Drew Nacino

Patuloy na pinag-aaralan ng Manila Electric Company ang Temporary Restraining Order (TRO) na inisyu ng Court of Appeals sa power supply agreement sa pagitan ng Meralco at Southern Premier Power Corporation, na subsidiary ng San Miguel Corporation.

Ayon kay Meralco Senior Vice President for Communications at spokesman Joe Zaldarriaga, umaasa sila aaksyon agad ang Department of Energy sa kanilang hirit na competitive selection process exemption sa ilang emergency power supply agreements na handa ng ipatupad.

Ito’y upang ma-protektahan ang mga customer laban sa posibleng mas mataas na presyo ng wholesale electricity spot market.

Sa ngayon anya ay prayoridad nilang matiyak na nagpapatuloy ang matatag, maaasahan at sapat na supply ng kuryente sa customers.

Patuloy ding kino-konsulta ng Meralco ang kanilang legal team upang mabatid ang mga susunod na hakbang.

Samantala, sakali namang magkaroon ng epekto ang nasabing TRO, posibleng maramdaman ito sa Disyembre at maaaring mag-reflect sa generation charge sa Enero.

Inalmahan ng Philippine Chamber of Commerce and Industry o PCCI ang paniningil ng Local Government ng Malay, Aklan ng P100 insurance sa mga turistang pupunta sa Boracay.

Inihayag ni dating PCCI – Boracay president Elena Bugger na dapat ay kinonsulta muna ng lokal na pamahalaan ang stakeholders bago maningil.

Ayon kay Bugger, nirerequire naman ng Department of Tourism ang lahat ng business establishment sa Bora na magkaroon ng third-party liability insurance, gaya sa mga accommdation na mayroon ding insurance.

Dagdag-gastos anya sa mga turista ang paniningil ng P100 na dapat ay gawing optional sa halip na sapilitan.

Sisimulan ngayong araw ang paniningil ng 100 peso insurance upang ma-protektahan ang mga bibisita sakaling magkaroon ng aksidente, lalo’t maraming aktibidad sa isla, gaya ng water activities.

Magpapatupad ng ilang hakbang ang MMDA upang maibsan ang inaasahang pagbigat ng daloy ng trapiko, mahigit tatlong linggo bago mag-Pasko.

Kabilang sa tinukoy ng MMDA ang ipinatupad na adjusted operating hours sa mga mall sa Metro Manila na sinimulan ngayong Nobyembre.

Ayon kay San Juan Mayor Francis Zamora, bagong Metro Manila Council Chairman, papahabain din ang oras ng duty ng mga traffic enforcer at pahihintuin muna ang mga pagkukumpuni sa mga kalsada.

Simula naman anya sa Disyembre a – 26, gigibain ang Magsaysay Flyover sa Santa Mesa, Maynila upang magbigay-daan sa konstruksyon ng NLEX-Slex Connector Road.

Batay sa datos ng MMDA hanggang nitong Nobyembre a – 10, halos 400K sasakyan na ang naitatalang dumaraan sa EDSA, halos kaparehas ng traffic volume bago ang Covid-19 pandemic.

Inaasahang tataas pa ito ng 10% hanggang 15% habang papalapit ang Pasko.

Sinibak ng Korte Suprema bilang abogado ang dating opisyal ng Integrated Bar of the Philippines (IBP) dahil sa panloloko at paghingi ng P150,000 kapalit ng pag-aayos ng isang Annulment Case.

Ipinag-utos din ng Supreme Court en banc na alisin ang pangalan ni Atty. Remegio Rojas sa roll of attorneys matapos mapatunayang lumabag sa Lawyer’s Oath at Code of Professional Responsibility.

Nag-ugat ang Disbarment laban kay Rojas dahil sa reklamo ni Jocelyn Bartolome, na naging kaklase ng abogado sa kolehiyo.

Nakipag-ugnayan si Bartolome kay Rojas para magpatulong hinggil sa Annulment na nais isampa ng kanyang kapatid.

Ipinagmalaki umano ni Rojas sa Complainant na mayroon siyang kamag-anak na presiding judge sa Cotabato na maaaring magpabilis sa annulment proceeding kapalit ng P150,000 na ibibigay umano sa hukom.

