Inaalam pa ng AFP o Armed Forces of the Philippines ang ulat na napatay na sa bakbakan ang magkapatid na Omar at Abdullah Maute sa Marawi City.
Ayon kay Lt/Col. Jo-ar Herrera, tagapagsalita ng 1st Infantry Division ng Philippine Army, mayroon na aniya silang matibay na indikasyon na napatay ang dalawa (2) kasabay ng nagpapatuloy na opensiba ng pamahalaan.
Gayunman, hindi pa ito makumpirma ng militar hangga’t walang ebidensyang makapagpapatunay sa nasabing impormasyon na nakuha nila mula sa ground.
“We are validating the report that Omar, Omar Maute and Abdullah Maute were killed in a different fire fight so we are still waiting for the information. As I said, we are doing the validation right now. That’s based on our reports on the ground.”
“Kasama po yun sa ginagawa nating validation. Importante kasi yung evidence eh, makita natin yung evidence but there are reports already kaya parte ng validation naming is to see the body”, ani Herrera.
Kasunod nito, ipinabatid din ni Herrera na napatay din sa nangyaring bakbakan noong Biyernes ang isang 1st Lt. Sevillano na siyang nakadiskubre ng halos walumpung milyung pisong (P80-M) cash at tseke gayundin ang mga armas ng Maute Group sa kanilang sniper house sa nasabing lungsod.
“Nakakalungkot nga noh, one of the marine officer, that’s 1st Lt. Sevillano. This guy is a very courageous, very commited military junior officer, no question of intergrity.”
“He is a very professional soldier, he would in the front line, siya yung nag-conduct ng clearing operation. So, unfortunately, he is one of the killed yesterday in that gun battle”, pahayag ni Herrera.
By Jaymark Dagala
Ikinalungkot ni Senador Risa Hontiveros ang naging komentaryo ni Davao City Mayor Sara Duterte -Carpio hinggil sa umano’y pagsuporta ng senadora sa Maute Group.
Sinabi sa DWIZ ni Hontiveros na pawang pekeng report at litrato ang lumabas kaya’t sana aniya ay nalinaw ito ni Mayor Sara sa kanya gayung nagkakausap naman sila.
Sa katunayan aniya ay madalas silang magpalitan ng text messages ng alkalde hinggil sa iba’t ibang isyu.
“Sobrang friendly yung ano namin, kaya talagang nalungkot ako. Siguro bago pa mag-post ng ganun bakit hindi muna kaya sya nagtext o tumawag sa akin para tanungin lang ako diba? Yan ba talaga ang sinabi mo? Yan ba ang pinaliliwanag mo?”, ani Hontiveros.
Ayon pa kay Hontiveros, hindi siya hihingi ng anumang apology kay Mayor Sara subalit umaasa siyang maging malinaw talaga ang usapin.
“Para sa’kin sapat na po yung pagpapahayag mo ng lungkot, dahil nga sa alam kong naging friendly ang ugnayan namin, bilang mga kabaro at pareho ho leaders. Hindi ako humingi ng ano pa man sa kanya pero umaasa sana ako na mailagay sa linaw ulit ang isyung ito sa aming dalawa. Well, siyempre pinagsisimulan ko kasi yung sinimulan naming magandang ugnayan”, paliwanag ni Hontiveros sa panayam ng DWIZ.
By Judith Estrada – Larino | IZ Balita Nationwide Program (Interview)
Nangako si Pangulong Rodrigo Duterte na pagkakalooban ng bagong baril ang mga sundalo sa susunod na taon.
Sa pagharap ng Pangulo sa mga sundalo noong Biyernes sa Sultan Kudarat, sinabi nitong nasa proseso na ang pagbili ng pamahalaan ng kalibre 45 na baril para sa mga sundalo.
Ngunit naglatag ng isang kondisyon ang Pangulo sa mga sundalo kapalit ng ipagkakaloob na baril.
“Bibigyan ko kayo lahat ng kondisyon, ‘wag ninyo ibigay ito sa kalaban, buhay kailangan, mahal masyado eh, lalo na Western side. Ibigay mo, putulan ka rin ng ulo, bakit ka mag-surrender”, ani Pangulong Duterte.
Pagtanggi sa alok ng Moro sa paglaban sa Maute ipinaliwanag ng Pangulo
Ipinaliwanag ng Pangulong Rodrigo Duterte kung bakit hindi nya itinuloy ang planong pagkuha sa serbisyo ng MILF o Moro Islamic Liberation Front at MNLF o Moro National Liberation Front para sumabak laban sa Maute Group.
Ayon sa Pangulo, hindi akma sa sitwasyon na isama pa ang mga Moro fighters sa laban ng mga sundalo sa Marawi City.
