Nasa isolation facility na ngayon si Armed Forces of the Philippines o AFP Chief of Staff Gen. Andres Centino matapos itong magpositibo sa COVID-19.
Ayon kay AFP Spokesman, Col. Ramon Zagala, sumailalim si Centino sa RT-PCR o SWAB test kahapon at ngayong araw lumabas ang resulta.
Bagaman naka-isolate sa Kampo Aguinaldo, sinabi ni Zagala na mananatili pa ring on duty si Centino na ang ibig sabihin ay patuloy pa rin siya sa pagganap sa kaniyang tungkulin.
Kasunod nito, pinaalalahanan ng AFP Chief ang lahat ng miyembro ng Hukbong Sandatahan na palagiang sundin at health and safety protocols sa COVID-19 upang maiwasan ang pagkalat ng virus.
Patuloy na isinusulong ng AFP ang pagiging matatag ng kanilang hanay mula sa banta ng COVID-19 upang kanila pa ring magampanan ang mandatong bantayan at bigyang seguridad ang sambayanang Pilipino. —ulat mula kay Jaymark Dagala (Patrol 9)
