Angelica Doctolero

Isang menor de edad ang ipinagpilitang ipagkasundo ng kaniyang ama sa isang babae para ipakasal, pero ang totoo, mayroon palang pailalim na pinaplano ang kaniyang tatay, at yan ay ang pakikipagtanan sa kaniyang fiancee.

Ang kwento ng pamilya, eto.

Ipinagkasundo mismo ng 55-anyos na si Shakeel mula sa Uttar Pradesh, India ang kaniyang 15-anyos na anak na si Aman sa 22-anyos na si Ayesha ngunit tinutulan ito ng kaniyang misis na si Shabbana dahil sa usaping pera.

Pero si shakeel, itinuloy pa rin ang engagement ng dalawa, at sa halip na hayaan ang mga ito na ayusin at paghandaan ang kanilang kasal, si Shakeel pa mismo ang bumibisita kay Ayesha para asikasuhin ang wedding preparations.

Dahil dito, unit-unting nagsuspetya si Shabbana na mayroong ginagawang kalokohan ang kaniyang mister. Sa tulong ng kaniyang anak na si Aman at ang iba pang mga proweba katulad ng video calls at intimate photos ni Shakeel at Ayesha, nakumpirma na mayroon ngang relasyon ang mga ito.

Bagama’t makailang ulit niya itong binanggit sa asawa, verbal at pisikal na pananakit lang ang ibinalik nito sa kaniya. Habang si Aman naman, nagdesisyon na huwag nang ituloy ang kasal.

Matapos nito ay nagtungo naman si Shakeel sa delhi para umano sa trabaho, pero nagulantang na lang ang kaniyang pamilya nang ibalita nito na ikinasal na siya kay Ayesha.

Nagpatung-patong ang kasalanan at sakit na ibinigay ni Shakeel sa kaniyang pamilya dahil bukod sa panloloko at biglaang pang-iiwan niya sa mga ito, bitbit niya ang mga alahas at family savings nang makipagtanan siya kay Ayesha.

Samantala, bagama’t legal sa India ang pagkakaroon ng mga lalaki ng apat na asawa, maaari naman itong maharap sa kasong theft ngunit wala pa umanong isinasampang reklamo laban sa lalaki, ayon sa mga pulis.

Sa mga hindi marunong makuntento diyan, huwag na huwag magco-commit sa isang relasyon kung hindi ka pa naman pala desidido na maging kuntento.

Mahirap, matrabaho, at magastos ang magsimula ng negosyo. Kaya ang gym owner na ito sa Bangladesh, hindi pumayag na maisahan nang mahuli niya ang tangkang pagnanakaw ng equipment ng isang kawatan. Sa halip na ipapulis, pinag-workout niya ito nang libre… hanggang sa maiyak na ito sa sobrang pananakit ng katawan.

Ang kinahinatnan ng umiyak na kawatan, eto.

Madalas tayong makakita sa social media ng videos o pictures ng mga gym rat o ‘yung mga aktibo sa pag gy-gym at fini-flex ang kanilang progress at pinaghirapang figure.

Pero ang viral video na ito sa Kutupalong Power Gym Centre sa Bangladesh, hindi kinuhanan para mag-flex ng katawan, kundi para ipakita kung paano pinarusahan ang kawatan na nagtangkang magnakaw ng mga equipment.

Inabutan na lang ng owner na si abdullah al mamun na magulo at nawawala na ang ilang equipment sa kaniyang gym sa Cox’s Bazaar at nadiskubre sa pamamagitan ng CCTV na nilooban pala ito ng isang lalaki.

Natukoy at natagpuan ang suspek sa tulong ng mga parokyano sa gym pero sa halip na isumbong ito sa mga pulis at ipahuli, dinala nila ito sa gym at pinag-workout.

Ayon sa owner, pinagsabihan niya ang mga gym-goers na huwag sasaktan ang suspek, kaya pinag-workout na lang nila ito at pinag-bench press, squat, push-up, leg press, pull-up, at chest press.

Sa video, makikita kung paano nahirapan ang suspek at namilipit sa sakit ng katawan habang ginagawa ang routine nang nakasuot ng polo shirt at maong na pantalon.

Nakuhanan din na halos hindi na maiangat ng lalaki ang kaniyang sarili habang nagpu-push up at sumesenyas sa lalaking nagvi-video sa kaniya na hindi na niya kayang ipagpatuloy ang page-exercise.
Pagkatapos nito ay mangiyak-ngiyak ang susppek at halos hindi na maituwid ang kaniyang mga binti habang naglalakad, pero ayon sa mga ulat, nagawa pa nitong tumakas at umamin na nagtangka itong magnakaw para sa kaniyang pagdo-droga.

