Drew Nacino

Asahan na sa susunod na taon ang pagbaba ng presyo ng mga airline ticket makaraang babaan ng Civil Aeronautics Board (CAB) ang fuel surcharge level dahil sa pagmura ng jet fuel.

Inihayag ni CAB Executive Director Carmelo Arcilla na ibinaba na sa level 7 ang fuel surcharge simula sa Enero a –1 hanggang a – 30

Batay sa monitoring period ng ahensya simula November 10 hanggang December 9, nasa P41.50 ang average na presyo ng kada litro ng jet fuel.

Katumbas ito ng level 7 ng passenger and cargo fuel surcharge matrix.

Sa ilalim nito, sisingilin ang mga pasahero ng P219 hanggang P708 fuel surcharge para sa domestic flights at P772.71 hanggang P1,124 sa international flights, depende sa layo.

Samantala, para naman sa international passenger flights mula pilipinas, ang fuel surcharge ay aabot sa P835 hanggang P6,208.98 centavos.

Hindi na mapipigilan ang Social Security System (SSS) sa isang porsiyentong dagdag-kontribusyon na sasaluhin ng employers simula sa susunod na taon.

Ito’y sa kabila ng agam-agam ng ilang employers group ngayong bumabangon pa lang sila mula sa epekto ng covid-19 pandemic.

Ayon kay SSS President at CEO Michael Regino, sa katunayan ay point 75% lamang ang babayaran ng employers kaya’t hindi na dapat ipagpaliban pa ang ganitong kaliit na dagdag-kontribusyon.

Kamakailan ay tinutulan ng mga grupo ng negosyante at manggagawa ang pagpapatupad ng contribution hike ng SSS at PhilHealth dahil hindi umano ito napapanahon.

Sumampa na sa 50 milyong pasahero na ang dumaan sa mga pantalan sa bansa ngayong taon.

Ayon kay Philippine Ports Authority (PPA) General Manager Atty. Jay Santiago, maaaring lumobo pa sa limampu’t pitong milyon ang kabuuang bilang ng pasaherong daragsa sa katapusan ng taon.

Kumpara ito sa dalawampu’t dalawang milyong naitalang dami ng pasahero sa mga pantalan sa kaparehong panahon noong isang taon.

Maaaring naging mas kampante na anya sa pagbiyahe muli ang publiko dahil sa mas pinaluwag na covid-19 safety protocols.

Samantala, pinayuhan naman ni Santiago ang mga biyahero na magsuot pa rin ng face mask kung nasa mga air-conditioned section ng barko pero maaaring magtanggal kung nasa open area.

Nakatakda nang lagdaan ni Pangulong Bongbong Marcos Jr. ang 5.2 trillion peso 2023 proposed national budget sa sandaling makauwi na ito mula sa Brussels, Belgium.

Ito rin ang kinumpirma ni House Speaker Martin Romualdez sa kanyang pagharap sa mga mamamahayag sa sidelines ng European Union-Association of Southeast Asian Nations (EU-ASEAN) Summit sa Brussels.

Ngayong araw naman nakatakdang magbalik-bansa si Pangulong Marcos Jr.

Batay anya sa abiso sa kanila ng economic managers ay agarang ide-deploy simula sa unang bahagi ng taong 2023 ang nasabing pondo na pinaka-malaki sa kasaysayan ng bansa.

Magugunitang niratipikahan ng senado at kamara ang 2023 general appropriations bill at lagda na lamang ng pangulo ang kailangang upang ganap itong maisabatas.

Walang limitasyon at pahihintulutan ang multiple sim registration sa ilalim ng Implementing Rules and Regulations (IRR) ng Sim Registration Law.

Ito ang nilinaw ng National Telecommunications Commission (NTC) Sa inaasahang pagsisimula sa Disyembre a – 27 ng implementasyon ng nasabing batas.

Gayunman, binalaan ni NTC Consultant, Engr. Edgardo Cabarios ang publiko sa panganib ng pagkakaroon ng maraming sim cards.

Kabilang na anya rito ang pagiging pangunahing suspek sa fraud, sakaling ang kanilang numero ay masangkot sa iligal na aktibidad kaya’t dapat maging responsable ang mga sim card owner.

Nakasaad sa IRR na dapat munang beripikahin ng telco firms ang mga isinumiteng impormasyon at datos ng sim card owner, alinsunod sa mga probisyon ng data privacy act, IRR nito at iba pang issuances ng National Privacy Commission (NPC).

Samantala, pinayuhan ni Cabarios ang mga taong makakawala ng kanilang sim cards na agad itong i-report sa mga otoridad at ipakansela.

Naiuwi na ang labi ng Overseas Filipino Worker (OFW) na namatay habang nagtatrabaho sa isa sa mga venue ng 2022 FIFA World Cup sa Qatar.

Kinumpirma ni Department of Foreign Affairs (DFA) Undersecretary Eduardo de Vega na nasa Santa Ana, Pampanga na ang labi ni Alexander Pabustan.

Ayon kay de Vega, aksidente ang nangyari kay Pabustan na napag-alamang may heart condition.

Inatake anya ito sa puso at bumagsak habang nagtatrabaho sa tabi ng forklift.

Nagpapatuloy pa ang imbestigsyon ng mga otoridad upang mabatid kung may pananagutan ang employer ng OFW.

