Drew Nacino

Binalaan ng Philippine Coast Guard (PCG) ang mga kolorum na sasakyang pandagat na sinasamantala ang pagdagsa ng mga pasahero ngayong holiday season.

Ayon kay PCG Commandant, Admiral Artemio Abu, hindi nila kinukunsinte ang colorum sea transportation vessels bagkus ay mahigpit nilang binabantayan ang mga pantalan o isla.

Ito’y upang hindi makabiyahe ang lahat ng uri ng sasakyang pandagat na walang permit.

Tiniyak naman ni Abu na babantayan ang mga bahagi ng katubigan na may presensya ng coast guard.

Tiwala si House Speaker Martin Romualdez sa hakbang ni Pangulong Ferdinand “Bongbong” Marcos Jr. na punan ang kakulangan ng maritime industry ng bansa sa pamantayan ng european maritime safety agency.

Tugon ito ni Romualdez matapos ipag-utos ni PBBM ang pagbuo ng advisory board na tututok sa mga kakulangan na tinukoy ng European Union (EU) Sa edukasyon, training at certification system ng Filipino seafarers.

Sa kanyang pagharap sa mga mamamahayag sa sidelines ASEAN-EU Commemorative Summit sa Brussels, Belgium, sinabi ng mambabatas na kailangang tumalima ang Pilipinas sa 3-month period.

Kung mabibigo anya ay hindi kikilalanin at mawawalan ng bisa ang certification system ng Pinoy seafarers.

Samantala, tiniyak naman ng kongresista na mayroong “sense of urgency” ang gobyerno sa pagtugon sa nasabing problema kabilang ang pagpasa ng kongreso sa panukalang Maritime Education and Training Act.

Tumaas pa ang presyo ng karneng baboy at manok sa ilang palengke sa Metro Manila, siyam na araw bago ang tradisyunal na noche buena.

Sa NEPA Q-Mart at Commonwealth Market sa Quezon City halimbawa, nagmahal na sa 370 ang kada kilo ng liempo mula sa 365 pesos.

Umakyat naman sa 200 ang kada kilo ng manok mula sa 190 pesos noong isang araw habang ang baka ay nasa 370 hanggang 450 pesos na mula sa 365 hanggang 435 pesos.

Halos wala ring pinagkaiba ang presyo ng mga nasabing produkto sa mga supermarket pero hindi pa kasama rito ang pangrekado gaya ng sibuyas, na nasa 320 pesos ang kada kilo sa mga pamilihan sa Metro Manila.

Ayon kay Department of Agriculture (DA) Deputy Spokesperson Rex Estoperez, natural na gumalaw ang presyo ng baboy at manok kapag magpa-pasko dahil sa taas ng demand at inaasahang tataas pa ito sa susunod na linggo.

Samantala, sinuspinde na anya nila ang pag-i-issue ng import clearance sa galunggong at ibang isda para sa mga institutional buyer gaya ng canneries at processors.

Ito, anya, ay upang matiyak na kontrolado at hindi babahain ng imported o smuggled na isda ang mga palengke ngayong nagsimula nang pumasok ang inangkat ng gobyerno na 25,000 metric tons.

Sinubukan ng ilang labor groups ang 500 peso noche buena challenge ng Department of Trade and Industry (DTI).

Namalengke at tiningnan ng mga miyembro ng kilusang Mayo Uno at Kilos na Manggagawa kung talagang posible ang 500 o 488 pesos na budget sa paghahanda ng pamilyang may apat hanggang limang miyembro.

Ito’y matapos ilabas ng DTI ang listahan ng mga produktong maaaring mabili nang mura para sa mga ihahanda sa bisperas ng pasko.

Batay sa price guide, maaaring makabili ng spaghetti, pandesal, salad, hamon at keso sa halagang wala pang 500 piso basta’t mga pinakamurang brand ang pagpipilian.

Kahapon ay nagtungo ang mga miyembro ng dalawang grupo sa NEPA Q-Mart sa Cubao, Quezon City dala ang listahan.

Gayunman, abonado pa ang mga nasabing grupo at umabot sa 575 pesos ang gastos sa pamimili na sobra umano sa computation ng kagawaran.

Iginiit ng mga labor group na hindi makatotohanan ang naunang pahayag ng DTI.

Nakatakdang magbukas ang National Telecommunications Commission (NTC) ng sim registration facilities sa mga liblib na lugar para sa mga residenteng walang internet connection.

Ito, ayon kay NTC Consultant, Engr. Edgardo Cabarios, ay batay sa Implementing Rules and Regulations (IRR) Ng Sim Registration Law.

Dapat itayo ang mga ito sa mga liblib na komunidad sa bansa sa loob ng 60 araw makalipas ang pagpapatupad ng nasabing batas.

Nakasaad anya sa IRR Na dapat makipag-ugnayan ang NTC at Department of Information and Communications Technology sa mga lokal na pamahalaan upang magtalaga ng registration centers.

Dapat ding isagawa electronically ang sim registration sa pamamagitan ng isang secured platform o website na inilaan ng mga telco.

Maaari ring maglatag ang mga telco firm ng registration facilities katuwang ang Departments of the Interior and Local Government (DILG) at Education (DEPED).

Ikinabahala ng Department of National Defense (DND) ang ulat na dumarami muli ang mga Chinese vessel sa ilang bahagi ng West Philippine Sea (WPS).

Nito lamang Nobyembre nang mapa-ulat ang pagdagsa ng mga Chinese vessel sa West Philippine Sea matapos ang pagbisita ni US Vice president Kamala Harris sa Pilipinas upang ipakita ang suporta niya sa bansa.

