Nagpahayag ng taos-pusong pasasalamat si AGAP Partylist Rep. Nicanor “Nikki” Briones kay Pangulong Ferdinand “Bongbong” Marcos Jr. matapos lagdaan ang Republic Act No. 12308 o Animal Industry Development and Competitiveness Act.
Ayon kay Briones, isa itong mahalagang tagumpay para sa sektor ng paghahayupan dahil siya mismo ang isa sa pangunahing may-akda at sponsor ng naturang batas, na unang inihain ng AGAP noong 2022.
Batay sa bagong batas, lilikhain ang Animal Competitiveness Enhancement Fund (AnCEF) na may pondong hindi bababa sa P20 bilyon at maaaring tumaas hanggang P30 bilyon kada taon na epektibo sa loob ng sampung taon. Ang pondo ay magmumula sa taripa ng mga inaangkat na karne at dairy products.
Gagamitin ang AnCEF para sa iba’t ibang programa gaya ng repopulation at herd build-up, animal health and disease control, paggawa at imbakan ng bakuna, pagbibigay ng cash assistance sa mga magsasakang tinamaan ng ASF at bird flu, pagpapagawa ng pasilidad gaya ng slaughterhouses at poultry dressing plants, paglinang ng masustansiyang feeds, at pagpapautang para sa mga nasa animal industry.
Sa ilalim ng RA 12308, ang Bureau of Animal Industry ang magiging pangunahing regulatory agency para sa veterinary drugs, biologics, at vaccines.
Itinuturing itong landmark law dahil layon nitong palakasin ang lokal na produksyon, itaas ang biosecurity standards, at tiyakin ang pagiging globally competitive ng sektor ng livestock at poultry.
Ipinunto ni Briones na magsisimula na ang bagong yugto para sa mas moderno, matatag, at umuunlad na animal industry sa bansa.
Samantala, pinapurihan din ng AGAP congressman ang naging suporta ng mga mambabatas at opisyal ng pamahalaan, kabilang sina dating Speaker Martin Romualdez, Sen. Cynthia Villar, Cong. Mark Enverga, at Agriculture Secretary Kiko Laurel.
