Kinumpirma ng Office of the Vice President na nasa ibayong dagat si Vice President Sara Duterte para sa pinagsamang opisyal at personal na biyahe.
Ayon sa Office of the Vice President (OVP), kabilang sa itinerary ng pangalawang pangulo ang pagdalaw sa Qatar, pagdalo sa isang forum at pagtitipon ng mga Filipino community o FilCom sa United Kingdom, gayundin ang pagbisita sa The Netherlands.
Layunin ng mga aktibidad na makipag-ugnayan sa mga Pilipinong nasa ibang bansa at isulong ang mga interes ng Pilipinas sa panlabas na ugnayan.
Binigyang-diin ng OVP na hindi gagamit si Vice President Duterte ng pondo ng pamahalaan sa buong tagal ng kaniyang biyahe.
Tiniyak din ng tanggapan ng pangalawang pangulo na nananatiling ganap na operasyonal ang OVP, kabilang ang mga mekanismo nito sa pagtugon sa sakuna at ang pagpapatuloy ng mga programa at proyekto sa pamamagitan ng sampung satellite offices sa buong bansa. | via Jenn Patrolla (Patrol 38)