Samantala, hati naman ang naging opinyon ng mga netizen online. Kung ang iba ay tinawag na creative at hindi bayolente ang ipinataw na parusa sa kawatan, pero ang iba ay hindi ito ikinatuwa at sinabing hayaan ang mga otoridad na magbigay ng karamparang parusa rito.

Sa mga gym rat diyan, ano ang opinyon niyo sa video na ito? Sa palagay niyo, ilang linggo bago makaka-recover ang suspek mula sa intense workout na ito?

Kilala naman nating lahat ang Japan dahil sa nakakabilib nitong innovations at advanced technology. Pero maniniwala ka ba na mayroon ding services sa bansa kung saan maaaring mag-renta ng mga tao? Kung namimiss mo ang presensya ng lola mo o namimiss mo na ang luto niya, pwede kang magrenta sa kumpanya na ito.

Kung anong kumpanya ang nakaisip ng matalinong ideya na ito, eto.

Taong 2010 nang i-launch ang Japanese company na Client Services kung saan ino-offer ang sandamakmak na serbisyo katulad ng cooking, cleaning, at babysitting.

Pero ang pinaka mabenta sa lahat ay ang Ok Oppa-Chan o Ok Grandma kung saan maaaring magrenta ang mga kliyente ng lola sa halagang 3,300 yen o 1,265 pesos per hour.

Ang siste, kailangan lang sabihin ng kliyente kung ano ang dahilan niya para magrenta. Isa sa dahilan ng mga kliyente ay kinulang ito ng bisita sa kaniyang kasal, habang ang isa naman ay kinailangan ng chaperone para makipag-break sa kaniyang boyfriend.

Mahigit isandaang senior citizens ang nagtatrabaho sa Client Sevrices. Bagama’t may katandaan na ang mga ito, siguradong subok na ang kaalaman at karanasan nila sa buhay, at naniniwala rin ang mga ito na marami pa silang maiaambag, maitutulong, at maituturo sa mga kliyenteng nangangailangan.

Samantala, ang kumpanya na mismo ang pipili ng lola na ia-assign sa bawat kliyente depende sa kanilang pangangailangan. Bukod sa paunang bayad, sagot na ng kliyente ang budget ng mga lola katulad ng pamasahe at anupamang gastusin.

Sa mga maka-lola diyan, namimiss mo na ba ang lola mo? Kung ganon, interesado ka ba sa offer na ito para mapunan ang pangungulila?

Kung mayroon kang fur babies, makinig ka sa kwentong ito. Ang isang babae kasi mula sa Pennsylvania, hindi inaasahan na magkakaroon pa sila ng reunion ng kaniyang childhood pet makalipas ang pitong taon matapos niyang mag-ampon ng aso.

Kung paano muling nagkita ang babae at ang kaniyang best friend, eto.

Hindi maiiwasan ng mga aso na gumawa ng ingay at magkalat sa loob ng bahay, at dahil naka-work from home ang tatay ng babae mula sa Pennsylvania na noo’y 14-anyos lang si Nicole Grimes, nadi-distract ito sa alaga niyang aso na si Chloe.

Wala nang nagawa si Nicole at napilitang i-surrender na lang ang kaniyang alaga sa Washington Area Humane Society para ipa-rehome.

Pagkalipas ng pitong taon, habang kaswal na nagso-scroll sa social media ay nakita ni Nicole ang post ng kaniyang friend kung saan naghahanap ito ng bagong mag-aalaga sa senior dog nito.

Walang pagdadalawang-isip na in-adopt ni Nicole ang aso lalo na at napansin niya ang pagkakahawig nito sa kaniyang childhood pet na si Chloe.

Nang tuluyang mapunta sa pangangalaga ni Nicole ang aso, unti-unti itong naghinala na ang 11-year-old na si Chloe at ang alaga niya sa pagkabata ay iisa, lalo na at kung umakto ang aso ay tila matagal na itong sanay sa presensya ni Nicole.

At nang dalhin niya ito sa veterinary clinic, nakumpirma niya sa pamamagitan ng number sa microchip nito na ito ang asong napilitan siyang i-let go noon.