Nakakatakot aniya sa halip na sa kalaban iputok ang baril ay ang mga sundalo at Moro ang syang magbarilan.
“Baka lahat ng tama ng sundalo ko sa likod, wala na sa harap. It’s not because I do not trust them, it’s simply does not fit”, paliwanag ni Pangulong Duterte.
By Rianne Briones
Pinag-aaralan ng PNP o Philippine National Police na mailipat sa Metro Manila ang naarestong ina ng Maute Brothers sa Lanao del Sur.
Ito ay dahil sa matinding banta ng sa seguridad sa posibleng pag – rescue ng Maute sa inang si Omenta Maute alyas Farhana.
Ipinaliwanag ni PNP – ARMM Regional Director Chief Superintendent Reuben Theodore Sindac na nasa pangangalaga nila ngayon si Farhana at mga kasama nito.
Naaresto ang mga ito sa isang checkpoint sa Lanao del Sur kung saan narekober din ang ilang matataas na kalibre ng baril, mga bala at ilang improvised explosive device (IED).
Kasama rin ng ina ng mga Maute ang ilang taong sugatan na pininiwalaang itinakas sa gitna ng labanan sa Marawi City.
AFP nangakong aalalayang makabangon muli ang Marawi mula sa nangyayaring krisis
Nangako ang AFP o Armed Forces of the Philippines na aalalayan ang Marawi City sa pagbangon nito mula sa nangyayaring krisis.
Ito ay sa oras na mapulbos nang tuluyan ang teroristang Maute mula sa pag-okupa nito sa syudad.
Ayon kay AFP Spokesman Brig. Gen. Restituto Padilla, tutulong pa rin ang mga sundalo sa reconstruction, rehabilitation at rebuilding phase sa Marawi.
Naniniwala si Padilla na kapag natapos na ang krisis sa Marawi ay magiging mas matatag at mas matibay na ang komunidad laban sa terorismo at iba pang banta ng rebelyon.
By Rianne Briones
Umapela ang Sultanate of Sulu sa Malaysia na i-review ang naging desisyon ng Korte na patawan ng parusang kamatayan ang siyam (9) na Pilipinong lumusob sa Lahad Datu noong 2013.
Ayon kay Sultanate of Sulu Spokesman Abramaham Idjirani, hindi dapat tawaging kriminal ang naturang mga Pilipino dahil nagtungo lamang sila sa Sabah para bawiin ang kanilang lupain.
Matataandaang may claim ang Sultanate of Sulu sa naturang teritoryo base na rin sa naging kasunduan nito sa Great Britain at kinikilala ito ng Malaysia sa pamamagitan ng pagbabayad ng annual rental payment.
Kaugnay nito, umaasa ang pamunuan ng Sultanato na i-aapela ng Department of Foreign Affairs o DFA ang naging desisyon sa miyembro nito.
By Rianne Briones
Handa si Pangulong Rodrigo Duterte na sumunod anuman ang maging desisyon ng Korte Suprema kaugnay sa idineklarang Martial Law sa Mindanao.
Taliwas ito sa kanyang mga naunang pahayag na papalagan ang magiging desisyon ng Korte Suprema kung tututulan nito ang ipinatupad na batas militar.
Sinabi ng Pangulo na susundin nya ang magiging ruling sa mga petisyon na tumututol sa martial law dahil sa Korte Suprema na ito manggagaling.
Sa kabila nito umaasa si Duterte na mai – konsidera ng SC o Supreme Court ang sitwasyon ng seguridad sa Marawi City na dahilan ng kanyang deklarasyon.
Nangako naman si Duterte na muling magbabalik sa normal ang sitwasyon sa bansa.
4 na kababaihan dumulog sa SC para tutulan ang umiiral na martial law
Dumulog sa Korte Suprema ang apat (4) na kababaihan mula sa Marawi City para ipawalang bisa ang umiiral na martial law sa Mindanao.
Kinilala ang mga petitioner na sina Norkaya Mohamad, Sittie Nur Dyhanna Mohamad, Noraisah Sani at Zahria Muti – Pandi.
Anila, hindi sapat ang naging batayan ng Pangulo para magdeklara ng martial law batay na rin sa naging ulat nito sa kongreso.
Hindi pa kinakailangan ang deklarasyon ng batas militar dahil kaya pa umanong resolbahin ang sitwasyon ng lokal na pamahalaan ng Marawi sa tulong ng mga sundalo.
By Rianne Briones
Dalawang (2) bahay ni dating Marawi City Mayor Fajad “Pre” Salic sa Camella Homes Subdivision sa Upper Balulang sa Cagayan de Oro City ang ni-raid ng mga otoridad.
