Drew Nacino

Wala pa ring desisyon ang Land Transportation Franchising and Regulatory Board (LTFRB) sa taas singil sa pasahe ng Grab Philippines.

Ito’y makaraang maudlot ang ikalawa sanang pagdinig hinggil sa reklamo laban sa sobrang paniningil sa pasahe ng nasabing transport network vehicle service (TNVS).

Ayon kay LTFRB Franchise Planning and monitoring Division Officer-In-Charge Jocelyn Tataro, humiling ang kampo ng Grab na i-reset ang pagdinig sa Enero a – diyes.

Kinumpirma naman ni Grab Philippines Senior Director for Strategy and Operations Ronald Roda na isa sa kanilang mga opisyal ang tinamaan ng covid-19 kaya’t humiling sila na ipagpaliban ang hearing.

Ipapaliwanag sana kahapon ng Grab ang sinasabing “inconsistent fees” na ipinataw nila sa mga pasahero.

Inatasan din ng LTFRB ang naturang TNVS na ipaliwanag ang minimum fare na P85 para sa short-distance trips na halos apat na kilometro lamang gayung ang aprubadong minimum rate para sa TNVS ay P45.

Samantala, tatalakayin din sa susunod na pagdinig ang surge fee ng Grab.

Pinag-aaralan na ng Sub-Committee on Labor Standards sa Kamara ang pitong panukalang batas na layuning itaas pa ang minimum wage sa gitna ng record-high inflation sa bansa.

Ayon kay House Committee on Labor and Employment Chairman Fidel Nograles, batid nila ang panawagan ng mga manggagawa na itaas ang sahod upang makasabay sa pagtaas ng presyo ng mga bilihin.

Ini-refer anya nila ang minimum wage bills sa sub-committee upang matiyak na matututukan ang mga ito at makalikha ng isang unified bill.

Tiniyak naman ni Nograles na magdo-doble kayod ang Sub-Committee on Labor Standards upang i-reconcile ang iba’t ibang panukala.

Kabilang sa pinag-aaralan ang House Bills 525 ni Kabayan Party-List Rep. Ron Salo; 4471 ni Bukidnon Rep. Jose Ma. Zubiri, Jr., na target ipako sa P750 ang national minimum wage at 514 ni Cavite Rep. Jolo Revilla na humihirit ng P150 daily across-the-board increase.

Sa loob lamang ng isang araw, labing-tatlong panukalang batas ang inaprubahan ng Kamara sa ikatlo at huling pagbasa.

Karamihan sa mga panukalang lumusot sa Kamara noong Lunes ay priority bills na tinukoy ng Marcos administration.

Kabilang ang labingtatlong bill sa common legislative agenda ng Legislative-Executive Advisory Council (LEDAC) na kinonvene ni Pangulong Ferdinand “Bongbong” Marcos, Jr. noong Oktubre.

Dahil dito, umabot na sa labinglima ang priority measures na inaprubahan ng mababang kapulungan ng Kongreso sa huling pagbasa simula nang magbalik ang sesyon noong Nobyembre a – Syete.

Kabilang sa mga aprubado na ang Center for disease Control and Prevention Act, Internet Transaction o E-Commerce Act, Waste-to-Energy Act at Magna Carta of Barangay Health Workers Act.

Tiniyak naman ni House Speaker Martin Romualdez na ipagpapatuloy nila ang pagpasa sa iba pang Ledac-priority bills.

Samantala, ngayong araw ang huling sesyon ng Kongreso ngayong taon.

Hinikayat ng Department of Health ang publiko na sa outdoor o open spaces na lamang magsagawa ng christmas party.

Inihayag ni DOH officer-in-charge Maria Rosario Vergeire na dapat ding tiyaking walang mga sintomas ng covid-19 ang mga dadalo sa mga nasabing aktibidad at bakunado.

Ito’y upang maiwasan ang hawaan ng covid-19 at iba pang uri ng sakit.

Pero kung hindi naman anya maiwasan na magdaos ng party sa kulob na lugar, dapat buksan ang mga bintana at pintuan upang may hangin pa ring pumasok o magkaroon ng maayos na bentilasyon.

Batay sa kasalukuyang datos ng DOH, aabot na sa 73.7 million ang mga fully vaccinated laban sa covid-19, kabilang ang 21 million na tinurukan ng booster.

Hindi pa dapat mag-panic ang publiko sa bahagya muling pagtaas ng kaso ng covid-19 sa bansa, sa nakalipas na linggo.

Ito, ayon kay DOH officer-in-charge undersecretary Maria Rosario Vergeire, ay hangga’t nananatiling “manageable” ang hospital utilization.

Tumaas anya ng 6% ang covid-19 cases sa buong bansa o may average na 1,181 new cases per day.

Sa National Capital Region, tumaas naman ng 15% ang covid cases na may average na 460 cases per day.

Sa kabila nito, nilinaw ng opisyal na nasa low risk classification ang hospital admissions sa lahat ng rehiyon.

