Drew Nacino

Asahan na umano ang patuloy na mutation at pagsulpot ng iba’t ibang lineage ng Covid-19 sa mga darating pang panahon.

Ito’y matapos kumpirmahin ng Department of Health na nakapasok na rin sa Pilipinas ang Omicron sub-variant BQ.1 na sinasabing nagdudulot ng panibagong pagtaas ng mga kaso sa U.S. at ibang panig ng Europa.

Ayon kay D.O.H. Officer-In-Charge, Undersecretary Maria Rosario Vergeire, kailangang matutunan ng lahat na mamuhay kasama ang COVID-19 kaakibat ang ibayong pag-iingat sa kalusugan.

Natural anyang sumulpot ang mga bagong variant kung patuloy ang transmission nito at ang pinakamabisang gawin ng lahat ay limitahan ang pagkalat nito sa pamamagitan ng pagpapalakas ng proteksyon ng mga sarili at mga establisimiyento.

Binigyang-diin ni Vergeire na dapat maintindihan ng publiko ang uri o abilidad ng virus at iwasang umasa sa pagsasawalang-bahala kung mahahawa o hindi kapag bumababa ang kaso.

Sa kabila nito, muling tiniyak ng DOH official na nananatili sa “low risk” ang healthcare utilization sa bansa at palaging handa ang gobyerno sakaling sumipa muli ang mga bagong kaso ng Covid-19.

Hindi basta mabubuwag ang Research Institute for Tropical Medicine (RITM) kahit pa lumikha ng Center for Disease Control and Prevention (CDC) na isinusulong ni Pangulong Ferdinand “Bongbong” Marcos Jr.

Ito ang nilinaw ni DOH Officer-In-Charge Maria Rosario Vergeire sa kabila ng pangamba ng mga staff ng RITM na mawalan sila ng trabaho.

Magugunitang nag-protesta ang mga empleyado ng RITM laban sa inaasahan nilang pagbuwag sa nasabing institusyon upang magbigay-daan sa pagtatatag ng CDC alinsunod sa proposal sa mahigit apatnapung bills sa Kongreso.

Tiniyak ni Vergeire sa mga empleyado na wala silang dapat ipangamba dahil hindi naman mawawala ang RITM.

Sa katunayan anya ay lalo pa nilang palalakasin ang RITM. dahil isasama ito panukalang CDC na magkakaroon ng mas maraming pondo, suporta at ekspero upang makatuwang ng DOH.

Ang RITM ay mayroong mahigit 1,000 empleyado, kabilang ang mga doktor, nurse, laboratory technician at researcher.

Posible pang mag-mahal ang Suggested Retail Prices (SRP) ng Basic Necessities at Prime Commodities (BNPC).

Ipinahiwatig ni Trade secretary Alfredo Pascual na nasa 25% ng requests para sa price adjustments ang inaasahang diringgin ng DTI.

Bagaman pinag-aaralan ng DTI Consumer Protection and Advocacy Group ang petisyon para sa price hike mula sa 15 manufacturers, 55 variants naman ng stock keeping units o variants ng 20 BNPC ang inaasahang magmamahal.

Ayon kay Pascual, 1% hanggang 10% ang maaaring itaas ng presyo ng mga nasabing pangunahing bilihin.

Kabilang sa mga inaasahang magmamahal ang de latang sardinas, processed milk, kape, tinapay, instant noodles, asin, meat loaf, beef loaf, corned beef, toyo at suka.

Gayunman, hindi idinetalye ng kalihim kung kailan ipatutupad ang panibagong dagdag-presyo.

Agosto nang huling maglabas ng Suggested Retail Price ang DTI sa basic at prime commodities.

Pansamantalang ipatitigil ng Energy Regulatory Commission (ERC. ang koleksyon ng feed-in-tariff sa electricity bill upang maka-agapay sa mga consumer sa gitna ng nagbabadyang pagtaas ng singil sa kuryente.

