Pansamantalang isinara sa publiko at mga dalaw ang Metro Manila District Jails sa loob ng Camp Bagong Diwa sa Taguig City.
Kasunod ito ng panibagong kaguluhan kagabi sa pagitan ng mga miyembro ng Sputnik Gang at Bahala Na Gang.
Ayon kay BJMP o Bureau of Jail Management and Penology Director Serafin Barretto, hindi naman nagkasakit ang dalawang grupo subalit nagpatuloy ang noise barrage ng mga ito kagabi.
Sinabi ni Barretto na kontrolado na ang sitwasyon subalit para sa kaligtasan ng mga dalaw ay pansamantala munang hindi papasukin ang mga ito sa compound ng MMDJ.
Magugunitang noong Martes ay dalawa ang nasawi samantalang maraming iba pa ang nasugatan nang maganap ang riot sa pagitan ng Bahala Na at Sputnik Gangs.
By Judith Larino
*CNN PH Photo
Iniimbestigahan na ng mga awtoridad ang dalawa (2) kataong may apelyidong Maute.
Sinabi ni Senior Supt. Robert Roy Bahian ng Cagayan de Oro City Police Office na hindi naman terorista ang mga nasabing tao bagamat Maute naman ang kanilang last name.
Ayon kay Bahian, ang mga nasabing tao na kinuha nila sa isang hotel sa Cagayan de Oro City ay papalayain din kapag hindi napatunayan ng mga awtoridad na hindi sila miyembro ng local ISIS.
Samantala, tiniyak ni Bahian na ligtas mula sa sa mga terorista ang Cagayan de Oro City.
Kasabay nito, binalaan ng mga awtoridad ang mga residente ng Cagayan de Oro City laban sa mga hinihinalang Maute Group bombers na sina Mohammad Reza Kiram alias Abdulrahman at Mohammad Noaim Maute alias Abu Jadid.
Nai-post na Facebook page ng police office ang litrato ng dalawang suspected Maute members at ipapakalat na ito sa buong lungsod.
Nilinaw ng mga awtoridad na hindi pa nakakapasok sa Cagayan de Oro City ang mga nasabing suspek.
By Judith Larino
Hindi nakaporma sa TNT Katropa ang Meralco Bolts makaraang makuha ang 104-96 victory sa kanilang bakbakan sa 2017 PBA Commissioners’ Cup.
Dahil sa kanilang come-from-behind win sa overtime ay nakasungkit ang TNT ng puwesto sa semifinals ng torneo.
Kumamada ng tigta-31 puntos sina star guard Jayson Castro at import Josh Smith.
Sasagupain naman ng Katropa ang Barangay Ginebra San Miguel sa kanilang best-of-five semifinals series.
Naglunsad ng rally ang TNT, sa fourth quarter sa pangunguna nina Jayson Castro, Ranidel de Ocampo at Roger Pogoy kaya’t nauwi sa overtime ang bakbakan na naging dahilan upang magwagi ang Katropa.
By Jelbert Perdez
Photo: PBA Images
Nanawagan ngayon ang grupo ng mga guro para sa kanilang chalk allowance.
Ito ay dahil bagamat isang linggo nang nagsimula ang pasukan hanggang ngayon ay hindi pa naibibigay sa mga guro ng pamahalaan ang dalawan libo at limandaang piso (P2,500) nilang chalk allowance.
Giit ng Teachers Dignity Coalition o TDC, naibigay na ito dapat bago pa man magsimula ang pasukan dahil sa kinakailangan ito para sa pagtuturo ng mga guro gaya ng mga kailangang chalk, markers, papel, cardboards at iba pang gamit.
Binigyang diin pa ng TDC na kailangang kailangan ng mga guro ang kanilang chalk allowance lalo’t malaki ang inaasahan ng Department of Education o DepEd sa mga guro.
By Ralph Obina
Arestado ang ina ng mga lider ng Maute Terrorist Group sa Lanao del Sur.
Ayon sa ulat, naaresto si Farhana Maute sa isang checkpoint sa bayan ng Masiu sa Lanao del Sur kasama ang ilang kababaihan at dalawang (2) sugatan na pinaniniwalaan namang mga miyembro ng Maute Group na napuruhan sa nagpapatuloy na bakbakan sa Marawi City.
