Drew Nacino

Magsasagawa ng mas malalim na imbestigasyon ang Bureau of Fire Protection (BFP) sa sunog na ikinasawi ng sampung magkakamag-anak sa Barangay Putatan, Muntinlupa City.

Kinilala ang mga biktimang sina Jerome, 65 anyos; Gil, 66; Cherry at Mark Gil, kapwa 39; Ana, 33; Amentues, 16; Leandro Jose, 15; Emmanuel, 12 anyos, Claire at Cherise Ladia.

Ayon kay Muntinlupa City Fire Marshal Supt. Eugene Briones, maaaring abutin ng isa’t kalahating buwan bago matapos ang imbestigasyon sa nasabing sunog.

Kabilang anya sa isasagawa ang otopsiya sa mga nasawi.

Idinagdag ni Briones na fire hazard ang nasunog na bahay ng pamilya Ladia na itinayo noong dekada otsenta sa Larva Street, Bruger Subdivision.

Ito’y dahil masyadong puno ng gamit, mababa ang kisame at kulob na kulob ang bahay, na maaaring dahilan upang mahirapang makalabas ang mga biktima.

Mayroon ding dalawang fire exits ang bahay subalit kapwa umano hindi nagamit ng pamilya para makaligtas o makalabas.

Nagtataka ang Bureau of Fire Protection – National Capital Region kung bakit mabilis ang pagkamatay at marami ang nasawi sa sunog sa Barangay Putatan, Muntinlupa noong linggo ng umaga.

Sampung magkakamag-anak ang patay, kabilang ang isang bata nang hindi makalabas ang mga ito sa kanilang nasunog na bahay sa Larva Street, Bruger Subdivision kahit naganap ito dakong alas-9.

Ayon sa BFP-NCR Public Information Office, umabot lamang sa first alarm ang sunog at tuluyang naapula dakong alas-10:20 palaisipan din para kay City Fire Marshall Fire Supt. Eugene Briones kung bakit walang nakapansin sa sunog gayong umaga ito naganap at maraming tao ang nasa loob ng bahay.

Pero dahil sa batay sa naunang imbestigasyon ay nagsimbang gabi ang mga biktima, maaari anyang pagod at nagpapahinga ang mga ito nang lamunin ng apoy ang kanilang bahay.

Malaki rin umano ang maitutulong ng recording ng CCTV Camera sa loob ng bahay sa gagawing imbestigasyon kahit nasunog na ang naturang aparato.

Ito’y dahil buo pa naman ang hard drive na pino-proseso na ng I.T. Experts ng BFP.

Binigyang diin ni Sen. Ronald Dela Rosa, na nagbabalik na naman ang mga ‘ninja cops’ o ang mga pulis na dawit sa ilegal na droga.

Ang pahayag ni Dela Rosa, ay matapos ang pagkakaaresto kay M/Sgt. Rodolfo Mayo Jr. mula sa PNP drug Enforcement Group (PDEG), na kasama sa historic drug bust, kung saan nakumpiska ang nasa P6.7 billion na halaga ng “shabu” noong Oktubre.

Ayon sa dating PNP chief, na ang naturang suspek ay itinapon na umano sa Mindanao noong 2016, matapos lumabas sa intelligence report na ito ay ninja cop.

Dahil dito, nagtataka ang naturang senador kung bakit nakabalik ito sa Metro Manila at ginawa pang intelligence officer ng PDEG, kung saan lumawak pa umano ang kanyang papel na pagpapadami ng droga sa bansa.

Ipinaliwanag naman ni Dela Rosa kung bakit hindi tinanggal sa kanilang pwesto ang mga ninja cops, ay dahil ang intelligence reports at ang investigation process ay magkaiba.

Blangko umano ang Land Transportation Franchising Regulatory Board (LTFRB) sa itinaas na 2% fare commission na kinakaltas ng Grab sa kanilang partner drivers, na nasa app ng naturang transport network vehicle service (TNVS).

Disyembre a – 1 nang ipatupad ng Grab ang mas mataas na komisyon na kinakaltas sa kita ng TNVS drivers.

Ayon sa LTFRB, ang fare adjustment lamang ang pinayagan nila para sa mga pampasaherong sasakyan at ang 2% commission ng Grab ay kasunduan lamang sa kanilang TNVS partners.

Ito ang ipinaliwanag ng ahensya sa kanilang pagharap sa ginanap na pagdinig ng House Committee on Metro Manila Development.

Sa nasabing hearing, iginiit ni Jun De Leon ng grupong laban ng tnvs na dahil sa itinaas na 2% na komisyon, aabot na sa labindalawa hanggang labing-anim na oras nang nagmamaneho ang mga driver para lamang kumita sa kada pasada.

Pinag-re-resign na ng broadcaster na si Ramon Tulfo ang nakababatang kapatid na si Social Welfare Secretary Erwin Tulfo sa pwesto nito.

Ito’y sa gitna nang pangamba na hindi makalulusot ang kalihim sa makapangyarihang Commission on Appointments.

Ayon kay Mon, kung hindi naman pina-pahalagahan ang trabaho ng kanyang kapatid sa DSWD ay maiging magbitiw na lamang ito bilang secretary sa halip na maging kapit-tuko.

Iginiit ng broadcaster na ang C.A, na dalawang beses nang-bypass sa appointment ng nakababatang kapatid, ay binubuo ng mga “engot” na may kanya-kanyang pang-sariling interes.

