Angelica Doctolero

Naghahanap ka rin ba ng trabaho kung saan hindi mo kakailanganing mag-effort at mapagod pero makakatanggap ka ng sweldo? Tila imposible pero mayroong teacher sa Germany na labinganim na taon nang hindi pumapasok sa trabaho pero nakakatanggap pa rin ng sahod.

Kung paano nga ba ito nangyari? Eto.

Public servants kung ituring ang mga teacher sa Germany kung kaya nakakatanggap ang mga ito ng mga benefits katulad ng pagtanggap ng sahod kahit na mag-file pa ang mga ito ng indefinite sick leave.

Kagaya na lang ng hindi pinangalanang teacher mula sa North Rhine-Westphalia na 16 years nang hindi pumapasok sa pinagtatrabahuhan nitong eskwelahan sa Wesel dahil naka-sick leave ito. Pero ang teacher, natatanggap pa rin nang buo ang kaniyang sahod.

Ayon sa local newspaper, maaaring kumita ng $7,200 o mahigit P400,000 ang mga teacher sa North Rhine-Westphalia. Kung susumahin, $1.1 million ang kinita nito sa loob ng labinganim na taon na hindi nito pagtatrabaho, o tumataginting na P67 million.

Napag-usapan lang ang sitwasyon ng nasabing teacher nang magpalit ng liderato sa kanilang eskwelahan at nire-require ito na sumailalim sa isang medical examination na patunayan na mayroon itong sakit.

Base naman sa isinagawang internal audit ng eskwelahan, lumabas na nagpapasa ng medical certificate ang guro kada buwan kahit na hindi pa nasusuri ng doktor ang kaniyang kalagayan. Hinihinala rin na nagtayo umano ito ng medical startup habang naka-sick leave.

Bilang tugon sa requirement ng paaralan, nagsampa ng kaso ang teacher laban sa kaniyang employer pero tinabla lang ito ng korte dahil may karapatan umano ang employer na manghingi ng dokumento na magpapatunay sa matagal na pag-absent ng kanilang empleyado.

Samantala, inatasan na ng korte ang teacher na magbayad ng legal fees na nagkakahalaga ng halos p179,000 at maaari ring matanggal bilang isang civil servant.

Ikaw, ginagamit mo ba sa tamang paraan ang paid leaves mo sa trabaho?

Kadalasan ay pinag-iisipang maigi ng ibang tao ang pagkuha ng credit card dahil sa takot na mabaon sa utang kapag hindi ito nagamit nang tama. Pero ang lalaking ito sa India, walang takot sa pagkaskas ng credit card. Dahil sa pagiging active user nito, makailang beses na itong nakalibre dahil sa exclusive privileges na dala ng mga credit card.

Kung paano minamanage ng lalaki ang kaniyang expenses, eto.

Ginagamit ng marami ang credit card para sa kanilang big purchases o kung mayroon silang nais bilhin na hindi pa nila afford bayaran ng cash.

Nagdadalawang-isip din ang iba sa paga-apply para makakuha ng credit card dahil sa takot na magamit ito sa maling paraan at mauwi sa pagkakalubog sa utang.

Pero ibahin niyo si Manish Dhameja na nagmula sa Hyderabad, Talengana, India na hindi alintana ang utang na magiging resulta ng palagian niyang pagkaskas ng kaniyang credit cards, lalo na at mayroon itong kalakip na benepisyo.

Maniniwala ka ba na dahil sa aktibong paggamit sa mga credit card ay maaari kang makalibre at makatipid? Katulad ni manish na ilang beses nang nakatanggap ng complementary flight tickets, libreng access sa airport lounge, hotel vouchers, shopping vouchers at marami pang iba.

Sa katunayan, nakaligtas din si Manish mula sa pagpila sa bangko para mag-abang sa paglabas ng bagong banknotes sa India noong 2016 matapos tanggalan ng gobyerno ng bisa o halaga ang lahat ng 500 at 1000 Indian rupees mula sa Mahatma Ghandi Series.

Ito’y dahil sa maagang pag-adopt at pagtangkilik ni Manish sa digital money o cashless transactions. Aniya pa nga, hindi kumpleto ang buhay niya kung wala siyang credit cards.

Dahil dito, pinarangalan si Manish ng Guinness World Record noong 2021 ng largest collection of valid credit cards. Partida, kahit na umabot ng 1,638 ang mga credit card ni Manish, namumuhay ito nang walang utang dahil on time siyang magbayad ng bill.