Inihayag ni DND Officer-in-Charge Jose Faustino Jr. na nakita ang ilang Chinese vessels sa Iroquois reef at Sabina shoal.

Ang mga aktibidad anya ng Tsina sa WPS na malinaw na paglabag sa soberanya at hurisdiksyon ng Pilipinas na nagpapahina sa kapayapaan at katatagan ng rehiyon ay hindi katanggap-tanggap.

Binigyang-diin ng opisyal na malinaw ang direktiba ni Pangulong Bongbong Marcos Jr. na hindi bibitawan ng gobyerno ang kahit katiting na teritoryo ng Pilipinas.

Sa kabila nito, tiniyak ni Faustino na patuloy ang routine maritime at aerial patrols ng Philippine Navy at coast sa pinag-aagawang karagatan.

Suportado na ng super-majority sa kamara ang isinusulong na Maharlika Investment Fund (MIF) Bill.

Sa pagtaya ni Marikina City 2nd District Rep. Stella Quimbo, isa sa author ng House Bill 6608 o Sovereign Wealth Fund, dalawandaan labing-anim na mambabatas na ang naki-akda sa nasabing panukala.

Upang tuluyang mapagtibay sa mababang kapulungan ng kongreso, kailangan ng MIF Bill ng boto o suporta ng mayorya ng mga solon o kalahati sa tatlundaan labindalawang kongresista.

Positibo naman si Manila 5th District Rep. Irwin Tieng, Chairman ng House Commitee on Banks and Financial Intermediaries, na marami na sa mga mambabatas ang naiintindihan ang layunin ng MIF na inindorso ni Pangulong Bongbong Marcos.

Itinanggi rin ni Tieng na mayroong political pressure sa pag-apruba sa bill dahil pinag-aralan nila ito at naglagay ng safeguards.

Nitong Lunes, Disyembre a – 12 sinimulan ng Kamara ang deliberasyon sa plenaryo ng MIF.

Bigong makadalo si Pangulong Bongbong Marcos sa press conference sa Brussels, Belgium.

Kinumpirma ni House Speaker Martin Romualdez na sinipon at inubo si Pangulong Marcos dahil sa lamig ng panahon.

Nakatakda sana kahapon ang “kapihan” ng pangulo kasama ang mga mamamahayag bilang bahagi ng kanyang aktibidad para sa Association of Southeast Asian Nations-European Union Commemorative Summit.

Sa halip ay si Romualdez ang nagbigay ng pahayag sa media at tiniyak na kasalukuyang nakarerekober na si Pangulong Marcos.

Nanibago lamang anya si PBBM sa malamig na klima sa belgium lalo’t bumagsak sa negative 4 degrees celsius ang temperatura sa Brussels, kahapon.

Samantala, inihayag ng mambabatas na ipinanawagan niya sa punong ehekutibo na sertipikahan bilang urgent ang maharlika investment fund bill na tinatalakay sa plenaryo ng Kamara.

Nanindigan ang Department of Trade and Industry sa price guide na na-i-post sa kanilang social media na nagsasabing sapat na ang P500 na halaga ng noche buena meal sa pamilyang may apat hanggang limang miyembro.

Magugunitang umani ng batikos mula sa publiko, partikular sa mga netizen ang nasabing pahayag ng DTI.

Ito ang dahilan kaya’t hinamon ng ilang labor group, tulad ng Kilusang Mayo Uno (KMU) ang kagawaran na pagkasyahin ang P500 sa noche buena.

Gayunman, iginiit ni DTI Assistant Secretary Ann Cabochan na ang infographics ay sinadya upang maging adbokasiya, hindi para utusan ang mga mamimili kung ano ang dapat bilhin para sa bisperas ng pasko.

Batay anya sa price guide, ang mga mamimili ay makabibili ng spaghetti, pan de sal, salad, hamon at keso sa halagang wala pang P500 basta’t mga pinakamurang brand ang pagpipilian.

Samantala, inihayag ni KMU Secretary General Jerome Adonis na tila kinokondisyon ng DTI ang publiko, lalo ang mga manggagawa na makuntento na sa maliit na sahod.

Kampante ang Department of Energy na mareresolba ang problema sa supply ng kuryente pagsapit ng tag-init, lalo sa luzon.

Gayunman, aminado si DOE Undersecretary Wimpy Fuentebella na kabado sila dahil kailangang ilatag ang lahat ng agarang solusyon sa bawat scenario upang maiwasan ang malawakang blackout sa tag-init.

Ngayon lamang Disyembre, ilang beses nakaranas ng yellow alert o pagnipis ng supply ng kuryente ang Luzon at Visayas grids dahil sa pagpalya ng mga power plant.

Kamakailan ay sinuspinde ng San Miguel Corporation ang kanilang power supply agreement (PSA) para sa 670 megawatt supply sa Meralco kaya’t napilitan ang naturang power distributor na bumili ng mas mahal sa Wholesale Electricity Spot Market (WESM) .

Samantala, pumirma na ang Meralco at isa sa mga planta ng Aboitiz Power Corporation ng emergency power supply agreement subalit para sa 300 megawatts lamang habang ang nalalabing 370 megawatts ay magmumula pa rin sa WESM.

Nilinaw ni Atty. Ronald Valles, head ng Meralco regulatory Management Office na kung hindi nila hahatiin sa pagitan ng Aboitiz at WESM ang 670 megawatts ay lalong tataas ang singil sa kuryente na tiyak papasinin ng mga consumer.