Ligtas na nasagip ng mga pulis ang tatlong taong gulang na bata na dinukot sa Las Piñas City.
Ayon kay Southern Police District Director Chief Supt. Tomas Apolinario, alas singko imedya kaninang madaling araw nang magkasa ng operasyon ang Las Piñas Police sa Zapote at Bacoor, Cavite na nagresulta sa pagkakasagip sa batang si Princess Louisana Bumatay at pagkaka-aresto naman sa mga dumukot dito na sina Giselle Omayan at Cerio Cinolete.
Ayon kay Apolinario, plano sanang ipatubos ng mga suspek ang bata sa mga magulang nito pero dahil kapwa walang trabaho ang mga magulang ng biktima. Nagdesisyon ang mga kidnappers na gamitin na lamang sana ang bata para mamalimos sa Cavite.
Dinukot ang bata noong Disyembre 30 malapit sa kanilang bahay sa Brgy Daniel Fajardo Las Piñas City pero kahapon lang ito inireport ng mga magulang sa pulisya.