Ang kwento na ito Manish, isang halimbawa at paalala na hindi dapat katakutan ang paggamit ng credit card. Ang tunay na dapat mong katakutan ang sarili mo na lalo na kung wala kang kontrol sa pagiging gastador.

Ikaw, on time ka ba magbayad ng credit card bill mo o naaaligaga ka na ngayon dahil sa patung-patong na utang?

Nagiging insecurity para sa ilan, partikular na sa mga kalalakihan, ang pagiging maliit dahil naaapektuhan nito ang kanilang self-confidence. Pero ang teenager na ito sa China, nabigyan ng pagkakataon na tumangkad sa pamamagitan ng pagbabayad ng treatments. Pero dalawang linggo lang ang lumipas, bumalik din ang dati nitong height.

Talaga nga bang wala nang tyansa na tumangkad pa ang isang tao o sadyang hindi lang epektibo sa bata ang treatment? Ang katotohanan, eto.

Pebrero ngayong taon nang sumailalim ang 16-year-old na lalaki mula sa China sa body lengthening treatment para pataasin pa ang kaniyang height na 165 centimeters o 5 flat 5 inches.

Anim na buwan ang itinagal ng treatment sessions, at pagdating ng august, nadagdagan ng 1.4 centimeters ang height ng binata at naging 166.4 centimeters na.

Ayon sa ulat, linggo-linggong sinasamahan ng tatay ang kaniyang anak sa ospital para sa treatment. Pero nang hindi ito nakapunta sa loob ng dalawang linggo, bigla na lang bumalik ang dating height ng binatilyo.

Dahil dito, agad na nagtungo ang tatay sa ospital para magreklamo. Ang ospital, ibinalik ang pera na ibinayad ng mag-ama.

Inamin din nito na hindi na tatalab ang treatment dahil hindi na pala angkop ang edad ng binata para rito. Ikinadismaya naman ito ng tatay dahil hindi man lang sila inabisuhan ng ospital bago pa nagsimula ang sessions.

Ayon sa ospital, ang mga buto sa tuhod ng mga pasyente ang tinatarget ng treatment, lalo na at kabilang dito ang stretching.

Pero ayon sa endocrinologist mula sa Peking Union Medical College Hostpital na si Wu Xueyuan, maaaring makatulong ang pagse-stretching para tumangkad ang isang tao pero hindi ito permanente.

Samantala, nilinaw niya na walang scientific proof na nakakapagpatangkad ang pwersahang pagii-stretch ng mga buto. Dagdag pa ni Wu, habang bata pa ay matulog na sa tamang oras at mag-exercise para sa mas mataas na tyansa na tumangkad sa pagtanda.

Ikaw, insecurity mo ba ang height mo? Kung ganon, gagawan mo pa ba ito ng paraan o tatanggapin mo na lang talaga?

Kung nawawalan ka na ng pag-asa sa buhay, pakinggan mo ang kwento ng isang lalaki sa Japan na hindi nagpatinag sa panahon at hindi tumigil sa paghahanap sa nawawala niyang misis na biktima ng tsunami 14 na taon na ang nakararaan. Sa dedikasyon ng lalaki na muling makita ang kaniyang asawa, nag-aral pa ito kung paano mag-dive.

Ang kwento ng nangungulilang mister, eto.

Nagtatrabaho noon sa isang bangko sa Onagawa, Japan ang misis ni Yasuo Takamatsu na si Yuko nang tumama sa bansa ang malaking tsunami noong march 11, 2011 kung saan mahigit 2,000 katawan ang hindi pa rin natatagpuan.

Nang mangyari ang trahedya, umakyat si Yuko kasama ang mga katrabaho niya sa pinakatutok ng kanilang building na may taas na 30 feet.

Sa kasamaang palad, umabot ng 60 feet ang tsunami na siyang naging dahilan ng pagkawala ni Yuko.

Ika nga nila, kapag nawalan ka ng mahal sa buhay, kahit kailan ay hindi ka makaka-move on at ang tanging magagawa mo na lang ay ang magpatuloy.

Pero ang mister ni Yuko na si Yasuo, nagpatuloy sa kaniyang buhay habang bitbit pa rin ang pag-asa na matatagpuan niya ang kaniyang asawa kahit na 14 na taon na ang nakalilipas nang tangayin ito ng tsunami.

Dahil sa kagustuhan na mabigyan ang kaniyang misis ng maayos at pormal na libing, nag-aral si Yasuo kung paano mag-dive at mahigit isandaang beses nang sinuong ang dagat ng Fukushima.

