuyang mahistrado ng Supreme Court para pag-usapan ang hatol sa krimen na tinuturing na “crime involving moral turpitude.”

Nilinaw naman ng mambabatas na maaari pa rin namang makalusot si Tulfo sa CA kung maayos ang mga nasabing isyu sa kanyang appointment.

Gayunman, kung sa pagbalik ng Kongreso matapos ang break nitong pasko at ma-bypass sa ikatlong pagkakataon ang kalihim ay pagbobotohan ng CA kung aaprubahan o ibabasura ang appointment ni Tulfo. — Mula sa ulat ni Cely Ortega-Bueno (Patrol 19)