Drew Nacino

Sinimulan na ng Pilipinas at Estados Unidos ang pagtalakay sa posibleng kasunduan sa pagtatayo ng panibagong nuclear power plant.

Matatandaan na inihayag ni U.S. Vice President Kamala Harris sa kaniyang pagbisita sa Malacañang noong isang linggo na ang “123 agreement” sa pagitan ng dalawang bansa ang magiging tulay upang mag-export ng american nuclear equipment sa Pilipinas.

Gayunman, nilinaw ng Philippine Nuclear Research Institute (PNRI) na bukas pa sila sa pakikipag-usap sa ibang bansa.

Inihayag ni PNRI Executive Director Carlo Arcilla na kabilang sa handang tumulong sa Pilipinas ang South Korea na mayroon umanong planta na kahalintulad ng Bataan Nuclear Power Plant.

Ilan pa sa tinitingnan na opsyon ng pamahalaan ang France, China at Japan na matagal nang gumagamit ng nuclear energy.

Sa kabila nito, aminado si arcilla na si Pangulong Ferdinand Marcos Jr., pa rin ang magdedesisyon sa naturang usapin.

Tumaas na ng P10 ang presyo ng itlog kada tray sa ilang pamilihan sa Metro Manila.

Kabilang sa mga dahilan ang pagnipis ng supply dahil sa bird flu outbreak, partikular sa Central Luzon.

Halimbawa na lamang sa Balintawak Market sa Quezon City, naglalaro na sa P210 hanggang P250 ang kada tray ng itlog mula sa dating P185.

Ayon kay Philippine Egg Board Association president Irwin Ambal, asahan ang patuloy na pagmahal ng itlog sa Disyembre dahil sa mataas na demand kapag holiday season.

Kumukuha na anya ang mga taga-Central Luzon ng supply ng itlog sa Batangas na isinu-supply din sa Metro Manila.

Samantala, ipinaliwanag naman ni Department of Agriculture Deputy spokesman Rex Estoperez na karaniwan namang bumababa ang supply ng itlog tuwing tag-lamig.

Imposible anyang i-hoard pa ang itlog at tiyak na ilalabas din naman ang mga ito dahil mabubugok.

Kasado na ang Special Elections sa ika-7 distrito ng lalawigan ng Cavite sa Pebrero a – 25 ng susunod na taon para sa nabakanteng puwesto ni dating Congressman at ngayo’y Justice secretary Boying Remulla.

Ayon kay Comelec spokesman, Atty. John Rex Laudiangco, automated ang halalan sa nasabing distrito kaya’t nakahanda silang mag-imprenta ng balota.

Isasagawa naman ang filing ng Certificate of Candidacy (COC) sa Disyembre a – 5 hanggang a – 6.

Magsisimula anya ang Election Period sa January 26 at tatagal hanggang March 12, 2023 kaya’t magpapatupad ng mga pagbabawal at iba pang regulasyon, gaya ng Gun Ban.

Samantala, magsasagawa naman ng Plebisito sa Baliuag, Bulacan sa December 17 upang alamin ang pulso ng mga mamamayan kung pabor silang gawin nang lungsod ang kanilang bayan.

Nagsimula ang Plebiscite Period noong November 24 at tatagal hanggang December 24.

Kinumpirma na ng Commission on Appointments ang Ad Interim Appointments nina Migrant Workers secretary Susan Ople at Commission on Audit chairman Gamaliel Cordoba.

Magsisilbi si Ople bilang unang kalihim ng bagong-tatag na Department of Migrant Workers hanggang matapos ang termino ni Pangulong Ferdinand “Bongbong” Marcos Jr., habang uupo si Cordoba bilang chairman ng COA hanggang Pebrero a – 2 taong 2029.

Sa kabila nito, sinunspinde naman ang deliberasyon sa Ad Interim Appointment ni Raphael Lotilla bilang Energy secretary.

Sinuspinde ni Senate President Pro Tempore Loren Legarda, chairperson ng CA Committee on Energy ang hearing batay sa mosyon ni Senator JV Ejercito.

Ito’y dahil sa nawalan na ng sapat na oras at marami pang miyembro ng komisyon ang nakalinyang magtanong sa mga usaping may kaugnayan sa enerhiya. —ulat mula kay Cely Ortega Bueno (Patrol 19)

Tinawag na “very anti-poor” ni Senator Raffy Tulfo ang utos ng Bureau of Fisheries and Aquatic Resources (BFAR) na ipagbawal ang pagtitinda ng mga imported na isda tulad ng pampano at pink salmon sa mga palengke simula Disyembre a – 4.

Ginawang batayan ng BFAR ang Fisheries Administrative Order 195 noong 1999 kung saan ang binibigyan lamang ng exception sa certification para sa importasyon ng isda ay para sa canning at processing purposes.

Gayunman, kinuwestyon ni Tulfo kung bakit naisama ang mga insitutional buyers, gaya ng mga hotel at restaurant.

