“Ganun niya ako kamahal na paggising sa umaga, ako ang naalala niya.”
Ito ang naging pahayag ni Senador Alan Peter Cayetano bilang tugon sa sunod-sunod na pahayag ni Senador Panfilo “Ping” Lacson kaugnay ng umano’y anomalya sa mga flood control project sa Taguig City.
Ayon kay Cayetano, handa siyang sagutin ang lahat ng alegasyon laban sa kanya. Gayunman, hinamon niya si Lacson na ilahad nang buo ang mga detalye at ebidensiya ng mga paratang.
Sinabi rin ng dating Senate President na mula nang bumalik siya sa Senado noong Mayo 11, inaasahan na niyang haharap siya sa iba’t ibang isyu at batikos. Aniya, ikinagulat lamang niya na ang mga alegasyon ay nagmumula pa sa isang beteranong senador.
Binigyang-diin din ni Cayetano na wala siyang direktang papel sa mga proyekto ng Department of Public Works and Highways (DPWH) dahil hindi siya kalihim, regional director, o engineer ng ahensya.
Kaugnay naman ng umano’y ₱6 milyong budget insertion, sinabi ni Cayetano na sasagutin niya ito sa tamang forum at sa tamang panahon.
Hiniling din niya na ilahad nang malinaw ang eksaktong proyekto, halaga, at iba pang detalye upang mabigyan niya ng maayos na tugon ang mga alegasyon.
Dagdag pa ng senador, matapos ang State of the Nation Address (SONA) at Contra-SONA, maaari nang pagtuunan ng pansin ang mga usapin hinggil sa impeachment at mga alegasyon ng katiwalian.—ulat mula kay Jenn Patrolla (Patrol 38)