Gayunpaman, hindi sinukuan at hindi alintana ni Yasuo ang malamig na tubig ng dagat dahil aniya, nararamdaman niya na mas malapit siya sa nawawala niyang asawa habang nasa dagat siya.

Ikaw, sa paanong paraan mo ipapakita ang pagmamahal at pagresepto mo sa partner mo kapag hindi mo siya kasama?

Ika nga nila, hindi mo kasambahay ang asawa mo, kaya hindi mo dapat iasa rito ang lahat ng gawaing bahay. Kung kaya nga ang misis na ito mula sa Atlanta, sinisingil ang kaniyang asawa sa tuwing nakakalimot ito sa nakatoka sa kaniya na gawaing bahay.

Kung gaano na nga ba kalaki ang binayaran ng makalat na mister, eto.

Nagiging mitsa ng pagtatalo ng mga mag-asawa ang pagiging tamad sa gawaing bahay at pagiging makalat sa gamit. Pero ang mautak na misis na si Jess mula sa atlanta, nakaisip ng magandang strategy para pakilusin ang kaniyang mister na si DJ sa loob ng kanilang bahay.

Kada linggo, nagsasalitan ang mag-asawa sa mga house chores na nakatoka sa kanila sa loob ng pitong araw, at kapag nakalimot si DJ sa mga trabahong naka-assign sa kaniya, binibilang ito ni Jess at pinepresyuhan.

Ang halaga kasi ng bawat atraso ni DJ, nakadepende sa level ng inis na mararamdaman ng kaniyang misis.

Halimbawa, kinakailangan ni DJ magbayad ng $5 o P290 sa tuwing makakalimutan nito na takpan ang toothpaste. Kapag nakalimutan naman nitong maglaba ay mahigit P500 hanggang P1000 ang multa nito.

Sa ganitong strategy, nagagawa ring kumita ni Jess dahil ginagamit niya ang monthly fine ni DJ para i-spoil ang kaniyang sarili o idinadagdag sa kaniyang savings.

Ayon naman kay DJ, pabor sa kaniya ang sistema na ipinatupad ni Jess sa kanilang bahay. Hindi na kasi kinakailangan pang sumigaw ng kaniyang misis para manermon, habang ang kailangan na lang gawin ni DJ ay pagbayaran ang pagiging makakalimutin niya sa gawaing bahay.

Pero paglilinaw ni DJ, hindi niya sinasadya na hindi kumilos sa bahay, sadyang hindi lang daw talaga gaanong masinop. Sinabi niya rin sa isang pahayag na ang strategy na ito ay ang paraan nilang mag-asawa para panatilihin ang kapayapaan sa kanilang bahay.

Sa mga may asawa diyan, anong strategy ang ginagawa niyo para siguraduhin na pareho kayong kumikilos para sa kaayusan ng bahay at buhay niyo?

Kagaya sa pelikula, nagpupunta ang bida sa simbahan para ipagdasal na magkaroon na siya ng lovelife. Pero ang bagong kasal na ito, literal na answered prayer ang isa’t isa dahil sa simbahan lang naman sila nagkakilala bilang isang madre at seminarista.

Kung paano nga ba nabuo ang pagmamahalan nila sa simbahan, eto.

Nagsilbi noon bilang misyonero sa isang Catholic Church sa Brazil si Lais Dognini bago pumasok sa Carmelite Convent para maging madre.

Pero bago maging isang ganap na madre, nakilala ni Lais sa simbahan ang seminarista na si Jackson at madalas na nakakasalamuha ito noon ngunit ni minsan ay hindi sila nagkausap.

Makalipas lang ang dalawang taon, kinailangang umuwi ni lais para magpahinga matapos makaranas ng dysthymia o mild, long-lasting form of depression.

Nang mabalitaan ito ni Jackson ay nagpadala ito ng mensahe kay Lais at sinabi na ipagdarasal niya ang paggaling nito. Simula nito, palagian nang nag-usap ang dalawa at naging magkaibigan.

Matapos pag-isipan nang maigi ang kaniyang bokasyon, si Jackson, lumabas ng seminaryo. Habang si Lais naman ay naging social media influencer.

Ang pagkakaibigan ng dalawa, nauwi sa pagmamahalan at naging opisyal na magkasintahan noong april 2024. Noong una ay itinago pa ng dalawa ang kanilang relasyon pero tuluyan din nila itong ibinahagi sa social media matapos magpakasal.

