Tinanggap ng ABS-CBN Network at Star Cinema ang desisyon ni Liza Soberano na pag-atras sa movie project nitong Darna.
Ayon kay Liza, hindi niya magagampanan nang mabuti ang karakter ng Pinay superhero na Darna dahil sa injury niya sa hintuturo.
Kuwento nito, kanyang nakuha ang naturang injury habang ginagawa ang mga stunt sa dati niyang teleserye na Bagani.
Sumailalim na aniya siya sa dalawang operasyon ngunit hindi pa rin aniya gumagaling at bumubuti ang kanyang daliri na nagiging sagabal na sa mga kinakailangang paghahanda para sa proyekto.
Masakit para kay Liza na ipaubaya na sa iba ang pagganap bilang Darna ngunit mas mainam na aniya ito kaysa sa ituloy ang proyekto ngunit hindi naman niya mabibigyan ng hustisya ang pagganap sa iconic Pinay superhero.
Napahagulgol din si Liza na humingi ng tawad sa kanyang mga fan na nabigo niya sa pangyayari.
Ayon sa pamunuan ng ABS-CBN, nirerespeto nila ang desisyon ni Liza at hangad nila ang agad na pagbuti nito.
Samantala, nalungkot naman ang direktor ng pelikula na si Jerold Tarog na malaman ang balitang umatras na sa pagiging Darna si Liza.
Gayunman, mas mahalaga aniya ang kalusugan ni Liza at mainam na antayin na lamang kung sino ang susunod na magiging Darna.
—-