Asahang lalo pang tataas ang presyo ng mga gulay halos dalawang linggo bago mag-pasko.

Bagaman normal namang nagmamahal ang gulay tuwing holiday season, nilinaw ni Department of Agriculture Deputy Spokesperson Rex Estoperez na hindi dapat sumobra ang presyo ng mga ito.

Ayon kay Estoperez, dapat maging makatuwiran at manatiling abot-kaya ang presyo ng gulay, partikular ang mga panahog sa pansit, lalo’t batay sa kanilang impormasyon ay marami ang supply sa northern Luzon.

Batay sa kanilang monitoring hanggang kahapon, tumaas na sa P140 ang kada kilo ng repolyo kumpara sa P120 kumpara noong Lunes; nananatili sa P100 ang carrots at P300 ang sibuyas;

Hindi rin natitinag sa P250 ang kada kilo ng bawang habang P100 ang imported.

Bumaba naman sa P120 mula sa P130 ang kada kilo ng patatas at P90 mula sa P100 ang kamatis.

Samantala, idinagdag pa ni Estoperez na hindi dapat maging labis ang pagtaas ng presyo ng gulay mula benguet upang kahit paano ay makabili ang mga consumer.

Ipinanawagan ng Employers Confederation of the Philippines (ECOP) kay Pangulong Bongbong Marcos na ipagpaliban ang dagdag-kontribusyon ng Social Security System (SSS).

Ayon kay ECOP President Sergio Ortiz-Luis, wala sa oras o bad timing ang contribution hike dahil sa mataas na inflation na nararanasan ng bansa.

Dapat anyang magkaroon ng kaunting extension o postponement sa pagtaas ng kontribusyon.

Idinagdag pa ni Luis na maraming microbusiness, employer at investor ang magrereklamo sa contribution hike.

Ipinunto naman ni Trade Union Congress of the Philippines Secretary General Arnel Dolendo na hindi napapanahon ang pagdaragdag ng kontribusyon dahil mataas ang inflation at mababa ang purchasing power ng mga manggagawa.

Ibinabala ni Dolendo na lalong hihirap ang buhay ng mga manggagawa kung ngayon itataas ang kontribusyon.

Pinuna ni Senator Grace Poe ang implementing rules and regulations ng mandatory Sim Registration Law.

Bagaman pinuri ni Poe ang national Telecommunications Commission (NTC) sa paglabas ng IRR, aminado ang senador na nalalabuan siya sa ilang issue.

Kabilang sa tinukoy ng mambabatas ang verification process sa nagrerehistro ng kanilang sim.

Ang verification process ang first line of defense laban sa gustong gumamit ng mobile telecom systems upang makapagdulot ng banta sa national security at para makapagnakaw ng identity.

Umaasa naman si Poe na magpapalabas pa ang NTC ng mas maraming guidelines upang magabayan ang mga telco sa pagtalima sa batas.

Sa nasabing proseso na kanyang tinutukoy, maaari umanong magkaroon ng facial validation gaya sa mga e-wallet platform na ginagamit na rin sa Singapore at sa iba pang bansang may mandatory sim registration.

Bilang chairman ng Senate Committee on Public Services at isa sa nag-akda ng batas, tiniyak ni Poe na patuloy na gagamitin ng Kongreso ang oversight functions nito para i-monitor ang mahigpit na pagpapatupad ng batas. —Mula sa ulat ni Cely Ortega-Bueno (Patrol 19)

Binalaan ng Department of Agriculture ang mga nagbebenta ng smuggled o puslit na sibuyas online o sa mga pamilihan.

Ayon kay D.A Deputy Spokesperson Rex Estoperez, maaaring makulong ang mga mahuhuling negosyante na nagbebenta at nagho-hoard ng sibuyas at otomatikong kakanselahin ang kanilang permit.

Aminado si Estoperez na may mga sindikato o grupo na nagho-hoard o nagtatago ng supply ng nasabing agricultural product.

Isa anya ito sa kanilang tinitingnang dahilan nang pagtaas ng presyo ng nasabing produkto.

Samantala, magpapatuloy ang pagbisita at monitoring ng DA sa mga cold storage facility upang matukoy kung may mga iniipit na supply ng sibuyas sa bansa.

Ikinabahala ng grupong Federation of Free Farmers Cooperatives (FFFC) ang projection ng U.S. Department of Agriculture (U.S. – D.A) na sasadsad sa 503 million metric tons ang global supply ng bigas.

Ayon kay FFFC National Manager Raul Montemayor, dapat nang tutukang maigi ng Department of Agriculture ang mga hakbang upang mapalakas ang produksyon.

Dapat din anyang ma-engganyo at himukin ng pamahalaan ang mga magsasaka na magtanim at pababain ang presyo ng abono.

Maaapektuhan din ang mga pinagkukunan ng pilipinas ng imported supply kaya’t nanganganib pang tumaas ang presyo ng bigas sa bansa.