Drew Nacino

Naghatid ang Department of Health ng primary healthcare service sa Tondo, Maynila katuwang ang United States Agency for International Development (USAID) Missions.

Pinangunahan ni DOH officer-in-charge Maria Rosario Vergeire at USAID Director Ryan Washburn ang aktibidad na tinawag na “Healthy at Happy sa Barangay 20: A Walkthrough in Slums of Tondo”.

Layunin nitong itaguyod ang kalusugan at kagalingan sa komunidad.

Kabilang sa mga isinagawa ang information drive kontra Tuberculosis at Mobile Van Check-up.

Nagpasalamat naman si Vergeire sa USAID at lokal na Pamahalaan ng Maynila sa pagtulong sa DOH upang isulong ang mga inisyatibo para sa kalasugan.

Iimbestigahan ng Office of the Ombudsman ang ipinatupad ng Bureau of Fisheries and Aquatic Resources (BFAR) na ban sa pagbebenta sa mga palengke ng imported na isda, gaya ng pampano at salmon na walang sertipikasyon.

Noon lamang isang linggo ay inanunsyo ng BFAR na simula Disyembre a – 4 ay ipagbabawal na ang pagbebenta sa mga nasabing isda batay sa Fisheries Administrative Order (FAO) 195.

Gayunman, nagtataka ang Ombusdman kung bakit ngayon pa lamang ipatutupad ang FAO 195 gayong noong 1999 pa nilagdaan ang naturang kautusan.

Binigyan naman ng tanodbayan ng hanggang tatlong araw ang BFAR upang makapagpaliwanag.

Bukas ang Bureau of Fisheries and Aquatic Resources (BFAR) sa imbestigasyon ng Office of the Ombudsman kaugnay sa ban sa pagbebenta ng imported na isda sa mga palengke.

Ayon kay BFAR chief Information Officer at Fisherfolk Coordination Unit head Nazario Briguera, matagal na nilang ipinatutupad ang Fisheries Administrative Order 195.

Mas maghihigpit lamang anya sila ngayon dahil sa dumaraming reklamo ng mga lokal na mangingisda hinggil sa mga imported na isda.

Binigyang-diin ni Briguera na masyado nang laganap sa mga pamilihan ang mga imported na isda na nakasasama sa kabuhayan ng mga lokal na mangingisda, kaya’t kailangang i-regulate.

Nakasaad sa kautusan na simula Disyembre a – 4 ay ipagbabawal na ng ahensya ang pagbebenta sa palengke ng ilang imported na isda, gaya ng pink salmon at pampano.

Kailangang mag-angkat na ang Pilipinas ng libu-libong toneladang sibuyas ngayong buwan sa gitna ng kakulangan sa naturang produkto sa bansa.

Inihayag ni Samahang Industriya ng Magsasaka (SINAG) chairman Rosendo So na wala nang suplay ng puting sibuyas sa bansa noong nakaraang buwan.

Apektado na rin anya ang pulang sibuyas sa Pilipinas at maliit na ang inventory nito sa ngayon.

Ayon kay So, kailangan ng 7,000 metric tons na white onion at 7,500 metric tons ng red onion sa bansa, lalo’t nasisira na ang ibang sibuyas.

Ibinabala naman ng farmers group na kung hindi kakayanin ng Department of Agriculture na magpasok sa bansa ng sibuyas sa Disyembre, lalong sisirit ang presyo nito kaya’t ngayong Nobyembre pa lamang ay dapat mag-angkat na.

Plano ng Department of Agriculture na mag-angkat ng sibuyas sa ikalawang linggo ng Disyembre.

Ito ang inihayag ni D.A. deputy spokesperson Rex Estoperez sa gitna nang patuloy na pagsipa ng presyo ng pulang sibuyas sa mga pamilihan.

Ayon kay Estoperez, hindi na makatarungang umabot sa P400.00 ang kada kilo ng red onion.

Nagtuturuan na anya ang mga retailer at dealer kung bakit napakataas at naka-i-iyak na ang presyo ng sibuyas.

Samantala, ipinasasapubliko ng D.A. sa mga retailer at dealer kung saan nanggagaling ang sibuyas at dapat may ebidensiya sa paratang na may nagaganap na smuggling ng naturang produkto sa bansa.

Nagkilos – protesta ang mga magulang ng mga batang naturukan ng Dengvaxia sa harap ng tanggapan ng Department of Justice sa Lungsod ng Maynila.

Ito’y upang ipanawagan na alisin sa puwesto si Undersecretary Jesse Andres.

Ayon sa mga demonstrador, si Andres ay tagasunod ni dating Health Secretary at ngayo’y Iloilo 1^st District Rep. Janet Garin na siyang nakaupo noon sa DOH nang maganap ang kontrobersya sa Dengvaxia.

Inihirit din ng grupo kay Justice secretary Jesus Crispin Remulla na bigyan sila ng patas na pagdinig sa inihaing reklamo laban sa mga dating opisyal ng gobyerno.