Ang hakbang ay bahagi umano nang paghahanap ng mga otoridad ng dagdag na ebidensya para mapalakas ang kasong rebelyon laban kay Salic matapos ang pag-atake ng Maute group sa lungsod.
Ayon kay City Intelligence Unit Head Chief Inspector Ariel Philip Pontillas, ipinag-utos ng Korte sa CIDG Region 10 na i-raid ang dalawa pang bahay ni Salic sa nasabing lugar.
Inamin naman ni Pontillas na wala silang nakuhang dagdag na ebidensya sa raid sa mga nasabing bahay na ibang pamilya na rin ang nakatira.
Tinutunton na rin aniya ng mga otoridad ang ilan pang bahay ni Salic sa Marawi City.
Mga pamilyang may apelyidong ‘Salic’ nakakaramdam na ng takot
Nakakaramdam na ng takot ang mga pamilyang may apelyidong Salic matapos lumipat sa Cagayan de Oro mula sa Marawi City nang magsimulang mag bakbakan ang tropa ng gobyerno at Maute Group.
Kabilang dito ang pamilyang Calimama-o na ang bahay ay ni-raid ng mga tauhan ng Martial Law Special Action Group matapos mapaghinalaang nagtatago ng mga iligal sa loob ng bahay na pagmamay-ari umano ni dating Marawi City Mayor Fahad “Pre” Salic.
Sinabi ng pamilya Calimama-o na natatakot na sila sa kaliwat kanang raid operations sa mga bahay na hinihinalang pag-aari ng dating alkalde ng lungsod.
Ayon sa pamilya,pagmamay-ari ng isang kaanak nila ang nasabing bahay na nabili umano sa isang Mandi Salic.
Inamin ng pamilya na kilala nila si Salic subalit bilang isang political icon lamang.
By Judith Estrada – Larino
Asahan na ang libreng WiFi sa kahabaan ng EDSA sa pagdiriwang ng ika-isandaan at labing siyam (119) na kasarinlan ng bansa sa Lunes, June 12.
Ito ayon sa PCOO o Presidential Communications Operations Office ay bahagi nang paglulunsad ng DICT at NTC ng high speed internet services sa EDSA, batay na rin sa pangako ng Pangulong Rodrigo Duterte.
Nagtayo na ng access points ang DICT sa lahat ng MRT stations at sa pagitan ng mga istasyon.
Isinasagawa naman ang service testing noong Sabado.
Priority ng nasabing proyekto ang kahabaan ng EDSA mula sa Cubao sa Quezon City hanggang sa Guadalupe sa Makati City.
Job Fair ikakasa ng DOLE
Libu – libong mga trabaho ang maaring aplayan sa isasagawang job fair sa Rizal Park sa Lunes.
Ito ay bahagi ng pagdiriwang ng ‘Araw ng Kalayaan’ sa Hunyo 12.
Ayon sa Department of Labor and Employment o DOLE, may kabuuang 40, 689 na job vacancies ang iaalok ng pitumpu’t apat (74) na mga employer na makikiisa sa job fair.
Karamihan dito ay mga trabaho dito sa bansa habang mayroong ding alok na job offer mula naman sa ibang bansa partikular sa Middle East.
Gaganapin ang job fair sa Senior Citizen’s Garden sa Luneta simula 8:00 ng umaga hanggang 4:00 ng hapon.
Magkakasa rin ang DOLE ng job fair sa iba pang pangunahing syudad sa bansa.
By Judith Estrada – Larino / Rianne Briones
Iniimbestigahan na ng mga otoridad ang dalawa (2) kataong may apelyidong Maute.
Sinabi ni Senior Superintendent Robert Roy Bahian ng Cagayan de Oro City Police Office na hindi naman terorista ang mga nasabing tao bagamat Maute ang kanilang last name.
Ayon kay Bahian, ang mga nasabing tao na kinuha nila sa isang hotel sa Cagayan de Oro City ay papalayain din kapag napatunayan ng mga otoridad na hindi sila miyembro ng local ISIS.
Samantala, tiniyak ni Bahian na ligtas mula sa sa mga terorista ang Cagayan de Oro City.
Kasabay nito, binalaan ng mga otoridad ang mga residente ng Cagayan de Oro City laban sa mga hinihinalang Maute group bombers na sina Mohammad Reza Kiram alias Abdulrahman at Mohammad Noaim Maute alias Abu Jadid.
Nai-post na sa Facebook page ng police office ang litrato ng dalawang suspected Maute members at ipapakalat na ito sa buong lungsod.
Nilinaw ng mga otoridad na hindi pa nakakapasok sa Cagayan de Oro City ang mga nasabing suspek.
By Judith Estrada – Larino