Patay ang lima (5) katao makaraang lumubog ang sinasakyan nilang bangka sa karagatang sakop ng Romblon.
Ayon sa Philippine Coast Guard, galing Sibuyan Island ang MB Alan Express 2 at patungo sana ng Romblon Port nang tumaob ito dahil sa malakas na alon.
Nailigtas naman ng Coast Guard sa naturang insidente ang 44 na pasahero ng lumubog na bangka.
Iniimbestigahan na ng mga awtoridad ang sanhi ng naturang aksidente sa dagat.
By Ralph Obina
Niyanig ng magnitude 5.2 na lindol ang Sarangani kagabi.
Ayon sa PHIVOLCS o Philippine Institute of Volcanology and Seismology, nangyari ang pagyanig dakong alas-8:85 kagabi kung saan natukoy ang sentro nito sa layong 38 kilometro hilaga ng Sarangani.
Tectonic ang pinagmulan ng pagyanig at may lalim na 22 kilometro.
Sa lakas ng pagyanig, naramdaman ang intensity 3 sa Sarangani at Davao Occidental habang intensity 2 naman sa General Santos City at Glan.
Ipinabatid ng PHIVOLCS na asahan ang aftershocks ngunit wala namang itong idudulot na anumang pinsala.
By Ralph Obina
Binuweltahan ni Pangulong Rodrigo Duterte ang kanyang mga kritiko maging ang mga dating militar na maingay sa isyu ng Martial Law sa Mindanao.
Muling binigyang diin ng Pangulo sa kanyang pagharap sa 603rd Brigade ng 6th Infantry Division ng Philippine Army sa Sultan Kudarat na wala siyang balak manatili sa kapangyarihan taliwas sa pinalulutang ng kanyang mga kritiko.
Minaliit din ng Pangulo ang mga mali-maling pahayag ng mga dating militar na hindi na aniya nahiyang magsalita na tila mas marurunong pa kaysa sa kanya.
PAKINGGAN: Bahagi ng pahayag ni Pangulong Rodrigo Duterte
Binigyang diin pa ng Pangulo na hindi siya masayang magdeklara ng Batas Militar dahil indikasyon aniya iyon na may problemang kinahaharap ang bansa.
PAKINGGAN: Bahagi ng pahayag ni Pangulong Rodrigo Duterte
By Jaymark Dagala / with report from Aileen Taliping (Patrol 23)
Sisikapin ng AFP o Armed Forces of the Philippines na maiwawagayway na nila ang watawat ng bansa sa Marawi City sa Lunes, Hunyo 12 kasabay ng paggunita sa ika-119 na anibersaryo ng kasarinlan.
Ayon kay AFP Spokesman Brig. General Restituto Padilla, target nilang makamit ang liberation ng Marawi City sa mismong Araw ng Kalayaan, masakote man o hindi ang pinuno ng teroristang grupo na si Isnilon Hapilon.
Hindi kumbinsido ang militar sa mga ulat na nakatakas na sa Marawi City si Hapilon dahil walang indikasyon na nakapuslit na ito batay sa ginawang validation ng Task Force Marawi.
Kasabay nito, nanawagan si Padilla sa publiko na ipagdasal ang kaligtasan ng mga sundalong nakikipaglaban sa Maute Group na ngayon ay unti-unti nang lumiliit ang mundo dahil sa pagpupursige ng militar.
By Jaymark Dagala / with report from Aileen Taliping (Patrol 23)
Kinuwesyon ng Malakaniyang ang batayan ng lumabas na Global Peace Index Report kung saan, lumalabas na pangalawa ang Pilipinas sa mga pinaka-magulo sa rehiyon ng Asya Pasipiko.
Ayon kay Presidential Spokesman Ernesto Abella, taliwas aniya ito sa pananaw ng mga Pilipino lalo na kung ang war on drugs ng Administrasyong Duterte aniya ang pagbabatayan.
Mayorya naman aniya sa mga Pilipino ang masaya at kuntento sa ginagawa ng administrasyon sa aspeto ng paglaban sa krimen na umabot sa 62 percent habang 64 percent naman ang pabor sa kampaniya kontra terorismo.