Una nang iginiit sa Korte ni Public Attorney’s Office chief Percida Acosta na ilipat ang prosekusyon ng dengvaxia cases sa kanila.

Ito’y dahil mayroon umanong Conflict of Interest ang National Prosecution Service lalo’t dating abogado ni Garin si Andres.

Ang Kongresista ay co-accused sa kasong Reckless Imprudence Resulting in Homicide na isinampa sa Quezon City Metropolitan Trial Court Branch 133, kaugnay ng kontrobersya sa Dengvaxia vaccines.

Pinalagan ng Department of Justice ang akusasyon ni Public Attorney’s Office chief Percida Rueda-Acosta laban kay Justice Undersecretary Jesse Andres.

Ayon sa DOJ, hindi patas ang akusasyon ni Acosta laban kay Andres kaugnay sa kontrobersya sa Dengvaxia vaccine.

Iginiit ng kagawaran na nag-inhibit na si Andres sa paghawak sa naturang kaso nang umupo ito bilang Undersecretary.

Binigyang-diin pa ng Justice Department na labag sa batas ang nais ni Acosta na ilipat ang prosekusyon ng Dengvaxia cases sa PAO.

Naglunsad ng Transport Protest Caravan ang Confederation of Truckers Association of the Philippines (CTAP) laban sa mga polisiyang may mga kaakibat na multa at iba pang isyung naka-aapekto sa kanilang kabuhayan.

Mahigit 20 sasakyan, na kinabibilangan ng ilang kotse at motorsiklo ang lumahok sa aktibidad sa tapat ng Bureau of Customs, Philippine Ports Authority at Manila City Hall.

Kabilang sa pina-aaksyunan ng CTAP sa PPA at Port Operators ang problema sa terminal appointment booking system; passing thru fees sa ICTSI, LGU at travel permit; shipping lines container deposits at truck ban.

Ayon kay CTAP president Mary Zapata, masyado ng maraming polisiya ang PPA at port operators dahilan upang madagdagan ang gastos ng truckers, brokers at importers, lalo sa penalty.

Bagaman nagkaroon na anya sila ng dayalogo sa Department of Transportation, PPA, Department of Trade and Industry at BOC, wala pa ring inilatag na kongkretong solusyon sa kanilang mga problema.

Sa kabila nito, nilinaw ni Zapata na wala silang balak maglunsad ng mas malaking holiday truck protest dahil masisira ang operasyon at magdudulot ito ng mas malaking mga problema.

Umapela naman ang CTAP sa pamunuan ng Aduwana, PPA Manila City Government at kay Pangulong Ferdinand Marcos Jr., na aksyunan ang kanilang mga hinaing.  —ulat mula kay Aya Yupangco (Patrol 5)

Humingi ng pang-unawa ang Department of Transportation sa publiko matapos makakuha ng bagsak na grado ang Metro Manila sa isang Global Urban Mobility Ranking.

Sa 2022 Urban Mobility Readiness Index, na inipon ng Oliver Wyman Forum at University of California at Berkeley, 60 lungsod ang ini-ranggo batay sa public mobility infrastructure, public transit accessibility at iba pang aspeto ng public transportation.

Gayunman, sumadsad sa ika-58 pwesto ang Metro Manila kasunod ng mga lungsod ng Nairobi, Kenya at Lagos, Nigeria.

Ayon kay Transportation secretary Jaime Bautista, tanggap naman nila ang lumabas na ulat kaya’t patuloy nagpupursige ang gobyerno na pagandahin ang mobility at public transportation sa National Capital Region.

Humihingi pa anya sila ng karagdagang panahon sa publiko upang makumpleto ang mga proyektong magiging tulay para sa mas maayos na biyahe.

Mayorya ng mga kabataang Filipino, lalo ang mga nasa working age na 21 hanggang 30, ang mas nais mag-hanapbuhay sa bansa sa halip na makipag-sapalaran sa ibayong-dagat.

Batay sa 2021 National Youth Survey, 33% ng 4,900 respondents ang naniniwalang sapat ang mga oportunidad sa kanilang mga lugar, mapa-lungsod o probinsya;

23% naman ang naniniwalang hindi sapat ang mga oportunidad at ikinukunsiderang maghanap ng trabaho sa ibang panig ng Pilipinas at 20% ang naniniwalang mas maganda ang mga oportunidad sa ibang bansa pero ayaw umalis ng Pilipinas;

9% ang nagsabing wala sapat na oportunidad sa kanilang mga lungsod o lalawigan kaya’t napipilitang maghanap ng trabaho sa ibang panig ng bansa;

8% ang mas piniling magtrabaho at manirahan sa ibang bansa at 7% ang nagsabing hindi nila alam kung saan maghahanap ng mga trabaho.

Samantala, 76% ng mga respondent ang kumpiyansang magiging maayos ang kalidad ng kanilang pamumuhay sa susunod na limang taon.

Isinagawa ang survey upang magsilbing basehan sa kasalukuyang trends para makapaglatag ng mga hakbang sa pag-unlad ng kabataan.

Taong 1996 pa nang huling magsagawa ng National Youth Survey.