Niyanig ng magnitude 6.6 na lindol ang lungsod ng palu malapit sa bayan ng Poso sa bansang Indonesia kahapon.
Batay sa tala ng USGS o United States Geological Survey, naitala ang sentro ng pagyanig sa layong pitumpu’t siyam (79) na kilometro timog silangan ng Palu.
Tectonic ang pinagmulan ng pagyanig na may lalim na siyam (9) na kilometro mula sa episentro.
Dahil dito, nagdulot ng panic sa mga residente ang nasabing pagyanig na tumagal ng dalawampung (20) Segundo.
Maliban dito, nakapagtala pa ang USGS ng mga aftershock ngunit wala pa namang naitatalang pinsala sa naturang lindol.
By Jaymark Dagala
Binigyan na ng go signal ng CHED o Commission on Higher Education ang pagtataas ng matrikula at iba pang bayarin ng halos tatlong daang (300) Higher Education Institutions.
Ayon sa CHED, ang dalawandaan at anim napu’t walong (268) HEIs na magtataas ng matrikula ngayong school year ay labing anim (16) na porsyento lamang ng mahigit isanlibo at anim na raang (1,600) private HEIs sa buong bansa.
Ipinabatid ng CHED na ang pinayagan nilang dagdag sa mismong tuition fee ay halos pitong (7) porsyento o katumbas ng P86.68 kada unit at P243 pesos namang dagdag sa ibang bayarin o other school fees.
Sinabi ng CHED na inaprubahan nila ang application ng HEIs para sa dagdag na matrikula base na rin sa education act of 1982 na nagbibigay ng laya sa private schools na i-determina ang tuition rate nito at iba pang bayarin.
By Judith Larino
Bahagyang nagkatensyon sa isang check point sa Marawi City kahapon makaraang lumusot at hindi huminto ang convoy ng ilang sasakyan duon
Batay sa ipinakitang video footage, dali-daling dumiresto ang convoy ng may dalawang kulay itim na sasakyan papasok sa lugar kung saan mainit ang bakbakan sa pagitan ng militar at ng Maute group
Ayon sa mga Sundalo, mahigpit ang seguridad na kanilang ipinatutupad sa pagpasok sa lungsod at tanging ang may mga pahintulot lamang ang maaaring makapasok
Napag-alamang isang dating konsehal ng lungsod ang may-ari ng nasabing mga sasakyan kung saan, bumalik ito sa check point para ipabatid na kanila lamang iniligtas ang kaniyang lolo na naipit sa gulo sa loob
Dahil dito, pansamantalang hinold ng mga awtoridad ang dating konsehal gayundin ang mga kasama nito para isailalim sa malalimang imbestigasyon.
By: Jaymark Dagala
Ipinagtanggol ni Senador Manny Pacquiao si Pangulong Rodrigo Duterte hinggil sa pagdideklara nito ng Martial Law sa Mindanao
Ayon sa Senador, dapat pa nga aniyang ipagpasalamat ng Pilipinas na mayruon itong matapang na Pangulo na kayang panindigan ang mga kinahaharap na problema ng bansa
Idinepensa rin ni Pacman ang Pangulo hinggil sa umano’y rape joke nito sa pagsasabing hindi lamang naintindihan ang ibig nitong pakahulugan
Giit ni Pacquiao, batid niyang ayaw ng Pangulo na may inaabusong maliliit na tao lalo na ang mga mahihirap kaya’t hindi niya ito hahayaang gawin iyon ng mga sundalo
Sa huli, sinabi ng Senador na suportado niya ang pagdideklara ng Martial Law ng Pangulo at alam aniya nito ang kaniyang ginagawa para sa bayan
By: Jaymark Dagala
Tanging si Pangulong Rodrigo Duterte lamang ang makapagsasabi kung hanggang kailan mananatili ang Martial Law sa Mindanao.
Ito ang pahayag ni National Security Adviser Hermogenes Esperon pagkatapos nilang dumalo sa closed door executive session ng mga Senador kahapon.