Maliban dito, sinabi ni Abella na lumabas din sa mga pag-aaral na mas ramdam ngayon ng mayorya ng mga Pilipino na sila’y ligtas kahit inaabot ng gabi sa lansangan.
By: Jaymark Dagala / Aileen Taliping
Pinawi ng AFP o Armed Forces of the Philippines ang pangamba ng ilan na magkaisa ang mga preso na nakakulong sa Camp Bagong Diwa para sa paghahasik ng karahasan.
Ito’y makaraang duon ikulong ang tinaguriang patiyarka ng Maute Terror Group na si Cayamora Maute na ama ng magkapatid na sina Omar at Abdullah Maute.
Ayon kay AFP Spokesman brig/Gen. Restituto Padilla, nakahiwalay naman sa mga regular na bilanggo ang nakatatandang Maute dahil sa kinukonsidera itong high profile inmate.
Dagdag pa ni Padilla, abala ngayon ang puwersa ng militar sa Mindanao para sa pagpapatupad ng Martial Law kaya’t posibleng hindi mapagtuunan ng pansin ang seguridad ng nakatatandang Maute.
By: Jaymark Dagala / Jonathan Andal
Tinututukan na ngayon ng pamahalaan ang pagrekober sa mga nakakalat na bangkay sa Marawi City dulot ng bakbakan sa pagitan ng militar at ng teroristang grupo na Maute.
Ayon kay AFP Spokesman Brig/Gen. Restituto Padilla, nangangamoy na ang buong barangay ng Bangolo dahil sa mga nabubulok na bangkay bunsod ng bakbakan.
Posible aniyang napatay na mga terorista ang mga nasabing bangkay o hindi kaya’t mga sibilyan na napatay ng mga bandido nuong unang araw pa lamang ng kanilang pag-atake.
Magugunitang nagsilbing stronghold ng mga terorista ang Marawi City kung saan, nahirapan ang militar na pasukin ito dahil sa mga nakabantay na sniper sa lugar.
By: Jaymark Dagala / Jonathan Andal
Umapela ang AFP o Armed Forces of the Philippines sa Facebook na imbestigahan at ipasara ang may 63 accounts na ginagamit ng Maute Terror Group gayundin ng kanilang mga symphatizer bilang propaganda.
Ayon kay Lt/col. Jo-Ar Herrera, spokesman ng 1st infantry division ng Philippine Army, pawang mga malisyoso at pekeng impormasyon lamang ang ipinakakalat ng mga nasabing Facebook accounts na layong lasunin ang isipan ng publiko.
Sa panig naman ni AFP Spokesman Brig/Gen. Restituto Padilla, nakikipag-ugnayan na sila sa FB Philippines at nagpahayag naman ito ng kahandaang tumulong sa pamahalaan.
Dagdag pa ni Padilla, sa katunayan aniya ay nakapagpasara na sila ng ilan sa mga naturang accounts na ang tanging layunin lamang ay maghasik ng kasinungalingan at takot sa mga Pilipino.
By: Jaymark Dagala / Jonathan Andal
Nangako si Senate Committee on Ways and Means Chairman Sonny Angara na maglalagay sila ng mga kaukulang safety nets para maiwasan ang tax increase sa langis at mga sasakyan.
Ito’y bilang pangtapat sa banta ng mga grupong pangtransportasyon na dagdag pasahe kapag naisabatas ang Comprehensive Tax Reform measure na isinusulong ng Administrasyong Duterte.
Ayon kay Angara, kabilang sa mga programang kanilang hakbang ay ang pagbibigay ng subsidy tulad ng Pantawid Pasada Program gayundin ang Transport modernization upang maging mas epektibo ang public transport system para sa mga pasahero.
Magugunitang sa ilalim ng isinusulong na Tax Reform Bill ng Malakaniyang, tataasan nito ang buwis sa mga produktong petrolyo na maaaring magresulta sa dagdag pasahe.
By: Jaymark Dagala / Cely Bueno