Lumalabas anya na ang mga mayayaman na lamang na kayang kumain sa mga restaurant at hotel ang pwedeng kumain ng Pampano at Pink Salmon pero ang mahihirap na sa mga pamilihan lang nakabibili ng imported na isda ay wala nang pagkakataong makakain nito.

Iginiit ng senador na ang nasabing hakbang ay malinaw na paglabag sa ‘Equal Protection’ at ang kautusan ng BFAR ay isang diskriminasyon laban sa mga maliliit na tindera sa merkado. —ulat mula kay Cely Ortega Bueno (Patrol 19)

Puspusan na ang Pamahalaan sa pagpapatupad ng mga hakbang upang ibaba ang presyo ng mga pangunahing bilihin, lalo ng pagkain maging ng produktong petrolyo at singil sa kuryente.

Tiniyak ito ni Pangulong Bongbong Marcos sa kanyang pagharap sa mga mamamahayag matapos bumisita sa international rice research institute, sa los baños, laguna, kahapon.

Ayon sa Pangulo, ang pagpapababa sa presyo ng pagkain ang kanyang magsisilbing pamasko sa mga mamamayan.

Gayunman, aminado ang Punong Ehekutibo na isa sa kanyang pangamba ang Temporary Restraining Order ng Court of Appeals sa Power Supply Agreement ng San Miguel Corporation at Meralco.

Gumagawa na anya sila ng paraan upang mabawasan ang epekto ng mahal na krudo, lalo sa supply ng kuryente at kung magtataas man ng singil ay hindi dapat biglain ang mga consumer. —ulat mula kay Gilbert Perdez (Patrol 13)

Aminado si Pangulong Bongbong Marcos na pumipili pa siya ng bagong Agriculture Secretary at may mga gusto pa siyang maipatupad bago magtalaga ng kapalit.

Ito ang inihayag ni Pangulong Marcos matapos bumisita sa International Rice Research Institute sa Los Baños, Laguna upang alamin ang ilang makabagong teknolohiya sa pagtatanim ng palay.

Sa katunayan anya ay nagbabago ang listahan ng mga pinagpipilian niyang bagong kalihim ng D.A.

Una nang inihayag ni PBBM na bababa lamang siya sa kanyang pwesto bilang agriculture secretary sa sandaling mailatag na ang structural changes sa kagawaran. —ulat mula kay Gilbert Perdez (Patrol 13)

Posibleng umakyat sa 2,300 ang arawang kaso ng Covid-19 sa bansa sa katapusan ng taon.

Ito, ayon kay DOH Epidemiology Bureau Director, Dr. Alethea de Guzman, ay kung patuloy na mababawasan ang mga sumusunod sa minimum public health standards.

Ang nasabing bilang anya ay batay sa pinaka-bagong fassster projection ng kagawaran para sa papalapit na holiday season.

Maaari ring umabot sa 18,000 ang aktibong kaso pagsapit ng Disyembre kung mananatiling mababa ang compliance rate sa public health standards.

Idinagdag ni de Guzman na ang holiday season ay hudyat na mas magkakaroon ng interaksyon ang mga tao at inaasahang mababaliwala ang social distancing dahil sa kaliwa’t kanang Christmas Party.

Nilinaw ng DOH official na kung walang bagong variant of concern na papasok sa bansa, maaaring hindi magkaroon ng pagtaas ng hospitalization rate at kung tataas naman, hindi ito mangangahulugang darami ang mga ma-o-ospital.

Gayunman, kung makapasok anya sa bansa ang isang variant na hindi tinatablan ng bakuna at mas nakahahawa, asahang magkakaroon ng pagsirit ng Covid-19 cases at hospitalization rate.

Ilang araw matapos madiskubre ang mas nakahahawa at vaccine-proof umanong Omicron subvariant BQ.1, patuloy ang pagtaas ng kaso ng Covid-19 sa bansa matapos makapagtala ng karagdagang 801 infections, kahapon.

Kabilang sa mga nadagdag ang 12 fatalities kaya’t lumobo pa sa 64,620 ang death toll.

Sumampa naman sa 4,035,000 ang total caseload kabilang ang 3,952,000 recoveries matapos madagdagan ng 1,074 na panibagong gumaling sa sakit.

Samantala, bahagya muling bumaba sa 18,250 ang aktibong kaso ng Covid-19.

Ipakakalat na sa mga mataong lugar sa Metro Manila ang mga ambulansya ng Bureau of Fire Protection – Emergency Medical Services (BFP-EMS).

Alinsunod ito sa utos ni Interior and Local Government secretary Benhur Abalos sa bagong-upong BFP-NCR Director na si Fire chief Supt. Nahum Tarroza upang umagapay sakaling magkaroon ng aksidente sa lansangan.

Ayon kay Tarroza, bihasa ang mga tauhan ng BFP-EMS sa kahit anong klaseng rescue operations kaya dapat na palakasin ang kanilang presensya at regular na rumonda o pumarada sa mga pangunahing kalsada sa kalkhang maynila gabi-gabi.

Layunin anya ng nasabing programa na mas mapabilis ang pagresponde ng BFP sa anumang sakuna o aksidente sa kalsada, kasabay nang inaasahang holiday rush.