Si Nicole, hindi lubos akalain na muli niya pang makakasama ang minamahal niyang aso. Sinabi niya na inakala niyang hindi niya na ito makikita pang muli, kung kaya pakiramdam niya ay nanalo siya sa lotto nang mabigyan siya ng ikalawang pagkakataon na makasama at alagaan ito.
Sa mga fur parents diyan, pwede niyo bang i-share ang kakatwang kwento nang una niyong na-meet ang mga alaga niyong pusa at aso?

Literal na caught on cam ang isang CEO at isang empleyado matapos mahuling nanonood ng concert nang magkasama at sweet na sweet pa sa isa’t isa. Sa halip na mag-enjoy, nag-viral ang mga ito at naakusahan pa ng cheating.

Kung ano ang mga sumunod na nangyari matapos ang concert, eto.

Kapag narinig mo ang mga kanta ng sikat na British band na Coldplay, baka ang una nang pumasok sa isip mo ay ang nahuling ceo at ang kayakap nitong babae sa katatapos lang na concert ng banda sa Gillette Stadium na matatagpuan sa Massachusetts.

Nakuhanan kasi ng kiss cam ang CEO ng AI-company na Astronomer na si Andy Byron na may kayakap na babae na hindi naman niya asawa. Ito ang hr head ng kumpanya na si Kristin Cabot.

Sa mga kumakalat na video online, makikita si Byron na naka-backhug kay Cabot. Kapwa komportable sa isa’t isa ang dalawa habang ineenjoy ang moment. Pero nang lumabas ang mga mukha nila sa jumbotron, agad na tumalikod si Cabot habang napaupo naman si Byron para magtago.

Dahil sa naging reaksyon ng mga ito, napa-comment ang singer ng banda na si Chris Martin at sinabing “either they’re having an affair or they’re just very shy.”

Matapos ang insidente ay napag-alaman ang pagkakakilanlan ng dalawa at nag-viral sa social media dahil sa umano’y pangangaliwa ni byron sa kaniyang misis na si Megan Kerrigan na siya namang nagtanggal ng apelido sa kaniyang social media account bago ito nag-deactivate.

Habang si cabot naman ay pinaniniwalaang kasal sa owner ng Privateer Rum na si Andy Cabot.

Samantala, maghahanap naman na ng bagong CEO ang Astronomer dahil kasunod ng mga kritisismo ay ang pagre-resign ni Byron na tinanggap naman ng board of directors.

Sa ngayon umani na ng mahigit 100 million views at mahigit 9 million likes ang viral video na nagbukas sa usapin ng kanilang mga personal na buahy.

Sa mga may asawa diyan, kumustahin niyo rin ang trabaho ng mga partner niyo at baka iba na pala ang kanilang tinatrabaho.

Bukod sa paninigurado na malinis ang mga kinakain mo, siguraduhin mo rin na malinis ang pinaglalagyan mo ng mga pagkain. Ang lalaki kasing ito, nagkaroon ng problema sa kalusugan dahil sa thermos nito na sampung taon na niyang ginagamit.

Kung paano nakaapekto ang thermos na ito, eto.

Isang hindi tukoy na lalaki mula sa Taiwan ang binawian ng buhay dahil umano sa ginagamit niyang lumang thermos, o ‘yung tumbler na may kakayahang panatilihin ang temperatura ng inumin na ilalagay dito.

Pero ayon sa reports, bago pumanaw ang lalaki ay nakaranas na ito ng problema sa kaniyang kalusugan dahil umano sa heavy metal poisoning.

Nang magsagawa ng imbestigasyon ang mga doktor, napag-alaman na gumagamit pala ang lalaki ng iisang thermos sa loob na ng sampung taon.

Nang suriin ang thermos, nadiskubre na kinakalawang na pala ang loob nito.

Bagama’t batid nito na kinakalawang na ang luma niyang thermos, nagpatuloy pa rin ang lalaki sa paglalagay ng kape, tea, at juice rito.

Ayon sa mga doktor, maaaring pumasok at na-absorb ng katawan ng lalaki ang toxins mula sa carbonated drinks na inilalagay nito sa thermos.

Sa kasamaang palad, labis nitong naapektuhan ang immune system ng lalaki bago pumanaw dahil sa pneumonia.

Nagpaalala naman ang mga eskperto na siguraduhing araw-araw nalilinisan ang ginagamit na thermos. Mainam din na alamin muna kung ang bibilhin mo bang thermos ay 304 stainless steel at palitan ito sa kada dalawa o tatlong taon.