Binigyang diin ni Esperon, maliban sa Maute Group na sumasakop ngayon sa Marawi City, may kinahaharap ding banta ang pamahalaan mula sa iba pang mga grupo tulad ng Abu Sayaf, BIFF, NPA at mga sindikato ng droga na nakakalat sa buong Mindanao.
Kasunod nito, nanawagan si Esperon sa publiko na bigyang pagkakataon ang batas militar na maresolba ang kinahaharap na problema ng bansa sa terorismo at masagip ang buhay ng maraming Pilipino.
By: Jaymark Dagala
Tiniyak ni Defense Secretary Delfin Lorenzana sa mga Senador na posible nang magbalik sa normal ang sitwasyon sa Marawi City sa araw ng Biyernes, Hunyo 2.
Ito’y ayon kay Senador Francis Pangilinan makaraan ang isinagawang closed door executive session ng mga Senador kasama ang mga security officials kahapon na tumagal ng apat na oras.
Sa nasabing pulong inilatag nila Lorenzana na siyang Martial Law Administrator, National Security Adviser Hermogenes Esperon at AFP Chief of Staff General Eduardo Año ang kasalukuyang sitwasyon ng operasyon laban sa Maute Terrorist Group.
Bagama’t tiniyak ng AFP sa mga Senador na kontrolado nila ang sitwasyon, iginiit nila na mayruon pa ring pangangailangan na ipagpatuloy ang pag-iral ng Martial Law sa buong Mindanao.
By: Jaymark Dagala
Mariing kinondena ni dating CHR o Commission on Human Rights Chair Loretta Ann Rosales ang mga pekeng balitang nagkalat ngayon sa social media.
Ito’y makaraang mabiktima mismo si Rosales ng mga tinatawag na fake news kung saan, pinalalabas na nakikisimpatiya umano siya sa Maute Terrorist Group na kasalukuyang kumukubkob ngayon sa Marawi City.
Batay sa lumabas na meme o artikulo mula sa iba’t ibang grupo, tutol umano si Rosales sa paggamit ng airstrike laban sa mga terorista at dapat aniyang tratuhin ang mga iyon ng may habag at dignidad.
Sa panayam ng programang “Balita Na, Serbisyo Pa” sa DWIZ, nilinaw ni Rosales na kuha ang larawan sa ikatatlumpung anibersaryo ng CHR nuong Mayo 4 at mula iyon sa ABS-CBN reporter na si Mike Navallos
Pakingan: Bahagi ng panayam ng DWIZ kay dating CHR Chairperson Loretta Rosales
Bagama’t batid naman aniya ng lahat ang kaniyang pagiging human rights advocate, ngunit nilinaw ni Rosales na hindi iyon para sa mga terorista
Pakingan: Bahagi ng panayam ng DWIZ kay dating CHR Chairperson Loretta Rosales
By: Jaymark Dagala / BNSP
Bigo pa ring mapagbotohan ang Tax Reform Package ng Duterte administration kahit pa nasertipikahan ito bilang urgent ng Palasyo.
Ipinaliwanag ni House Majority Leader Rodolfo Fariñas na pinili nila na huwag magbotohan kahapon sa second reading upang mabigyan ng tsansa ang mga Kongresista na mag-interpellate sa nabanggit na panukalang batas.
Sa kabila nito, tiniyak ni Fariñas na ngayong Martes, Marso 30 o kaya’y bukas, Marso 31 bago ang kanilang sine die adjournment ay maipapasa ito sa ikatlo at huling pagbasa.
By: Meann Tanbio
Patay ang dalawang miyembro ng NPA o New People’s Army habang sugatan ang isang sundalo sa nangyaring bakbakan sa Matanao, Davao del Sur kahapon ng umaga.
Ayon kay Lt. Col. Marion Angcao, Commanding Officer ng 73rd Infantry Brigade, tumagal ng 40 minuto ang sagupaan sa Sitio Datal Pital sa Barangay Colonsabak.
Kinilala ang nasugatang sundalo na si Corporal Lovinder John Abantes na kasalukuyang nilalapatan ng lunas sa Davao City.
Narekober naman sa pinangyarihan ng engkwentro ang isang M-14 rifle at M-4 bushmaster rifle.
By: Meann Tanbio