Tiniyak naman ng DFA na handa silang tumulong sa pamilya ni Pabustan.

Ibibigay na ng Department of Health (DOH) sa Commission on Audit (COA) ang lahat ng hawak na dokumento at kasunduan hinggil sa pagbili ng mga bakuna kontra COVID-19.

Tiniyak ni Health Secretary Office-in-Charge Maria Rosario Vergeire sa pagdinig ng senado na isusumite nila ang mga dokumento mamayang tanghali.

Pero bago nito, nagkaturuan pa ang DOH at COA kung bakit hindi pa isinasailalim sa special audit ang vaccine procurement.

Sinabi ni Vergeire na sina dating Health Secretary Francisco Duque III at dating Vaccine Czar Carlito Galvez ang mismong humiling ng special audit at hindi kailanman inihayag ng DOH na hindi maaaring mag-audit ang COA.

Sinulatan umano ni Duque para sa special audit si dating COA Chairman Michael Aguinaldo.

Gayunman, inihayag ni Joycelyn Ramos mula sa COA na totoong hiniling ang special audit subalit simula noong 2021 hanggang ngayong December 6, 2022 at hindi sila binigyan ng kumpletong dokumento bagkus ang edited version lamang ng kontrata ang kanilang natanggap.

Paliwanag naman ni Vergeire, hiningan kasi nila ng panig ang vaccine manufacturers, gaya ng Pfizer at Astra Zeneca dahil nasa kanilang kontrata na dapat silang abisuhan at hingan ng permiso kung ibabahagi ang dokumento sa audit at sa publiko. - mula sa ulat ni Cely Ortega-Bueno (Patrol 19)

Handa na ang iba’t ibang simbahan sa Maynila maging ang pulisya para sa tradisyunal na simbang gabi sa gitna ng mas maluwag na COVID-19 protocols, partikular sa pagsusuot ng face mask.

Kabilang sa mga preparasyon ang pagpipintura ng Manila Police District (MPD) ng physical distance markings sa Plaza Miranda sa tapat ng Quiapo Church.

Nilinis na rin ng mga tauhan ng simbahan ang paligid ng Minor Basilica of the Black Nazarene habang kinumpuni ang mga CCTV.

Ayon kay Reverend, Father Earl Allyson Valdez, Attached Priest ng Quiapo Church, magsisimula ang misa alas kwatro hanggang alas singko ng madaling araw, bukas.

Mayroon namang anticipated mass ng alas syete hanggang alas otso 8 ng gabi mamaya.

Ganito rin ang ikinasang paghahanda ng Manila Cathedral, San Agustin Church at Santo Niño de Tondo Church.

Samantala, plantsado na rin ang security plans ng MPD para sa simbang gabi.

Tiniyak ni MPD Director, Brig. Gen. Andre Dizon na nakatutok ang kanilang buong pwersa na ide-deploy sa mga kalsada at paligid ng mga simbahan habang kanyang pinayuhan ang publiko na maging alerto laban sa mga modus ng mga kawatan.

Aabot sa 131.9 million pesos na halaga ng umano’y smuggled frozen meat ang nasabat ng Bureau of Customs (BOC) sa Manila International Container Port (MICP).

Ayon sa Customs Intelligence and Investigation Service, nakatanggap sila ng impormasyon na isang shipment ng frozen mula China ang “misdeclared” at “underdeclared.”

Nakasilid ang mga kontrabando sa tatlong containers na naka-consign sa Victory JM Enterprise OPC.

Ang Victory JM Enterprise OPC ang consignee rin sa hiwalay na separate shipment na nagkakahalaga ng 63 million pesos na misdeclared frozen goods.

Tiniyak naman ni BOC Commissioner Yogi Filemon Ruiz na maghahain sila ng mga kaukulang reklamo laban sa mga consignee sa sandaling matapos ang inspeksyon.

Maaaring maharap ang Victory sa mga kasong paglabag sa Customs Modernization and Tariff Act.

Aprubado na sa ikatlo’t huling pagbasa sa mababang kapulungan ng kongreso ang panukalang magbibigay ng emergency passports at iba pang travel documents sa ilalim ng ilang pagkakataon.

Nitong Lunes o dalawang araw bago ang session break ng kongreso, umani ng botong 252 ang House bill 6510 o New Philippine Passport Act.

Alinsunod sa panukala na bibigyan ng emergency travel document ang isang Filipino na kailangang bumiyahe agad pero nawalan, napaso o mapapaso ng pasaporte o hindi pa na-i-isyuhan ng passport sa iba’t ibang kadahilanan;

Travel document certificate para sa mga Pinoy na i-re-repatriate, mga dayuhang may asawang Filipino at dependents na hindi pa naturalized at mga permanenteng naninirahan sa Pilipinas.

Maaari ring bigyan ng diplomatic passports ang secretary ng senado at secretary-general ng kamara.

Magpapatupad naman ang Department of Foreign Affairs (DFA) Ng sistema kung saan ang mga senior citizen ay papayagang mag-renew ng passport nang hindi na nangangailangan ng personal appearance gayundin ang pagbibigay ng 50% discount sa processing, issuance o replacement ng passport.

Sa sandaling maisabatas, maaaring patawan ng anim na taong pagkakakulong at pagmumultahin ng 2 million pesos ang sinumang lalabag.