Samantala, namumuhay ngayon bilang mag-asawa ang dalawa sa Jaragua Do Sul, Brazil kung saan nagtuturo si Jackson ng philosophy.

Ikaw, dumating na rin ba ang answered prayer mo?

Ika nga ng matatanda sa mga estudyante, maghanap ng inspirasyon para magkaroon ng motibasyon na mag-aral. Pero sa kwentong ito, baliktad ata ang nangyari dahil tila mga nanay ng mga estudyante ang nai-inspire dahil sa gwapong swimming coach ng kanilang mga anak.

Excited na ba kayong makita ang taglay na kagwapuhan ng coach? Eto.

Viral sa social media ang videos at pictures ng kinakikiligan ngayon na batang coach mula sa Zhejiang, China na nagtuturo sa Hangzhou Chenjinglun Sports school ng swimming lessons sa mga batang nasa edad 4-5 years old.

Dahil sa kasikatan ng binatilyo, mabilis na nahanap ng mga netizen ang kaniyang social media accounts at doon nadiskubre na ang apelyido pala nito ay Chen.

Dahil mestisuhin, maamo ang mukha, matangos ang ilong, matangkad, at may magandang physique, pati tuloy ang mga nanay ng mga estudyante ni chen ay kinikilig sa kaniya.

Sa katunayan, ang mga nanay na ito ang dahilan kung bakit trending sa social media ang lalaki. Dahil pa nga rito ay dumami umano ang enrollees sa kaniyang swimming lessons. take note, pati ang mga nanay, interesado na rin magpaturo lumangoy.

Napag-alaman din mula sa mga nanay na part-time junior swimming coach si Chen at kaga-graduate lang ng high school.

Samantala, nagpasalamat naman si Chen sa mga tagahanga niya pero humiling ito na respetuhin ang kaniyang privacy, lalo na at tinatadtad siya ng mga ito ng messages sa social media.

Aniya pa, mapipilitan siyang i-deactivate ang kaniyang accounts kapag patuloy pa ring nangulit ang kaniyang supporters dahil naaapektuhan na umano ang kaniyang pang araw-araw na buhay.

Ikaw, willing ka rin bang gumastos at maglaan ng oras para lang masilayan ang crush mo?

Ika nga sa isang kanta, money can’t buy us happiness. Napatunayan ‘yan nang ma-reject ang wedding proposal ng isang Chinese man matapos niyang subukang mapa-oo ang isang babae gamit ang kaniyang kayamanan.

Kung paano nga ba nag-propose ang nagwala na lalaki, eto.

Pinagkagastusan at pinaghandaang maigi ng isang hindi pinangalanang lalaki ang isinagawa niyang wedding proposal sa Wanda Plaza Shopping Complex na matatagpuan sa Changsha, Hunan Province para sa isang babae.

Bukod sa mga lobo at bouquet of roses na madalas ginagawang props sa mga wedding proposal, bumili pa ng mamahaling sports car ang lalaki dahil paborito umano ito ng babae.

Sa isang viral video, makikita ang napakaraming tao na nakapaligid at naghihintay na masaksihan ang isa sanang happy ending.

Pero ang babae, ginulat ang lahat nang tumanggi ito sa kabila ng magarbong efforts ng lalaki.

Habang sinusubukan ng lalaki na baguhin ang isip ng babae, sumingit pa ang isa sa mga kaibigan nito at ginamit pang suhol ang magarang sasakyan.

Dahil sa depserasyon na kumbinsihin ang babae, iniyabang na nito na marami siyang pera at kayang-kaya umano niyang bilhan ito ng mas marami pang sasakyan.

Sa inis ng babae, sinabi nito na wala siyang pakialam sa pera ng lalaki bago nag-walkout.

Ang isa sanang romantic na eksena, nauwi sa pagta-tantrums ng lalaki. dahil hindi matanggap ang rejection, ibinaling nito ang inis sa mga taong nanonood at ibinato pa ang malaking bouquet sa babaeng nagvi-video sa kaniya.

Pinagsisipa rin nito ang mga naka-display na paninda sa nasabing pamilihan habang pilit na inaawat ng mga kaibigan na tumulong sa kaniya sa proposal.

Samantala, ilang commentators naman ang sumangayon sa ginawang pangre-reject ng babae, habang naniniwala naman ang iba na acting lang ang wedding proposal.

Sa mga babae diyan, wag magpapasilaw sa mga materyal na bagay na kayang ibigay ng isang lalaki. tandaan, future mo ang pinag-uusapan dito. no refund, no exchange.