Narekober sa grupo ng ina ng mga Maute Brothers ang ilang matataas na uri ng armas at mga IED o Improvised Explosive Device.
Si Farhana ang itinuturong financier sa aktibidad ng mga anak nitong lider ng Maute na sina Abdullah at Omar.
Maliban dito, si Farhana rin ang nagsisilbi umanong link sa pagitan ng Maute at mga dayuhang Jihadist sa Timog Silangang Asya.
Matatandaang nauna nang naaresto ng mga otoridad ang asawa ni Farhana at ama ng Maute brothers na si Casamora.
By Ralph Obina
Patay ang isang dating bise-gobernador ng lalawigan ng Abra habang sugatan naman ang dalawang (2) bodyguard nito matapos tambangan sa lungsod ng Marikina.
Nakilala ang nasawi na si dating Vice-Governor Rolando Somera ngunit inaalam pa ang pagkakakilanlan ng dalawa pang biktima na kasalukuyang nilalapatan ng lunas sa isang ospital sa nabanggit na lungsod.
Sa paunang imbestigasyon, nangyari ang pamamaril sa tapat ng San Roque Cockpit Arena na matatagpuan sa Shoe Avenue sa Brgy. San Roque.
Bigla na lang umanong sumulpot ang mga lalaking nakamotorsiklo at walang habas na pinagputukan ang mga biktima.
Kasalukuyan pang iniimbestigahan ng mga awtoridad ang naturang insidente.
By Jelbert Perdez
Kanselado na ang tradisyunal na vin d’honneur sa Palasyo ng Malacañang sa Lunes kasabay ng paggunita sa ika-119 na anibersaryo ng Araw ng Kasarinlan.
Ito’y ayon kay Presidential Spokesman Ernesto Abella ay dahil sa nais ni Pangulong Rodrigo Duterte na tutukan muna ang sitwasyon sa Mindanao.
Gayunman, tiniyak ng Palasyo na pangungunahan ng Pangulo ang flag raising ceremony gayundin ang pag-aalay ng bulaklak sa bantayog ni Gat Jose Rizal sa Luneta, Maynila sa Lunes ng umaga.
Dalawang taon lamang ginagawa ang vin d’honneur o ang pagsasama-sama ng diplomatic corps na pinangungunahan ng Pangulo tuwing Bagong Taon at Araw ng Kalayaan maliban pa sa inagurasyon ng bagong Pangulo ng bansa.
By Jaymark Dagala / with report from Aileen Taliping (Patrol 23)
Kinumpirma ng North Korea na naging matagumpay ang ikinasang missile launch nitong Huwebes kaya’t target naman nilang makapaglunsad ng cruise anti-ship missile sa hinaharap.
Sa ulat ng State KCNA News Agency, binanggit na lahat ng mga missile na pinakawalan ay tumama sa kanilang mga puntirya sa karagatan ng Japan.
Sinasabing si North Korean Leader Kim Jong-Un pa ang mismong namahala sa test launch na isinagawa sa silangang baybayin ng naturang bansa.
Ibinabala naman ng Interior Ministry ng NoKor na dahil sa isinusulong na pagpapataw ng mas mabigat na sanction laban sa kanila ay lalo lamang itong itinutulak ng Amerika na lumikha ng nuclear weapon.
By Jelbert Perdez
Bagamat hindi siya ang napili para gumanap bilang Darna, pinatunayan ng aktres na si Angel Locsin na hindi na kailangan ng costume para makatulong sa mga nangangailangan.
Ito’y matapos mamahagi ang bituin ng “La Luna Sangre” ng food packs at school supplies sa mga apektado ng bakbakan sa Marawi City.
Kasama ang charity group na Rural Missionaries of the Philippines, dinalaw ni Locsin ang isang evacuation center kung saan tumutuloy ang halos tatlong daang (300) indibidwal.
Umaasa naman si Angel na matatapos na ang sagupaan sa pagitan ng Maute Group at mga tropa ng pamahalaan sa Mindanao.
- therealangellocsin: entrance longing for a safe haven… #StandwithMarawi #Peace#PrayforMarawiCity
By Jelbert Perdez
Photo: Screengrab from therealangellocsin / Instagram