Usong-uso pa man din ang mga tumbler ngayon! Sa mga gumagamit ng thermos diyan, sigurado ba kayo na stainless steel ang materyal niyan?

Ang maipit pa nga lang sa traffic sa loob ng limang minuto ay kayang-kaya nang painitin ang ulo mo. Pero paano kung napabilang ka sa mga motorista o commuter na naipit sa nangyaring traffic jam noon sa China na tumagal lang naman ng labindalawang araw? May magagawa ka pa ba?

Kung bakit at paano ito nangyari, eto.

Agosto noong 2010 nang magkaroon ng maintenance construction sa isang lugar sa China na inasahang matatapos pagdating ng September.

Bukod sa traffic at mga dumaraang sasakyan sa China National Highway 110, sumabay pa ang mga truck na may sakay na mga construction materials na siyang nagresulta sa matinding trapiko na umabot ng isandaang kilometro.

Isa pa man din ang Highway 110 sa mga ruta na maaring daanan patungo sa capital ng bansa.

Katulad ng tipikal na heavy traffic na nararanasan natin, nagresulta rin ito sa pagpapalitan ng busina ng mga motorista. Sa sobrang bagal ng usad ng mga sasakyan, hindi na nila namalayan na halos dalawang linggo na silang nakatengga.

Ang mga residente na naninirahan malapit sa kalsada, sinamantala at pinagkakitaan ang trapiko at nagbenta sa mga na-stuck na motorista ng mga pagkain na doble-doble ang patong.

Samantala, ang trapiko na inabot ng labindalawang araw, binansagang worst traffic jam sa history ng China.

Kung ikaw ang naipit sa heavy traffic na ito? Papatusin mo na lang din ba ang doble-presyong mga ibinebentang pagkain?

Sinong mag-aakala na nang dahil sa pagiging alerto at malakas na pagtahol ng isang maliit na aso, dalawamput dalawang pamilya ang nakaligtas mula sa malakas na pagguho ng luho na naganap kamakailan sa India?

Ang kwento ng kabayanihan ng tuta, eto.

Pasado alas dose ng madaling araw nang magising ang 6-month-old na tuta na si Rocky mula sa pagkakahimbing niya sa sahig ng kanilang bahay sa Siyathi village na matatagpuan sa Himachal Pradesh, India.

Bigla na lang kasing bumuhos ang napakalakas na ulan sa kanilang lugar kung kaya nabulabog ang pagtulog nito at nagtatahol hanggang sa magising ang kaniyang 35-anyos na amo na si Lalit Kumar.

Pagkagising ay agad na napansin ni Kumar ang malaking bitak sa pader ng kanilang bahay at ang mabilis na pagtaas ng baha sa loob nito.

Nakita ni Kumar kung paanong mabilis na gumuho ang lupa pababa sa kanilang village kung kaya agad niyang binuhat si Rocky at ginising ang kaniyang mga kaanak.

Sa isang pambihirang pagkakataon, ilang sandali lang matapos katukin ni Kumar ang mga kapitbahay para lumikas, tuluyang gumuho ang lupa na siyang sumira at tumabon sa maraming kabahayan.

Dahil sa pagiging alerto ng tuta na si Rocky, ang lahat ng animnaput tatlong residente sa kanilang village ay nakaligtas, bagama’t walang nailigtas na kagamitan ang mga ito.

Samantala, ligtas nang pansamantalang nananatili sa naina devi temple ang mga residenteng iniligtas ni Rocky kung saan nakatanggap ang mga ito ng tulong mula sa gobyerno.

Sa mga fur parents diyan, tinuturuan niyo rin ba ang mga alaga niyo na maging matalino at alerto pagdating sa panganib?

Sa sobrang pagmamahal ng mga fur parents sa kanilang mga alaga, bitbit nila ang mga ito kahit saan man sila magpunta. Katulad ng fur parent na ito mula sa London na hindi alintana ang taas at lubak ng bundok, maitulak lang ang kartilya na sinasakyan ng kaniyang asong nag-aagaw buhay para siguraduhin na magiging memorable ang mga huling sandali nito sa mundo.

Ang kwento sa huling byahe ng aso na ito, eto.

Sabi nga nila, iba ang pagbilang sa edad ng mga aso kumpara sa edad ng mga tao. Ayon pa sa mga eksperto, umaabot lang ng 10-13 years ang average life expectancy ng mga aso. Katulad ng mga tao, nagkakasakit din ang mga ito at nangangailangan ng extra care. Kung kaya nga ang mga fur parents ay todo effort sa pagpapanatili sa kalusugan ng mga ito.