Inihalintulad pa ni Mon si Erwin kay yumaong dating environment secretary Gina Lopez, na ibinasura rin ng C.A ang appointment, noong panahon ni dating Pangulong Rodrigo Duterte.

May ikatlo at huling pagkakataon pa ang kalihim para tuluyang paka-alpas sa makapangyarihang komisyon.

Magugunitang ginisa ang DSWD secretary ng mga miyembro ng C.A dahil sa pagiging convicted nito sa kasong habang kinuwestyon din ang kanyang citizenship.

Mahigit isang linggo bago mag-pasko, naka-heightened alert na ang Philippine Coast Guard bilang preparasyon sa inaasahang pagdagsa ng mga pasahero sa iba’t ibang pantalan.

Simula kahapon ay pinaigting na ng PCG ang pag-i-inspeksyon sa mga barko at dinoble ang mga port personnel upang matiyak ang seguridad sa mga seaport terminal.

Inatasan din ang mga coast guard personnel na mag-patrol at maghanda ng deployable response groups at contingency plans, gaya ng pagkakaroon ng sapat na life vests para sa maritime incidents at emergencies.

Magtatagal naman ang heightened alert status ng PCG hanggang Enero a – 7 ng susunod na taon.

Inaasahang aabot na sa mahigit P400 million ang premyo sa 6/58 ultra lotto ng Philippine Charity Sweepstakes Office (PCSO) sa draw mamayang gabi.

Ito’y makaraang walang makatumbok sa winning combination na 29 – 13 – 28 – 08 – 1 – 56 na may jackpot na P393.7 million, sa draw noong Martes.

Posible namang sumampa sa halos P100 million ang premyo sa 6/45 megalotto na bobolahin din mamaya.

Bigong masungkit noong Miyerkules ang kombinasyon na 7 – 11 – 2 – 17 -30 – 38 sa megalotto na may jackpot na P82.3 million.

Samantala, limampu’t apat na mananaya ang kumubra ng tig-P50,000 para sa second prize matapos masungkit ang 5 digit combination sa 6/49 superlotto na hindi pa rin napapanalunan ang jackpot na P15.8 million.

Tiniyak ng Philippine Ports Authority (PPA) na walang holiday closure sa mga pantalan sa gitna nang inaasahang pagdagsa ng mga pasaherong mag-uuwian sa kanilang mga probinsya para mag-pasko.

Taliwas ito sa naunang post ng 2Go sa kanilang website na walang mga biyahe ang kanilang mga barko.

Nilinaw ni PPA General Manager Jay Santiago na walang naiulat na pagsasara ng anumang pantalan ng PPA sa buong bansa at tuloy ang 24 oras nilang operasyon, lalo sa Maynila at Batangas.

Maka-aasa anya ang publiko na ngayong peak season ay tuloy-tuloy ang operasyon ng mga pantalan kahit pasko at bagong taon.

Samantala, naka-deploy na ang PPA port police sa mga pantalan at handa na rin ang mga empleyadong naka-duty sa PPA malasakit help desk uapng asikasuhin ang mga uuwi, siyam na araw bago mag-pasko.

Naglunsad ng prayer vigil ang mga kaanak ng tatlumpu’t limang nawawalang sabungero sa tanggapan ng Commission on Human Rights (CHR) sa Commonwealth Avenue, Quezon City.

Nanawagan ang mga kaanak ng mga nawawala kay justice Secretary Jesus Crispin Remulla na bilisan ang pagpapalabas ng resolusyon sa kaso upang managot ang mga nasa likod ng krimen.

Kabilang sa mga nanguna sa vigil sina Carmelita Lasco, ina ni Jonjon Lasco at Butch Inonog, ama ni John Inonog.

Iginiit ni Inonog na hindi naman sabungero kundi driver ang kanyang anak na si John at nasama lang sa mga dinukot.

Umapela naman si Carmelita Pangulong Bongbong Marcos at Secretary Remulla na pagtuunan ng pansin ang kanilang panawagang hustisya upang makita ang kanilang mga mahal sa buhay.

Nito lamang Disyembre a – nwebe, nakipagpulong sa ilang kamag-anak ng mga nawawalang sabungero ang special investigation task group.

Tiniyak sa nasabing pulong ng Criminal Investigation and Detection Group na tuloy ang paghahanap nila sa mahigit tatlumpung sabungero at sa mga taong sangkot sa kanilang pagkawala.

Posibleng magmahal ang mga panghimagas o matatamis na pang-handa sa pasko dahil sa mataas na presyo ng brown at washed sugar sa mga pamilihan.

Naglalaro sa P90 hanggang P95 ang kada kilo ng washed at brown sugar o segunda kumpara sa dating P75 sa mga palengke sa Metro Manila habang nasa P100 ang kada kilo ng white sugar o primera.

Gayunman, nasa P60 hanggang P65 lamang ang farmgate price ng segunda mula bacolod at pinapatungan nang malaki pagdating ng metro manila kaya’t nagmamahal.

Inamin ng Sugar Regulatory Administration (SRA) na hindi nabantayan ang presyo ng washed at brown sugar dahil nakatutok ang lahat sa puting asukal.

Ayon kay SRA Board Member Paulo Azcona, sinusubukan nila maging ng Department of Agriculture na ipako sa P90 ang refined sugar o puting asukal.

Pero kapansin-pansin na mayroong ilang palengke sa metro manila na nagbebenta ng raw o brown sugar ng nobenta pesos.

Bagaman stable na anya ang suplay ng asukal sa bansa, hindi pa ito ramdam sa mga palengke dahil nananatiling mataas ang presyo nito.