Kinuha na ng Armed Forces of the Philippines o AFP ang tulong ng mga lokal na opisyal sa Sulu para sa pagliligtas sa mga nalalabi pang bihag ng Abu Sayyaf Group o ASG.
Ayon kay Joint Task Force Sulu Commander Brigadier General Cirilito Sobejana, tutukan ng mga LGU officials ang malawak na reintegration sa mga miyembro ng Abu Sayyaf na nagnanais nang sumuko at magbalik-loob sa pamahalan.
Paliwanag ni Sobejana, layunin nito ang mas mapayapang paraan ng pagharap sa mga bandido sa halip ng walang hupay na military operations.
Gayunman, tiniyak ng AFP ang kanilang mas matinding opesiba para tutukan ang pagliligtas sa natitirang 17 pang mga bihag ng Abu Sayyaf Group.
Positibo naman ang militar sa kanilang isinasagawang rescue operations matapos na rin ng magkakasunod na pagkakaligtas sa tatlong Vietnamese at limang Pilipinong bihag ng bandidong grupo ngayong buwan.
—-