Ang FIT, na hindi pa aabot ng 4 centavos per kilowatt hour, ay bahagi ng electricity bill na napupunta sa mga plantang gumagamit ng renewable energy sources, kaya’t kung ititigil ang koleksyon nito ay maaaring magmura ang singil.

Inihayag ERC Chairperson Monalisa Dimalanta na pagsapit ng Pebrero ay kanilang pag-aaralan kung maaaring palawigin ang suspensiyon ng koleksiyon ng FIT.

Una nang sinabi ng ahensya na balak nitong alisin ang ilang charge sa electricity bill dahil sa posibleng pagmahal ng kuryente sa susunod na taon.

Maliban dito, naghahanap pa ang ERC ng ibang paraan upang mabawasan ang singil, gaya ng pagrepaso ng ipinapasang fuel cost sa customers at pagbaba ng transmission rate ng National Grid Corporation of the Philippines.

Nanindigan si MMDA Acting Chairman Atty. Romando Artes na walang iregularidad sa pag-transfer ng ilang bahagi ng pondo ng Department of Information and Communications Technology sa MMDA.

Tugon ito ni Artes sa pahayag ni Northern Samar 1st District Rep. Paul Daza na iligal ang paglipat ng DICT sa mahigit P3billion a pondo para sa implementasyon ng national broadband project sa MMDA.

Gayunman, nilinaw ng MMDA official na P.1 billion lamang ang natanggap nila at mayroon silang hawak na resibo.

Hindi naman din anya ipinagbabawal sa batas ang fund transfers normal na itong gionagawa sa iba’t ibang government agencies, kabilang ang MMDA.

Idinagdag pa ni Artes, na nagkaroon na sila ng dayalogo noon kay dating DICT Acting Secretary Emmanuel Rey Caintic hinggil sa fund transfer para sa implementasyon ng ilang programa.

Nagpasaklolo anya si Caintic sa MMDA para sa implementasyon ng kanilang broadband project dahil mayroong low budget utilization rate ang DICT noon.

Napabilang ang Pilipinas sa mga bansang may pinaka-malaking income inequality o agwat ng suweldo o kita ng mga mahihirap kumpara sa mayayaman.

Batay sa report ng World Bank, nasa pang-labinlimang pwesto ang Pilipinas mula sa animnapu’t tatlong bansa pagdating sa wealth gap.

Lumabas sa report na ang top 1 percent ng mga pilipinong kumikita ay nakakukuha lamang ng 17 percent ng total national income habang fourteen percent ng nasabing sweldo ay pinaghahatian pa ng bottom 50 percent.

Ipinaliwanag ng World Bank na ang “inequality” ay nangangahulugang hindi pagkakapantay-pantay ng oportunidad; kakayahan sa pagkuha ng de-kalidad na edukasyon at social norms na nagpapahirap sa kababaihan.

Kahit pa anila bumaba ang poverty rate sa bansa, nasasayang ang potensyal ng mga mamamayan dahil sa inequality.

Sa kabila nito, tiniyak ng National Economic Development Authority na mayroong nakalatag na hakbang ang pamahalaan matapos ang ulat ng world bank.

Inihayag ni Socioeconomic Planning Secretary Arsenio Balisacan na handa ang gobyerno na tugunan ang wealth gap at sa katunayan ay bumuo na sila ng ‘8-point socioeconomic agenda na tututok sa mga problema gaya ng kahirapan.

Itinanggi ng Philippine National Police na nagkaroon ng hostage-taking sa munisipyo ng Pandag, Maguindano Del Sur.

Taliwas ito sa pahayag ni dating Maguindanao Governor Esmael “Toto” Mangudadatu na hinostage ng grupo ni governor, Bai Mariam Sangki-Mangudadatu ang grupo ni pandag acting Mayor Zihan Mangudadatu.

