Drew Nacino

Iprinoklama na bilang panalo sa mayoralty elections sa Lungsod ng San Juan si incumbent Mayor Francis Zamora ng PDP-Laban.

Hanggang alas-11 pasado kagabi, nasa 100% na ang election returns sa San Juan, kung saan nakakuha si Zamora ng 66,883 votes habang ang kanyang kalabang si Jun Usman ng PMP ay mayroong 9,413.

Nare-elect din bilang bise alkalde si Warren Villa na mayroong 55,920 votes kumpara sa 16,608 votes ni Philip Cezar na kapartido at running mate ni Usman.

Nakakuha naman ng 49,334 votes si Atty. Bel Zamora ng PDP-Laban para sa pagka-kongresista kumpara sa 27,133 votes ni Jana Ejercito ng NPC.

Nagmistulang “Blockbuster” na pelikula ang naganap na botohan kahapon sa bansa dahil sa haba ng pila ng mga botante.

Ayon kay COMELEC Commissioner George Garcia, ang mahabang pila ay indikasyon na nais ng mga Pilipino na marinig ang kanilang mga tinig sa pamamagitan nang paglahok sa halalan.

Nagsimula ang botohan alas-6 ng umaga hanggang alas-7 ng gabi pero mag a-ala-5 pa lamang ng madaling araw ay pumila na ang mga botante.

May ilan namang nakaranas ng mga aberya, kabilang na ang problema sa Vote Counting Machines kaya’t bahagyang naantala ang botohan.

Una nang inihayag ng poll body na dahil pampanguluhan ang halalan ay inaasahan nilang magiging mataas ang voter turnout ngayong taon.

Iniimbestigahan na ng National Telecommunications Commission ang umano’y hacking ng mobile phone number ni dating MMDA Chairman Benhur Abalos na kasalukuyang campaign manager ni presidential bet Ferdinand Marcos Jr.

Ayon sa NTC, nakikipag-ugnayan na sila sa Globe Telecom na naniniwalang isang uri ng “SMS spoofing” ang naganap na hacking.

Sa isang Facebook post noong linggo, inilahad ni Abalos na na-hack ang kanyang Globe cellphone number.

Nagpapadala anya ang kanyang numero ng mga hindi kanais-nais na mensahe kaya’t nagpasaklolo siya sa globe at agad sinuspinde ang numero.

Hindi dapat ika-alarma ang mga napaulat na mga palyadong Vote Counting Machine sa halalan 2022.

Aminado si Parish Pastoral Council for Responsible Voting National Chairperson Myla Villanueva na mayroon talagang maliit na porsyento ng mga VCM na pumapalya kahit noon pang mga nakaraang eleksyon.

Bagaman mayroon anyang ilang makinang pumalya kahapon ay kaunti lamang naman ang mga ito at hindi dapat ikabahala.

51 VCM ang itinuring na depektibo habang 102 SD card ang pinalitan kumpara sa mahigit 81K makinang gumana kahapon.

Pangkalahatang naging mapayapa ang idinaos na national at local elections, kahapon.

Ito, ayon kay Interior Secretary Eduardo Año, ay sa kabila ng mga insidente ng patayan, partikular sa Ilocos Sur at Maguindanao.

Nagpapatuloy anya ang kanilang monitoring kasabay ng pagrereport ng mga pulis ng mga nagaganap sa iba’t ibang bahagi ng bansa.

Bukod pa ito sa mga isinampang kaso laban sa mga rogue political bets kahit pagkatapos ng national at local elections.

Iniimbestigahan na ng Ilocos Sur Provincial Police ang naganap na shooting incident sa bayan ng Magsingal na ikinasawi ng apat katao na pawang supporter ng ilang local candidate.

Kinilala ang mga biktimang sina Lerry Torda, kwarenta’y uno anyos ng Barangay Maratudo; Recto Bagani, 65 anyos ng Manabo, Abra; Jovito Tomaneng, 61 ng Dingras, Ilocos Norte na retiradong sundalo;

At William Bulil-Lit, 61 anyos dating barangay chairman ng Barbaquezo sa Carasi, Ilocos Norte at retiradong Cafgu Member.

Si Recto ay kabilang sa mga supporter ni Mayoralty Candidate Alrico Favis, na asawa ni Incumbent Mayor Victoria Favis ng magsingal habang si Torda ay supporter ng kalabang si Lory Salvador Junior ng kilusang bagong lipunan.

Sugatan naman sina Teofilo Taasin, 39 anyos ng Barangay Maratudo; mga suspek na sina Kenneth Salvador at Albert Bañez, na driver ni Favis at Romnick Villanueva, 25 anyos ng Barangay Patong.

Naaresto ang anim na supporter ni Favis na sina Guillermo at Agustin Unciano, Dante Tolentino, Archie Garcia, Menelio Oliver Junior na pawang taga-barangay Patong at Bañez ng Barangay San Ramon at pawang mahaharap sa kasong murder at frustrated murder.

Mahaharap din sa katulad na kaso ang mga supporter ni Salvador na sina Kenneth Salvador, 40 anyos ng Barangay Napo at Teofilo Taasin ng Barangay Maratudo.

Ayon kina Ilocos Sur Police Provincial Director, Col. Wilson Doromal at Ilocos Sur Provincial Election Supervisor Alipio Castillo, nag-ugat ang insidente sa alegasyon ng vote-buying noong Sabado ng umaga.

Nagtungo anila ang mga supporter ni Salvador sa Barangay Labut upang beripikahin ang umano’y vote-buying activity at kinompronta ang mga supporter ni Favis.

Narekober mula sa grupo ni Favis ang caliber 45 pistol at mga bala habang nagdagdag na ng pwersa ang pulisya at militar sa magsingal.

Samantala, nilinaw ni Castillo na hindi pa kailangang isailalim sa COMELEC control ang nasabing bayan dahil tiniyak naman ng mga otoridad na nakalatag ang lahat ng hakbang at seguridad upang maiwasan ang mga kahalintulad na insidente.

Itinanggi ng kampo ni senatorial candidate Greco Belgica ang ulat na “perpetually disqualified” na siyang humawak ng anumang pwesto sa gobyerno.

Ayon kay Atty. Melchor Jaemond Aranas, legal counsel ni Belgica, wala namang inilalabas na anumang resolusyon ang comelec upang idiskwalipika ngayong May 9 elections ang dating chairman ng Presidential Anti-Corruption Commission (PACC).

Mali at misleading anya ang media reports hinggil sa estado ng kandidatura ni Belgica at nakabinbin pa rin ang kasong inihain laban sa kanya sa poll body.

Binigyang-diin ni Aranas na nakapagsumite naman ang dating PACC Official ng Statement of Contributions and Expenditures nito nang tumakbo rin sa pagka-senador noon namang 2013.

Umaabot na umano sa 3,000 hanggang 5,000 pesos ang  bilihan ng boto sa Bacolod City, Negros Occidental batay sa mga natanggap na alegasyon at ulat ng Commission on Elections (COMELEC).

Nilinaw ni Bacolod City Election Officer, Atty. Revo Sorbito na aaksyon lamang ang COMELEC sa sandaling may pormal na magrereklamo at may hawak na matibay na ebidensya tulad ng video.

Ayon kay Sorbito, wala pa kahit isang complainant na lumalabas at handang magreklamo.

Tiniyak naman ni Negros Occidental Provincial Election Officer, Atty. Roberto Salazar na may mga personnel ang  PNP, AFP at NBI na sumailalim sa training upang humawak at tumulong kapag may kasong isasampa kaugnay sa vote-buying.