Inaasahang dadalo si dating Pangulong Benigno “Noynoy Aquino III sa preliminary investigation ng Department of Justice o DOJ hinggil sa kontrobersiyal na bakunang Dengvaxia mamayang alas diyes ng umaga.
Diringgin sa pagdinig ang kasong kriminal na inihain nina Philippine Anti-Corruption Commission o PACC Commissioner Manuelito Luna at Eligio Mallari ng Vanguard of the Philippines Constitution Incorporated kaugnay ng pagbili at pagamit ng Dengvaxia.
Bukod kay Aquino, kasama rin sa posibleng humarap sa DOJ panel sina dating Health Secretary Janette Garin, dating Budget Secretary Butch Abad at mga kinatawan ng manufacturer ng Dengvaxia na Sanofi Pasteur.
Samantala, hindi naman napigilang madismaya ni Senate Blue Ribbon Committee Chairman Richard Gordon matapos mabigong makalusot sa Senado ang panukalang supplemental budget para sa mga naturukan ng Dengvaxia.
Ayon kay Gordon, mas naging mabilis sana ang proseso sa pagpapasa sa nasabing panukala kung natalakay ito agad sa plenaryo kasunod ng pagpapalabas ng rekomendasyon ng Blue Ribbon Committee sa imbestigasyon hinggil sa kontrobersyal na bakuna.