Ayon kay acting PNP public Information Office Chief, Col. Red Maranan, walang katotohanan ang akusasyon ng dating gobernador at kongresista na nagkaroon ng hostage incident.

Wala rin anyang nagpaputok ng baril bagkus ay nagkaroon lamang ng komosyon at nagka-pisikalan ang magkabilang kampo.

Nagsasagawa na ng imbestigasyon ang PNP sa pangunguna ni Bangsamoro Regional Police Office Director, Brig. Gen. John Guyguyon.

Samantala, nag-viral din sa social media ang video ng insidente na nakunan ni dating governor Mangudadatu. — Mula sa ulat ni Tina Nolasco (Patrol 11)

Nakadidismaya, nakapanlulumo at nakakatakot na pangyayari.

Ganito inilarawan ni dating Maguindanao Governor at esmael “Toto” Mangudadatu ang naganap na tensyon sa pagitan ng kanyang hipag na si Pandag Acting Mayor Zihan Mangudadatu at pinsang si Maguindanao Del Sur Governor Mariam Sangki-Mangudadatu.

Ayon sa dating kongresista, hindi nila inakalang ganito ang ipapakita at gagawin ng kasalukuyang gobernador ng lalawigan sa harap ng publiko at ng kanyang mga nasasakupan.

Nag-viral pa sa social media ang video ng aktuwal na insidente na kuha mismo kahapon kung saan nakitang hinablot ni Sangki-Mangudadatu ang cellphone ni Zihan, maybahay ng kasalukuyang mayor na si Mayor Khadafeh Mangudadatu.

Tinangka rin anya ng gobernadora na sampalin at paluin ng cellphone si Vice Mayor Zihan sa harap mismo ng maraming tao.

Idinagdag pa ng dating gobernador na pinagpapalo pa ang mga tao, bodyguards, mga kakampi ng bise alkalde at mga councilors nito.

Nag-ugat ang komosyon nang ideklara ng regional Trial Court Branch 15 noong October 14 si dating Maguindanao Administrator Mohajeran “Odjie” Balayman na nanalong mayor ng Pandag sa May 9 elections.

Nabalot ng tensyon ang bayan ng Pandag, Maguindanao del Sur matapos pwersahang pasukin ng grupo ni Governor Mariam Sangki-Mangudadatu ang munisipyo upang palayasin si acting Mayor Zihan Mangudadatu sa tanggapan.

Nag-viral pa sa social media ang video nang pagpasok ng grupo ni Sangki-Mangudadatu sa opisina ni Zihan, na nahalal bilang vice mayor at umaaktong alkalde dahil sa rule of succession matapos makulong ang asawang si Khadafeh Mangudadatu, noong Setyembre dahil sa 2 counts ng murder.

Ang nasabing video ay ipinost ni dating maguindanao governor at Representative Esmael “Toto” Mangudadatu na kapatid ni Khadafeh, na natalo kay Sangki-Mangudadatu noong May 9 gubernatorial race.

Nakita rin sa video ang paghablot ng gobernadora sa cellphone ng bise alkalde na tinangkang ipalo sa acting mayor subalit napigilan ng mga bodyguard.

Dito na sumiklab ang gulo sa pagitan ng magkaribal na kampo na nasundan ng pagpapaputok umano ng baril pero hindi pa malinaw kung sino sa dalawang grupo ang nagpaputok.

Kasama ni Sangki-Mangudadatu si dating Maguindanao Administrator Mohajeran “Odjie” Balayman, na nag-file ng election protest at kalauna’y idineklarang nanalo sa may 9 elections at nanumpa kay Sangki-Mangudadatu matapos maglabas ng ruling ang Korte.

Gayunman, kinikilala ni Bangsamoro Interior and Local Government Minister Naguib Sinarimbo si Zihan, bilang elected vice mayor, na dapat humalili sa alkalde matapos makulong ang asawang nitong si Khadafeh nang maglabas ng kautusan ang RTC.