Sabi nga nila, iba ang pagmamahal ng mga lolo at lola sa kanilang mga apo kumpara sa pagmamahal nila sa sarili nilang mga anak. Katulad na lang ng lolo na ito mula sa France na sinira ang malinis niyang record at napilitang gumawa ng krimen para makulong at mai-rescue ang apo nito na nakakaranas umano ng pang-aabuso sa loob ng bilangguan.

Kung matagumpay nga bang nakapasok ang lolo sa kulungan, eto.

Isang araw, nagpunta ang hindi pinangalanang 60-anyos na dating bumbero sa isang supermarket na matatagpuan sa Sainte-Rose, France, hindi para mag-grocery kundi para magnakaw.

May takip ang mukha at bitbit ang isang baril, pinasok ng nasabing lolo ang grocery store at nilimas ang lahat ng laman ng cash register. Pero ang totoo, hindi ito interesado sa pera.

Ayon sa ulat, hindi nagtagal ay agad ding naaresto ang matanda habang mabagal itong naglalakad pabalik sa kaniyang sasakyan. idagdag pa na malapit lang sa police station ang ninakawan nitong grocery.

sa isang pahayag naman sinabi ng abogado nito na si Lea Le Chevillier na desperado ang matanda na makita ang nakakulong nitong apo.

Kung bakit pursigido ang lolo na matulungan ang kaniyang apo? Ito ay dahil minsanang nakita ng lolo ang kaniyang apo sa visiting room sa kulungan na nagtamo ng damage sa ngipin matapos pagsamantalahan ng kapwa nitong preso.

Sa huli, inamin ng matanda sa korte ang ginawa nitong krimen ngunit hindi ito hinatulan ng anumang kaparusahan dahil nagawa lang umano ito ng lolo dahil sa desperasyon.

Sa halip, ipinagbawal na itong magpunta sa grocery store at pinagbabayad lang ito ng kompensasyon sa ninakaw nitong pera.

Gayunman, nakatakdang sumailalim ang lolo sa psychological treatment at sa kabutihang palad ay hindi ito tinanggalan ng karapatan na malayang bisitahin ang kaniyang apo sa bilangguan.

Ikaw, kaya mo rin bang labagin at kalabanin ang batas para maprotektahan ang mga mahal mo sa buhay?

Bukod sa mismong estudyante, nalulungkot din ang mga magulang kapag mababa ang nakukuhang grades ng kanilang mga anak dahil sa takot na tuluyan itong bumagsak. Katulad na lang ng tatay na ito sa China na hindi napigilang maiyak matapos bumagsak sa math exam ang kaniyang anak.

Kung naiyak nga ba ang tatay dahil lang sa mababa nitong score? O dahil siya ang nagturo rito? alamin.

Nag-trending sa Chinese social media platform ang isang tatay mula sa Zhengzhou, Henan province matapos kumalat ang video nito na umiiyak dahil sa kaniyang anak. Maririnig pa na tinatawanan ito ng kaniyang asawa nang sabihin nito na wala na siyang pakialam dahil nasayang ang efforts niya.

Ayon sa mga ulat, walang sinayang na oras ang ma-effort na tatay dahil sa loob ng isang taon, araw niyang tinututor ang kaniyang anak.

Nagpupuyat pa umano ito para lang makasigurado na makakapasa ang bata sa exam.

Pero wala nang nagawa ang pagod na tatay nang makita ang scorecard ng kaniyang anak kung saan makikita ang lumalagapak na score nito sa math examination na 6/100.

Ang mas nakakaiyak pa sa kwento na ito ay bumaba lang ang scores ng bata matapos itong turuan ng kaniyang tatay. Dati naman kasi, nagagawa nitong maka-score ng 40, 50, at minsan pang nakakuha ng 90.

Samantala, hindi naman naiwasan ng mga online netizen na kwestyunin ang teaching skills ng tatay at sinabi pa na baka hindi ito magaling sa math kaya bumagsak ang kaniyang anak.

Habang ang pinaalala naman ng iba na grades are just numbers at hindi mangangahulugan na papalpak na sa buhay ang isang tao kapag nakakuha ito ng mababang grado.

Sa mga magulang diyan, huwag masyadong mahigpit at hayaan ang mga anak na matuto sa paraan na komportable sila. Habang kayo naman ay dapat ding matuto na pagkatiwalaan ang kakayahan ng inyong mga anak.