May sarili nang hanay ng mga abogado si Atty. Manases “Mans” Carpio, asawa ni Vice President Sara Duterte, para sa mga usaping may kaugnayan sa impeachment trial, kasunod ng desisyon ng Senate Impeachment Court na maglabas ng mga subpoena para sa kaniyang bank at tax records.
Kinumpirma ito ni Defense Counsel Atty. Michael Poa sa naganap na press briefing sa gitna ng nagpapatuloy na impeachment trial.
Ayon kay Poa, hindi pa niya tiyak kung ang mga abogadong kumakatawan kay Carpio rin ang naghain ng reklamo laban sa Anti-Money Laundering Council (AMLC).
Sinabi rin ni Poa na makikipag-ugnayan siya sa mga abogado ni Carpio upang mapag-usapan ang mga susunod na hakbang, lalo na’t maaaring maapektuhan ang karapatan nito sa right to privacy.
Matatandaang inaprubahan ng Senate Impeachment Court ang pagpapalabas ng mga subpoena para sa ilang financial records ni Atty. Carpio kaugnay ng imbestigasyon sa paratang na unexplained wealth na nakapaloob sa impeachment complaint laban kay Vice President Sara Duterte. | via Jenn Patrolla (Patrol 38)