Kagaya na lang ng lalaki mula sa london na si Carlos Fresco, isang fur parent sa 10-year-old labradoodle na si Monty. Mula sa London, bumyahe ang dalawa patungo sa Wales para dalhin si Monty sa bundok sa huling pagkakataon.

Ito ang paraan na naisip ni fresco para siguraduhin na magiging memorable ang huling adventure ni monty na noong panahon na ‘yon ay mahigit isang taon nang lumalaban sa leukemia.

Ayon kay Fresco, hindi na nakakakuha ng sapat na oxygen ang muscles ni Monty at hindi na gaanong nakakalakad. Matapos kasi nitong dumaan sa chemotherapy ay bumalik ang cancer ni Monty.

Isang linggong nanatili si Fresco at Monty sa bahay ng kanilang kaibigan sa brecon at doon ipinasyal ang aso sakay ng isang wheelbarrow o kartilya.

Ayon kay Fresco, nagustuhan ni Monty ang sinakyan nitong kartilya at tuwang-tuwa ito sa nakuhang atensyon mula sa mga taong nakasalubong nila dahil malambing ito at mahilig makisalamuha.

Naging successful naman ang plano ni Fresco at bagama’t malubak ang daan, nagawa niyang iakyat si Monty sa bundok na tinatawag na Pen Y Fan habang sakay ito ng kartilya.

Pero sa kasamaang palad, habang nasa bakasyon ang dalawa ay tuluyang binawian ng buhay si monty matapos ang father’s day. Matapos nito ay inuwi na ni Fresco ang mga labi ni Monty sa London at inilibing sa kanilang garden.

Sa mga fur parents diyan, hanggang saan ang kaya niyong gawin para sulitin ang hiram na sandali na kasama niyo ang mga minamahal niyong alaga?

Ika nga nila, kung sino pa ang walang-wala, sila pa ang maituturing na tunay na mayaman dahil walang pag-aalinlangan ang mga ito sa pagtulong sa mga katulad nila na nangangailangan. Katulad ng lalaking ito sa China na halos wala ng matira para sa kaniyang sarili at mas inuuna ang kapakanan ng ibang tao kahit na siya mismo ay nangangailangan din ng kalinga.

Ang kwento ng lalaking may malaking puso, eto.

Nabubuhay ang 32-anyos na si Hu Lei mula sa Ningxia Hui sa Northwestern China sa pamamagitan ng pamumulot ng mga gamit na kaniya namang inire-recycle at ibinebenta sa gilid ng kalsada.

Sa pamamagitan nito, nagawang makaipon at makapag-donate ni Hu ng one million yuan o may katumbas na mahigit 7.8 million pesos sa 500 mahihirap na mga estudyante mula noong 2008 hanggang 2023.

Pero ang lalaking may napakalaking puso, na-diagnose pala ng polio sa pagkabata, kung kaya mas hinahangaan ito ngayon at binansagan pa na Kneeling Giant.

Bukod sa mga estudyante, muli na namang nagpamahagi ng tulong si Hu sa mga nasalanta ng baha sa Rongjiang County kung saan mahigit isandaang libong mga residente ang naapektuhan.

Si Hu, nag-donate lang naman ng 5,000 kilos ng bigas, 500 kahon ng instant noodles, bottled water, 100 mga torch, at 2,000 pares ng gloves. Pati ang kaniyang mga kaibigan, namahagi rin ng mga relief packs, at ang nagastos nilang magkakaibigan, kung susumahin ay umabot ito ng 75,000 yuan o mahigit 500,000 pesos.

Ang matulunging lalaki, nakatanggap ng papuri sa social media. Mayroon pang nagsabi na bagama’t hindi makatayo at nakaluhod ang lalaki dahil sa kondisyon nito, deserve nito na tingalain at respetuhin.

Samantala, ayon kay Hu, ipagpapatuloy niya pa rin ang pagtulong sa ibang tao kahit na siya mismo ay maraming iniindang sakit, at nakakatanggap naman daw siya ng buwanang subsidy mula sa gobyerno para sa mga may kapansanan.

Sa mga nangangarap na magsagawa ng charity works diyan, ano pang hinihintay niyo? Tandaan, hindi mo kailangang maging mayaman para tumulong sa mga nangangailangan. Ang kailangan mo lang ay mabuting kalooban.