Sumuko na kay Philippine National Police (PNP) Chief Director General Ronald ‘Bato’ dela Rosa si Albuera Leyte Mayor Rolando Espinosa Sr.
Kinumpirma ito ni Presidential Spokesperson Secretary Ernesto Abella.
Sinabi ni Secretary Abella na ang alkalde lamang ang sumuko at nananatili pa ring at large o pinaghahanap pa rin ng mga awtoridad ang anak nitong si Kerwin Espinosa.
Ang mag-ama na wanted sa kasong drug trafficking at pagkakanlong umano sa mga drug operator ay una nang binigyan ng Pangulong Rodrigo Duterte ng 24-oras para sumuko.
Matatandaang noong Hulyo lang ay dalawang bodyguards at tatlong empleyado ni Mayor Espinosa ang nahuli sa drug buy bust operations at nakuha sa kanila ang halos 2 milyong pisong halaga ng shabu.
By Katrina Valle | Aileen Taliping (Patrol 23)
