Drew Nacino

Bumuo na ng isang special panel ang World Boxing Council (WBC) na tututok sa mga naging pahayag ni boxing hall of famer referee Carlos Padilla na tinulungan niyang manalo si dating senador Manny Pacquiao sa laban kay Nedal Hussein noong October 2000.

Ayon kay WBC President Mauricio Sulaiman, lumiham na sa kanila ang anak ni Padilla na si Suzy Tuano upang hilinging ikunsidera ang mga naging komento ng ama, lalo’t otsenta’y otso anyos na ito.

Bagaman naiintindihan anya nila ang panawagan ni Tuano at nirerespeto si Padilla bilang isang “alamat” sa mundo ng boxing, susundin ng WBC sa ngayon ang proseso ng pag-rebisa sa naging komento ng retiradong referee.

Idinagdag pa ni Sulaiman na hindi na muna magsasapubliko ng anumang komento ang WBC.

Muling ipinanawagan ng Philippine Medical Association (PMA) sa publiko na gawin na lamang sa “outdoors” o “open spaces” ang mga planong christmas parties o reunions upang makatiyak na hindi muling kakalat ang covid-19.

Inihayag ni (PMA) President Dr. Benito Atienza na malaking tulong ang maayos na daloy ng hangin para hindi magkahawahan ng virus ang mga dumadalo sa inaasahang kabi-kabilang parties.

Dapat anyang iwasan ng mga organizer na gawing buffet ang sistema ng pagkain sa halip ay indibiduwal na ibibigay ang pagkain sa mga party-goer.

Pinayuhan din ni Atienza ang hotels at iba pang venues na himukin ang kanilang guest na magsuot lagi ng face mask at aalisin lamang kapag kakain at panatilihin ang distansya ng seating arrangement.

Samantala, nananawagan naman ang PMA president sa mga magulang na huwag nang isama ang mga anak na apat na taong gulang pababa dahil wala pa silang bakuna kontra sa covid-19.

Tiniyak ng Philippine Ports Authority (PPA) na walang port congestion sa bansa kahit inaasahan ang delay sa ilang international ports sa gitna ng holiday season.

Ayon kay PPA Spokesperson Eunice Samonte, mayroong yard utilization rate na 84.98% ang mga pantalan sa bansa.

Nangangahulugan anya ito na mayroon pang espasyo at walang pagbabara o backlog.

Samantala, inihayag ni Samonte na ilulunsad ng PPA ang container registry and monitoring system para sa cargo at balikbayan boxes ngayong buwan.

Posible namang dumating ang mga package sa loob ng isang linggo hanggang dalawang buwan.

Iniimbestigahan na ng Philippine Ports Authority (PPA) ang umano’y iligal na paniningil sa mga pasahero ng insurance sa mga pier.

Ito ayon kay PPA Spokesman Eunice Samonte, ay batay sa mga sumbong na natatanggap nila mula sa mga pasahero.

Nilinaw ni Samonte na walang dagdag-bayarin para sa insurance kapag sumasakay ng barko ang mga pasahero dahil kasama na ito sa kanilang binayaran.

Hinimok naman ng opisyal ang mga pasahero na agad iulat sa port police ang ganitong mga insidente o mga dagdag na paniningil. — Mula sa ulat ni Aya Yupangco (Patrol 5)

Nananatiling sapat ang supply ng lahat ng noche buena items ngayong holiday season.

Ito ang tiniyak ng iba’t-ibang stakeholders sa Department of Trade and Industry (DTI) sa ginanap na national price coordinating council meeting.

Inihayag ni Trade Secretary Alfredo Pascual na kasama sa mga natalakay ang presyuhan at dami ng suplay ng noche buena products, lalo’t inaasahang magmamahal ang mga ito ngayong holiday season.

Gayunman, nilinaw ni Pascual na hindi kasama sa basic necessities at prime commodities kaya’t price guide lamang ang inilabas ng DTI para rito.

Inihalimbawa ng kalihim ang pinakamurang ham na magkakaiba ang presyo depende sa kalidad.

Mayroon anyang ham na P158 ang kada kilo subalit mayoon din namang P800 sa kaparehong timbang kaya’t nasa mga consumer na ang pasya kung ano ang bibilin depende sa kanilang budget.

Ikinukonsidera na ng Department of Agriculture ang pansamantalang pagpapaliban sa pagbabawal sa pagtitinda ng imported na mga isda, salmon at pampano sa mga palengke.

Sa harap ito ng mga negatibong pahayag at reaksyon ng mga mambabatas at publiko sa Fisheries Administrative Order o FAO 195 ng Bureau of Fisheries and Aquatic Resourcers (BFAR).

