Angelica Doctolero

Dalawang panibagong kaso ng monkeypox o Mpox ang naitala sa Quezon City.

Ayon sa lokal na pamahalaan, ang ikalawang kaso ay isang 29-anyos na lalaki habang isang 36-anyos na lalaki naman ang ikatlong kaso ng Mpox sa lungsod.

Dagdag pa ng Quezon City LGU, kasalukuyang naka-isolate sa bahay ang dalawa at tiniyak na nakakatanggap ang mga ito ng atensyong medikal.

Kaugnay nito, nagsagawa na ng contact tracing ang Quezon City Epidemiology and Surveillance Division at mahigpit na ring binabantayan ang mga natukoy na indibidwal na na-expose sa mga pasyente.

Sa kabuuan, mayroon nang tatlong kaso ng Mpox sa Quezon City.

Sumampa na sa dalawampu ang death toll sa pananalasa ng bagyong Enteng at Habagat.

Batay sa report ng National Disaster Risk Reduction and Management Council, umabot na sa labingwalo ang bilang ng mga nasugatang indibidwal, habang dalawampu’t anim naman ang napaulat na nawawala.

Sa ngayon ay umabot na sa mahigit 2.3 million individuals ang naapektuhan ng bagyong Enteng at Habagat, kung saan, mahigit 34,000 katao ang nananatili sa mga evacuation center.

Samantala, tatlumpu’t siyam na mga lugar na ang nagdeklara ng state of calamity, kung saan, tatlumpu’t pito sa nasabing bilang ay mula sa Region 5, habang tig-isa naman sa CALABARZON at Region 8.

Ligtas nang kainin ang mga isda at iba pang lamang-dagat sa limang coastal areas sa Cavite, na naapektuhan ng oil spill sa Limay, Bataan.

Ayon sa Bureau of Fisheries and Aquatic Resources, ligtas na ang mga nakuhang samples mula sa Bacoor City, Cavite City, Noveleta, Rosario, at Tanza, batay sa mga isinagawang monitoring activities at analysis.

Nananatili ring ligtas para sa human consumption ang mga isda at iba pang lamang-dagat sa Bataan, Bulacan, Pampanga, Batangas, at Metro Manila, gayundin sa mga bayan ng Naic, Ternate, Kawit, at Maragondon.

Una nang sinabi ng BFAR na umabot na sa P350-M ang halaga ng pinsala ng oil spill, na nakaapekto sa mahigit 46,000 na mangingisda sa Central Luzon, Region 4-A, at National Capital Region.

Humiling na ang Department of Justice ng Blue Notice sa International Criminal Police Organization o Interpol upang mapabilis ang paghahanap kay dismissed Bamban, Tarlac Mayor Alice Guo.

Ayon kay Justice Undersecretary Jesse Andres, sa pamamagitan ng Blue Notice, ma-oobliga ang mga bansang posibleng puntahan ng dating alkalde na magbigay sa kanila ng impormasyon kaugnay sa kinaroroonan nito.

Sa oras na matapos ang preliminary investigation sa iba pang mga kaso ni Guo, at maisampa ito sa korte, susunod namang hihilingin ng DOJ ang Red Notice sa Interpol .

Samantala, sinabi naman ni Justice Undersecretary Nicholas Felix Ty na batay sa kanilang impormasyon, nananatili pa rin sa Jakarta, Indonesia ang sinibak na alkalde ng Bamban.

Dagdag pa ni Usec. Ty, patuloy na nakikipag-ugnayan ang kanilang mga tauhan sa Immigration ng Indonesia.

Aabot sa 850 PDLs ang napalaya ng Bureau of Corrections mula noong July 19 hanggang kahapon, August 30.

Sa nasabing bilang, 146 ang napalaya dahil sa acquittal, 487 ang may expiration ng maximum sentence na may good conduct time allowance, 28 para sa expiration ng maximum sentence at 18 naman ang nabigyan ng probation.

Dahil dito, umabot na sa 15,943 ang kabuuang PDLs na napalaya sa ilalim ng administrasyong Marcos.

Inaprubahan ng House Committee on Economic Affairs ang House Bill No. 7750 o ang Daylight Saving Time Act.

Sa ilalim ng nasabing panukala, bibigyan ng kapangyarihan ang presidente na i-advance ng isang oras ang Philippine Standard Time sa unang anim na buwan ng taon; at nakatakda naman itong ibalik sa dating oras sa huling bahagi ng taon.

Layunin nito na gawing mas maging produktibo ang labor at educational sector, partikular sa mga panahong nagagambala ang oras ng pasok tuwing panahon ng tag-ulan.

Sinimulan ang expo kaninang alas-diyes ng umaga kung  saan, pinangunahan ni Founding Chairman Joseph Ang. Ang ribbon cutting na sinuportahan nina Senator Imee Marcos; Pasay City Mayor Emi Calixto-Rubiano; Usec. Joee Guilas ng Office of the Special Assistant to the President for Investment and Economic Affairs; mga Manufacturer at iba pang stakeholders.

Nag-alay din ng production number at VIP tour sa exhibit halls ang MAFBEX para sa mga nakiisa at dumalo sa naturang event.

Ang biggest gathering event ng mafbex ay binubuo ng 600 booths at 350 exhibitors sa pakikipag-ugnayan ng mga ahensya ng gobyerno kabilang na ang Department of Agriculture; Department of Trade and Industry; Bureau of Fisheries and Aquatic Resources; DOST; at iba pang mga local manufacturer mula sa ibat-ibang rehiyon.

Makikita ang iba’t ibang plant based food o produktong gawa at nagmula sa mga local farmers na nakapokus sa  kalusugan at mas ligtas na pagkain.

Sa naging pahayag ni Sen. Marcos, ang adbokasiya ng MAFBEX na maghatid ng magandang produksiyon ng pagkain  ang isa sa solusyon sa food crisis at inflation ng bansa.

Pinasalamatan din ng senadora ang MAFBEX sa paghahatid ng mas maraming lokal na produksiyon mula sa mga lalawigan patungo ss Metro Manila na makakapaghikayat sa mga investor na tangkilikin ang mga local products upang mas lalo tumaas ang ekonomiya ng bansa.