“Nakakapagod palang tumayo ng ilang oras.”
Ganito ibinahagi ni House Prosecutor at Akbayan Partylist Rep. Chel Diokno ang kaniyang naging sitwasyon sa gitna ng Day 7 ng impeachment trial kahapon.
Ginawa ang pahayag matapos makatanggap ng positibong mga komento mula sa mga netizen at pagpupugay mula sa kapwa House prosecutors at House leaders dahil sa malinaw at pagiging mahusay nito sa paglalahad ng posisyon ng prosecution panel na hindi dapat hadlangan ang pagpapalabas ng mahahalagang ebidensya kaugnay sa kwestiyonableng yaman ni Vice President Sara Duterte.
Para kay Diokno, malaking hamon sa kaniya na pangunahan ang oral arguments at panatilihin ang kahilingan ng kanilang panig na mabuksan ang mga bank, financial, at tax records ng bise presidente.
Patunay aniya ito na mayroon siyang karanasan pagdating sa pakikipag-argumento sa harap ng Korte Suprema at iba pang hukuman sa bansa.
Sinabi ng House prosecutor na malaki rin ang naitulong ang kaniyang 36 na taong karanasan sa korte.
Binigyang-diin ni Diokno ang kahalagahan ng due process tungo sa mabilis na mekanismo at pagpapanagot sa matataas na opisyal ng gobyerno. | via Geli Mendez (Patrol 30)
