Walang plano ang AFP o Armed Forces of the Philippines na imungkahi kay Pangulong Rodrigo Duterte ang pagdedeklara ng Martial Law.
Ipinaliwanag ni AFP Spokesman Brig. Gen. Restituto Padilla na kontrolado naman nila ang sitwasyon kung saan nahuhuli pa nila ang mga kalaban ng estado.
Ayon kay Padilla, ipauubaya na lamang nila sa mga political leader ang desisyon ng pagdedeklara ng batas militar.
Samantala, sa panig naman ng pulisya, sinabi ni PNP Chief Director General Ronald Dela Rosa na hindi nila irerekomenda sa Pangulo na magdeklara nito ngayon.
AFP mas magiging mapusok at agresibo laban sa bandidong Abu Sayyaf
Magbabago na ng taktika ang AFP o Armed Forces of the Philippines laban sa Abu Sayyaf Group.
Inihayag ito ni AFP Spokesman Brig. Gen. Restituto Padilla matapos ipag-utos ni Pangulong Rodrigo Duterte sa militar na bombahin ang mga terorista kahit madamay pa ang mga sibilyang bihag ng mga ito.
Ayon kay Padilla, mas magiging mapusok at agresibo ang militar sa paglaban sa bandidong Abu Sayyaf at magbabago rin sila ng timetable sa kanilang operasyon.
Gayunman, sinabi ni Padilla na bagamat susundin nila ang utos ng Presidente, ikokonsidera pa rin nila ang buhay ng mga hostage victim sa ilulunsad nilang operasyon.
By: Meann Tanbio / Jonathan Andal
