Drew Nacino

Ibinunyag ni retired boxing referee Carlos Padilla ang ginawa niyang pandaraya sa laban ni dating senador Manny Pacquiao at nedal hussein ng Australia noong October 14, taong 2000.

Sa panayam ng World Boxing Council matapos iluklok sa Nevada boxing hall of fame, inamin ni Padilla na tinulungan niya si Pacquiao upang matalo si Hussein sa kanilang laban noon sa Ynares Center, Antipolo City.

Ito, anya, ay upang makarating sa World Boxing Championship ang pambansang kamao, na noong panahon na iyon ay hindi pa sikat at masyadong kilala.

Ayon kay Padilla, nanaig ang kanyang pagka-pilipino nang mga sandaling iyon at inilarawan din niya si Hussein bilang “dirty fighter”.

Sa ika-apat na round ay pinabagsak ni Hussein si Pacman pero agad tumayo habang sinadya umanong patagalin ni Padilla ang pagbibilang sa people’s champ upang maiwasang matalo.

Kalauna’y nanalo si Pacquiao sa laban sa pamamagitan ng “technical knockout” sa round 10.

Tiniyak ng grupong Samahang Industriya ng Agrikultura (Sinag) na may sapat na supply ng baboy para sa holiday season kahit sumirit ang presyo nito sa ilang palengke sa Metro Manila.

Sa kabila ito ng kumpirmasyon ng Bureau of Animal Industry (BAI) na bahagyang nakararanas ng kakapusan ng pork supply ngayong huling bahagi ng taon.

Ayon kay Sinag Chairman Rosendo So, maaaring tumagal ang kasalukuyang supply hanggang unang quarter ng susunod na taon dahil batay sa datos ng gobyerno ay bumabaha ng imported sa cold storage.

Dahil dito, tinawag ni So na economic saboteurs ang mga nagpapakalat ng balitang mayroong kakulangan sa supply ng baboy.

Mayroon anyang nagpapakalat ng maling balita na may shortage upang bigyang-katuwiran ang taas-presyo sa mga palengke at ituloy ang pagbaba ng taripa sa baboy, bigas, mais at mechanically deboned chicken meat.

Sa katunayan anya ay mga importer at trader lamang ang masaya kapag mag-papasko dahil namamayagpag ang mga ito sa retail market at humahakot ng kita pero mga producer, consumer at gobyerno naman ang lugi.

Idinagdag ng Sinag na naglalaro sa P155 hanggang P175 kada kilo ang farmgate price ng baboy pero kung may supply deficit ay dapat tataas ito subalit bumaba pa.

Sa pag-iikot ng DWIZ sa ilang palengke sa Metro Manila, aabot na sa P270 hanggang P300 ang kada kilo ng karneng baboy.

Posibleng pumalo hanggang P320 million ang premyo sa ultra lotto 6/58 sa susunod na draw, bukas ng gabi.

Ito’y makaraang walang makasungkit sa jackpot na P304.9 million na may winning combination na 38-55-26-32-20-09 sa draw ng Philippine Charity Sweepstakes Office, noong Martes ng gabi.

Sa kabila nito, mayroong labing-anim na bettors ang nakatumbok ng limang kombinasyon at nanalo ng tig-P120,000.

Ang Ultra Lotto 6/58 ay ibinobola tuwing Martes, Biyernes at Linggo.

Nagpatupad ng temporary ban ang Department of agriculture sa pag-angkat ng poultry products mula japan, Hungary at California, U.S.A. dahil sa banta ng bird flu.

Alinsunod ito sa nilagdaan ni Undersecretary Domingo Panganiban na DA Memorandum Orders 69, 70 at 71 noong Nobyembre a – 23.

Nakasaad sa kautusan na pansamantalang ipinagbabawal ang pag-angkat ng domestic at wild birds at mga produkto, gaya ng poultry meat, day-old chicks at itlog mula sa mga naturang lugar.

Sinuspinde rin ng kagawaran ang processing, evaluation ng application at issuance ng sanitary and phytosanitary import clearance para sa mga nasabing commodity.

Gayunman, papapasukin pa rin ang shipment mula sa Japan at Hungary na in-transit na bago pa naibigay ang notice ng m.o. sa Japanese at Hungarian authorities, sa kondisyon na ang mga produkto ay “slaughtered o produced” bago ang October 12, 2022.

Ang shipments naman mula California na in-transit bago ilabas ang m.o. sa U.S. authorities ay papapasukin din basta’t ang mga produkto ay “slaughtered o produced” bago ang August 4.

Kumpiyansa si Senate Committee on Finance Chairman Sonny Angara na kakayaning aprubahan sa Bicameral Conference Committee sa susunod na linggo ang 2023 proposed national budget.

Ayon kay Angara, sa ngayon ay nasa 50% hanggang 60% na ang kanilang napa-plantsa sa mga hindi magkakatugmang probisyon ng ipinasang bersyon ng budget ng Senado at Kamara.

Matapos ang unang meeting ng Senate at house bicam panel, ang nag-uusap lang muna ngayon ay mini-bicam panel sa pangunguna nina Angara at House Committee on Appropriations Chairman Elizaldy Co.

Isa sa mga kailangang plantsahin ng magkabilang-panig ay ang usapin sa confidential at intelligence funds ng ilang tanggapan ng pamahalaan.