Agad nagbayad si Bartolome ng P90,000 bilang advance payment pero nadiskubre ng complainant na ang ibinigay sa kanya na kopya umano ng Annulment Decision ay peke matapos nilang ipasuri sa National Statistics Office.

Iginiit ng S.C. na hindi maaaring palampasin ang ginawa ni Rojas na isa pa namang dating opisyal ng IBP– South Cotabato at General Santos Chapters bukod pa sa isa rin itong dating law professor at opisyal ng iba’t ibang civic organizations.

Inilunsad na ng pamahalaan ang Anti-Illegal Drugs Advocacy Program na tinawag na Buhay ay Ingatan, Droga’y Ayawan (BIDA).

Inilarawan ito ni Interior secretary Benhur Abalos bilang bagong-bihis na drug war na “pinaigting at mas holistic campaign.”

Sa launching ng BIDA Program sa Quezon Memorial Circle, inihayag ni abalos na kasama sa programa ang mga local government unit, national government agency at iba pang miyembro ng sektor ng lipunan.

Makakatuwang nila ang Philippine National Police, Philippine Drug Enforcement Agency, National Bureau of Investigation at iba pang Drug enforcement agencies.

Tatargetin anya sa BIDA program ang pinaka-ugat ng iligal na droga habang makikipagtulungan ang mga nasabing ahensya sa mga Barangay, Simbahan, Religious communities at mga Pamilya.

Ito’y upang tugunan ang problema sa iligal na droga at i-rehabilitate ang mga durugista.

Samantala, katuwang ang Departments of Social Welfare and Development at Health sa rehabiLitation Programs habang magbibigay ng kabuhayan ang Department of Trade and Industry at tutulong sa paghahanap ng job opportunities ang Department of Labor and Employment.

Naghahanda na ang sektor ng transportasyon sa inaasahang pagdagsa ng mga motorista at pasahero sa papalapit na holiday season.

Sa Paranaque Integrated Terminal Exchange (PITX), nananatiling magaan sa 130,000 per day ang passenger volume kada araw pero inaasahang aabot ito sa 160,000 hanggang 170,000 bago o sa mismong araw ng Pasko.

Ayon kay PITX spokesman Jason Salvador, inaasahang darami ang bibiyahe ngayong taon dahil sa mas maluwag na Covid-19 restrictions.

Pinaghahandaan na rin anya nila ang pagsisimula ng 24- oras na operasyon ng EDSA Bus Carousel na aarangkada sa Disyembre a-1 hanggang katapusan ng taon.

Inihayag naman ni Manila International Airport Authority assistant senior General Manager Bryan Co na simula Nobyembre hanggang sa unang bahagi ng 2023 ang peak season ng biyahe kaya’t naglatag na sila ng mga hakbang upang ma-kontrol ang passenger volume.

Pagdating sa mga biyahe sa barko, inabisuhan ni Philippine Ports Authority General Manager, Atty. Jay Santiago ang mga pasahero na agahang mag-book ng ticket online upang maiwasan ang aberya.

Samantala, tiniyak ni MMDA spokesperson, Atty. Melissa Carunungan na patuloy ang paglalatag nila ng hakbang bilang preparasyon sa mabigat na traffic volume, gaya ng clearing ng mabuhay lanes at pagpapatigil sa mga paghuhukay sa kalsada maliban sa priority projects ng DPWH.

Asahan na umano ang patuloy na mutation at pagsulpot ng iba’t ibang lineage ng Covid-19 sa mga darating pang panahon.

Ito’y matapos kumpirmahin ng Department of Health na nakapasok na rin sa Pilipinas ang Omicron sub-variant BQ.1 na sinasabing nagdudulot ng panibagong pagtaas ng mga kaso sa U.S. at ibang panig ng Europa.

Ayon kay D.O.H. Officer-In-Charge, Undersecretary Maria Rosario Vergeire, kailangang matutunan ng lahat na mamuhay kasama ang COVID-19 kaakibat ang ibayong pag-iingat sa kalusugan.

