Nilinaw ng Malakaniyang na rekomendasyon pa lamang ang nilulutong bagong kasunduan sa pagitan ng Pilipinas at ng Amerika.
Ito’y makaraang ibunyag ni Philippine Ambassador to the United States Jose Manuel Romualdez na gumugulong na ang negosasyon sa kung ano ang ipapalit sa ibinasura nang visiting forces agreement (VFA).
Sa isang panayam, sinabi ni Presidential Spokesman Atty. Salvador Panelo, posibleng ang Amerika ang siyang gumagawa ng hakbang upang hindi maputol ang ugnayang militar nito sa Pilipinas.
Ayaw man aminin ng Amerika, sinabi ni Panelo na tiwala siyang labis na nasaktan ang Amerika nang tuluyang ipawalang bisa ni Pangulong Rodrigo Duterte ang VFA.
Gayunman, iginiit ni Panelo na walang basbas ng Pangulo ang anumang nilulutong kasunduan at ayaw na umano ng punong ehekutibo na magkaroon pa ng bagong alyansang militar ang Pilipinas at Amerika.