Target ng Kongreso na ratipikahan ang aaprubahang bicam kung hindi sa susunod na linggo o bago mag-adjourn ang sesyon sa December 14. —- Mula sa ulat ni Cely Ortega-Bueno (Patrol 19)

Matapos kuwestyunin ni Senador Raffy Tulfo, nagpasya ang mataas na kapulungan ng Kongreso na ipatawag ang mga opisyal ng Bureau of Fisheries and Aquatic Resources (BFAR).

Ito’Y upang pagpaliwanagin sa kautusan na nagbabawal sa pagbebenta ng imported na isda, gaya ng pink salmon at pampano sa mga palengke simula Disyembre a – kwatro.

Suportado ni Senator Grace Poe ang imbestigasyon ng Senado sa naturang issue dahil nalalabuan umano siya sa fisheries Administrative Order (FAO) 195 ng BFAR.

Nanawagan si Poe sa Department of Agriculture na pagsabihan ang BFAR na ayusin ang biglaang pagpapatupad nito ng FAO 195 na noon pa dapat 1999 pinairal.

Iginiit naman ni Senate Minority Leader Koko Pimentel na kailangan nilang magsagawa ng pagdinig para pagpaliwanagin ang BFAR kung ano ang ligal na basehan ng kautusan.

Mga importer anya at hindi mga retailer ang dapat pagtuunan ng pansin ng BFAR at kailangan ding pag-aralan ng senado ang paghihiwalay ng nasabing ahensya mula sa DA para higit itong mabantayan.

Samantala, bilang chairman ng Committee on Agriculture, hiningi na ni Senator Cynthia Villar ang mga impormasyong hawak ni Tulfo para gamitin sa ipatatawag na pagdinig. —Mula sa ulat ni Cely Ortega-Bueno (Patrol 19)

Lumabas sa isang pag-aaral na ang presyo ng sibuyas sa Pilipinas ang pinakamahal sa buong mundo.

Batay ito sa pag-aaral ng website na global product prices noong Setyembre.

Naglalaro na sa P280 hanggang P300 ang kada kilo ng pulang sibuyas sa mga palengke sa pilipinas habang sumisirit sa halos P400 sa mga supermarket o 6 dollars 63 cents.

Pero sa nakalap na datos ng global product, 1 dollar & 51 cents lamang ang global average price ng sibuyas o mahigit P80 kada kilo.

Pinakamura sa Norway na 22 cents o P13; sumunod sa Pilipinas na may pinakamahal na sibuyas ang Puerto Rico, 4 dollars 70 cents habang 4 dollars 62 cents sa Japan.

Mababa rin ang presyo ng sibuyas sa Uzbekistan, 36 cents at 40 cents sa Kazakhstan.

Sa ikalawang sunod na buwan, panibagong price increase sa liquefied petroleum gas (LPG) ang sumalubong sa mga consumer ngayong unang araw ng Disyembre.

Kabilang ang Petron sa mga nagpatupad ng dagdag dos pesos bente singko sentimos kada kilo ng l.p.g habang piso at bente sais sentimos sa kada litro ng auto-lpg.

Dos pesos bente syete sentimos naman ang idinagdag ng Shell – Solane sa kada kilo ng tangke.

Una nang inihayag ng Department of Energy na ang price hike sa l.p.g. ay bunsod nang inaasahang global demand, lalo sa mga bansang nakararanas ng winter ngayong Disyembre.

Patuloy na pinag-i-ingat ng Department of Health ang publiko sa banta omicron subvariant na BQ.1 sa gitna ng inaasahang kaliwa’t kanang christmas party, lalo’t pinayagan na rin ang pagdaraos nito sa mga paaralan.

Una nang inihayag ng DOH na posibleng umabot sa halos 2,300 kada araw ang maitatalang kaso sa bansa sa pagtatapos ng Disyembre.

Ipinaalala naman ni infectious disease expert at vaccine expert panel member Dr. Rontgene Solante na huwag kalilimutang magsuot ng facemask sa indoor at outdoor areas.

Ayon kay Solante, ang pagsusuot ng facemask ang pinaka-mabisa pa ring proteksyon laban sa covid-19.

Hangga’T maaari anya ay iwasang mag-videoke dahil masyadong mataas ang tsansa nang hawaan kapag nagpapasahan ng mikropono.

Pinaiiwas din ang publiko sa pakikipag-kuwentuhan nang malapitan kapag kumakain at mahalagang huwag ipilit lumabas kung may sintomas kahit nakasuot ng mask.

Sa ngayon ay opsyonal na ang pagsusuot ng face mask, na isa sa pinaka-malaking pagbabago sa covid-19 protocols sa bansa.

Aprubado na sa Senate Committee on Higher Technical and Vocational Education ang panukalang sumailalim sa Reserve Officers Training Corps (ROTC) ang mga kabataang estudyante sa kolehiyo.

Sa inaprubahang panukala sa committee level, mga first at second year college students ang oobligahing sumailalim sa mandatory ROTC.

Ayon kay Senator Ronald dela Rosa, ilalagay sa babalangkasing batas na babae at lalaking estudyante ang sasailalim sa mandatory ROTC.

Hindi anya bibigyan ng diploma ang mga estudyanteng hindi sasailalim sa nasabing training.

Sinabi ni dela Rosa na nais sana ng ilang proponents ng panukala na isama sa mandatory ROTC ang mga nasa Senior High School Students pero malaki pa ang kakailanganing budget para dito.

Magtutulungan ang Commission on Higher Education at Department of National Defense para matiyak na maayos na maisasailalim sa training ang mga kabataan.

Tiniyak naman ng Senador na mahigpit na ipagbabawal ang anumang hazing at pang-aabuso sa mga sasailalim sa ROTC lalo na sa mga kababaihan.