Aarangkada simula sa linggo, Disyembre a – 4 ang ban sa mga nasabing produkto pero aalamin ng DA kung napapanahon pa ang patakaran dahil 1999 pa ito nilagdaan.

Aminado si DA Deputy Spokesperson Rex Estoperez na tila hindi napapanahon ang fisheries administrative order 195, lalo’t magpa-pasko.

Nakatakda anyang i-anunsyo ng kagawaran kung itutuloy ang moratorium o hindi.

Kamakailan ay kinuwestyon nina Senador Raffy Tulfo at Congressman Elpidio Barzaga ang nasabing kautusan ng BFAR.

Tumaas ang bilang ng airport arrivals ngayong ‘ber’ months.

Inihayag ng Bureau of Immigration (BI) na umabot sa 634,000 ang arrivals hanggang nitong Oktubre ngayong taon kumpara sa 195,000 noong Disyembre, 2021.

Ayon kay BI Spokesperson Dana Sandoval, inaasahang tataas pa ang bilang na karaniwang peak tuwing Disyembre.

Ito, anya, ay dahil sa pagluluwag ng travel restrictions sa bansa sa gitna ng covid-19 pandemic.

Una nang sinabi ng Department of Tourism na mahigit 1.8 million foreigners ang bumisita sa Pilipinas, na lampas sa target ng pamahalaan.

Pinalawig ng Philippine National Railways (PNR) ang kanilang operasyon sa mga ruta sa Metro Manila bilang preparasyon sa inaasahang holiday rush.

ayon sa PNR, alas kwatro onse ng madaling araw ang unang biyahe ng tren mula Tutuban habang alas nwebe disi sais ng gabi ang huling biyahe.

Nagdagdag din ng train trips, kabilang ang Tutuban – San Pedro, alas otso disi sais ng gabi; San Pedro – Tutuban, alas kwatro singkwenta ng madaling araw at Sucat-Tutuban, ala singko uno ng madaling araw.

Sa ngayon ay tumaas sa 55 hanggang 60 ang daily trops ng PNR mula sa dating 44 hanggang 50 dahil sa pinalawig na operating hours.

Tumaas din ng 17% ang ridership mula Tutuban station noong 2019 holiday season.

Hinimok ni Pangulong Ferdinand “Bongbong” Marcos,Jr ang mga Filipino na kilalanin at tularan ang kabayanihan ni Gat Andres Bonifacio.

Ito ang inihayag ni Pangulong Marcos sa kanyang pagbisita sa Monumento Circle sa Caloocan City kung saan nag-alay siya ng bulaklak bilang pagdiriwang sa ika-isandaan limampu’t siyam na kaarawan ni Bonifacio.

Pinangunahan ng punong ehekutibo ang flag-raising ceremony at kasama sa pag-aalay ng bulaklak si Dr. Rene Escalante, Chairman ng National Historical Commission of the Philippines at AFP Chief of Staff, Lt. Gen. Bartolome Vicente Bacarro kasabay ng 21-gun salute.

Ayon kay PBBM, nana­tiling buhay ang diwa ng ipinaglaban ni Bonifacio sa pamamagitan ng mga ginagawa na may kaakibat na “sense of duty” at pagiging makabayan.

Pinapurihan ng mga dumagat tribal leader ang pagpapatigil ng Department of Environment and Natural Resources sa quarrying activities sa upper Marikina watershed sa Sierra Madre.

Ito’Y makaraang kanselahin ng DENR ang apat na Mineral Product Sharing Agreements (MPSA)a upper Marikina river basin protected landscape sa ginanap na senate budget hearing noong November 16.

Inihayag ni DENR Secretary Toni Yulo-Loyzaga na dalawang MPSA ang kanselado na habang ang dalawa pa ay nabigyan na ng notice para sa kanselasyon at naghihintay na lamang ng 90 day effectivity.

Sa nilagdaang liham ng mga dumagat, nawala anila ang nararamdaman nilang takot at napalitan ng katiwasayan ang mga katutubong naninirahan sa kabundukan ng Rizal.

Bago ang anunsiyo ng kalihim, ang kinanselang mga MPSA ay sinuspinde lamang sa kabila ng public announcement hinggil sa kanselasyon ni dating DENR Secretary Roy Cimatu noong 2020.

Tiniyak naman ni Loyzaga na wala nang MPSA sa loob ng protected area ng upper Marikina river basin, dahil sa batas kung saan ipinagbabawal aniya ang pag-quarry at pagmimina sa loob ng mga protektadong lugar.