Natural anyang sumulpot ang mga bagong variant kung patuloy ang transmission nito at ang pinakamabisang gawin ng lahat ay limitahan ang pagkalat nito sa pamamagitan ng pagpapalakas ng proteksyon ng mga sarili at mga establisimiyento.

Binigyang-diin ni Vergeire na dapat maintindihan ng publiko ang uri o abilidad ng virus at iwasang umasa sa pagsasawalang-bahala kung mahahawa o hindi kapag bumababa ang kaso.

Sa kabila nito, muling tiniyak ng DOH official na nananatili sa “low risk” ang healthcare utilization sa bansa at palaging handa ang gobyerno sakaling sumipa muli ang mga bagong kaso ng Covid-19.

Patay ang dalawang suspek sa Tacurong City Bus Bombing matapos makipagbarilan sa mga aarestong pulis sa Cotabato City, kahapon.

Kinilala ang mga napaslang na sina Haron Akmad Martin at asawang si Aiman Mandi Martin, na kapwa miyembro ng Dawlah Islamiyah.

Ayon kay Bangsamoro Autonomous Regional Police Director, Brig Gen. John Guyguyon, aarestuhin sana ng mga Pulis at Sundalo ang mag-asawa sa kanilang pinag-tataguan sa Purok Pinen sa Rosary Heights 6.

Gayunman, natunugan ng mga suspek ang isasagawang pag-aresto kaya’t nakipagbarilan ang mga ito sa mga otoridad.

Bukod sa pagkakasangkot ng mag-asawa sa pambobomba sa Yellow Bus Line sa Tacurong noong November 6 na ikinasawi ng isang pasahero, dawit din ang dalawa sa mga pagpapasabog sa South Seas Mall na ikinasawi ng isang menor de edad.

Samantala, batay sa nakalap na ebidensya ng mga intelligence officer ng Pulisya at Militar, may kaugnayan din sina Mandi at Martin sa Bangsamoro Islamic Freedom Fighters.

Hindi basta mabubuwag ang Research Institute for Tropical Medicine (RITM) kahit pa lumikha ng Center for Disease Control and Prevention (CDC) na isinusulong ni Pangulong Ferdinand “Bongbong” Marcos Jr.

Ito ang nilinaw ni DOH Officer-In-Charge Maria Rosario Vergeire sa kabila ng pangamba ng mga staff ng RITM na mawalan sila ng trabaho.

Magugunitang nag-protesta ang mga empleyado ng RITM laban sa inaasahan nilang pagbuwag sa nasabing institusyon upang magbigay-daan sa pagtatatag ng CDC alinsunod sa proposal sa mahigit apatnapung bills sa Kongreso.

Tiniyak ni Vergeire sa mga empleyado na wala silang dapat ipangamba dahil hindi naman mawawala ang RITM.

Sa katunayan anya ay lalo pa nilang palalakasin ang RITM. dahil isasama ito panukalang CDC na magkakaroon ng mas maraming pondo, suporta at ekspero upang makatuwang ng DOH.

Ang RITM ay mayroong mahigit 1,000 empleyado, kabilang ang mga doktor, nurse, laboratory technician at researcher.

Posible pang mag-mahal ang Suggested Retail Prices (SRP) ng Basic Necessities at Prime Commodities (BNPC).

Ipinahiwatig ni Trade secretary Alfredo Pascual na nasa 25% ng requests para sa price adjustments ang inaasahang diringgin ng DTI.

Bagaman pinag-aaralan ng DTI Consumer Protection and Advocacy Group ang petisyon para sa price hike mula sa 15 manufacturers, 55 variants naman ng stock keeping units o variants ng 20 BNPC ang inaasahang magmamahal.

Ayon kay Pascual, 1% hanggang 10% ang maaaring itaas ng presyo ng mga nasabing pangunahing bilihin.

Kabilang sa mga inaasahang magmamahal ang de latang sardinas, processed milk, kape, tinapay, instant noodles, asin, meat loaf, beef loaf, corned beef, toyo at suka.

Gayunman, hindi idinetalye ng kalihim kung kailan ipatutupad ang panibagong dagdag-presyo.

Agosto nang huling maglabas ng Suggested Retail Price ang DTI sa basic at prime commodities.