June 2026

Maaaring matanggap na ni Justice Secretary Vitaliano Aguirre hanggang sa susunod na linggo ang affidavit ni Janet Lim Napoles.

Sinabi ni Aguirre na ito ay batay sa pahayag ng abogado ni Napoles na si Atty. Stephen David na malapit nang matapos ang sinumpaang salaysalay ni Napoles na umano’y magdadawit kina Senators Franklin Drilon, Leila de Lima at Antonio Trillanes IV gayundin kay dating Department of Budget and Management o DBM Secretary Butch Abad sa multi-billion peso pork barrel scam.

Sinabi ni Aguirre na ipinaabot sa kanya ng abogado ni Napoles na si Atty. Stephen David na kakasuhan nila sa mga susunod na araw sa DOJ o Department of Justice ang 3 senador at si Abad.

“Ang sabi niya sa akin ang impression ko is either this week or next week eh, a matter of days daw eh sakaling may application for Witness Protection Program ang gagawin namin ay i-aanalyze namin, i-aassess at i-eevaluate kung siya ay kuwalipikado to be under WPP, kung yan naman ay diretsong inihain sa DOJ prosecutors, we are going to start the investigation, most probably we’re going to form a panel.” Ani Aguirre

Tiniyak din ni Aguirre na walang magiging epekto ang panibago nilang imbestigasyon sa mga dating kaso kaugnay sa pork barrel scam na naisampa at nadesisyunan na.

Kasabay nito, nilinaw din ni Aguirre na walang paghihiganti sa nasabing usapin dahil ang mga nagkasala sa batas partikular ang mga aniya’y lumapastangan sa kaban ng bayan ay dapat managot.

“Yung ibang ifa-file ni Janet Napoles na mga kaso sa additional lawmakers ay hindi makakaapekto sa mga naka-file na, kaya’t hindi po tama ang pinapakalat ng ilan na si Janet Lim Napoles in exchange daw sa kanyang pagtestigong ito ay pakakawalan, hindi po siya pakakawalan, mananatili po siyang naka-detine, kung alin ang idinedemanda, kung alin ang nasa affidavit ng mga nag-complain, yun po ang ating iimbestigahan, wala po tayong pipiliin.” Pahayag ni Aguirre

Black propaganda

Samantala, tinawag naman na black propaganda ng dalawang (2) senador ang pagdawit sa kanila ni Janet Lim Napoles sa PDAF scam.

Ayon kay Senador Franklin Drilon, ang nasabing aksyon ni Napoles ay political harassment para mapatahimik ang mga nasa oposisyon.

Tahasan namang inakusahan ni Antonio Trillanes IV si Justice Secretary Vitaliano Aguirre nang pakikisabwatan kay Napoles para idiin ang mga kritiko ng Pangulong Rodrigo Duterte.

Sinabi ni Trillanes na ginagamit ni Aguirre ang kanyang tanggapan para i-harass ang mga miyembro ng oposisyon sa pamamagitan nang pag-imbento ng mga testimonya mula sa mga pekeng convicts o detainees tulad ng NBP drug lords, Kerwin Espinosa at ngayon aniya si Napoles.

Mahigpit ding itinanggi ni De Lima ang pagkakasangkot sa PDAF scam at tanging ang Office of the Ombudsman lamang ang makakapag-desisyon sa isasampang kaso laban sa kanya ni Napoles.

By  Judith Larino | Katrina Valle | Ratsada Balita (Interview) 

Nilinaw ngayon ng Department of Energy o DOE na walang kinalaman sa pagtaas ng mga produktong petrolyo ang idineklarang Martial Law ni Pangulong Rodrigo Duterte sa Mindanao.

Ayon sa DOE, ang ipinatupad na oil price hike ng mga kumpanya ng langis kaninang umaga ay epekto ng paggalaw ng presyo ng langis sa pandaigdigang merkado.

Ipinaliwanag ng DOE na hindi naman nagpo-produce ng sariling langis ang Pilipinas at isandaang (100) porsyento ng kinokonsumong langis sa bansa ay ini-import ng Pilipinas.

Matatandaang knainang umaga, nagpatupad ng umento sa kanilang mga produktong petrolyo ang Flying V, PTT, Seaoil, Eastern Petroleum, Shell, Unioil at Phoenix Petroleum.

Limampu’t limang sentimos (P0.55) ang naging umento sa kada litro ng gasolina, pitumpu’t limang sentimos (P0.75) naman sa diesel habang walumpu’t limang sentimos (P0.85) naman sa kerosene.

Ito na ang ikatlong linggong nagpatupad ng oil price increase ang mga kumpaniya ng langis sa loob lamang ng nakalipas na tatlong linggo.

By Jaymark Dagala  / Ralph Obina

Nais ni MMDA o Metropolitan Manila Development Authority Chairman Danilo Lim na muling buhayin ang pagkakaroon ng kultura ng disiplina ng mga mamamayan para sa mas maayos na pagpapatupad ng mga batas trapiko.

Kung iisipin aniya ay simple at madali lang ang pagsunod sa mga batas trapiko.

“Ang traffic problem natin ay malala talaga yan, sabi ko magsimula muna tayo sa basic, anong ibig sabihin niyan, yung basic implementation ng batas trapiko, ng traffic rules and regulations, kung ang sasakyan ay hindi dapat nasa lansangan, dapat wala yan diyan, kung no parking area dapat walang nakaparada diyan, yung mga nakakasagabal sa lansangan dapat wala yan, let’s go back to basic implementation, sustained, tuluy-tuloy at seryosong pag-iimplementa ng mga batas trapiko. Let us develop yung pag-respeto sa batas, nang makapag-umpisa tayo ng culture of discipline. Implementasyon, pagsunod, pagrespeto, disiplina, kahit paano may kaayusan na unti-unting maibabalik sa ating mga lansangan.” Ani Lim

Maari rin aniyang sumailalim sa retraining ang mga constable para magkaroon ng disiplinang militar.

“Kapag sinabi nating disiplina, disiplina para sa lahat, hindi lang sa mga motorista, pedestrians, traffic enforcers, para sa lahat. Yung mga kasama naman natin bago nade-deploy yan ay dumadaan sa training, makakatulong din kung every now and then ay magkakaroon sila ng training at in the process ay bigyan natin ng disiplinang militar.” Dagdag ni Lim

Kasabay nito ay tiniyak rin ni Lim na agad na aaksyunan ang anumang klaseng katiwalian sa kanyang kagawaran.

Si Lim ay isa sa mga dating military officials na in-appoint ni Pangulong Duterte sa kanyang administrasyon.

Nagsilbi rin itong Deputy Commissioner ng Customs sa ilalim ng Aquino administration ngunit nagbitiw sa puwesto noong 2013.

Noong 2006 ay nakulong si Lim dahil sa pagkakasangkot sa pagpaplano ng kudeta laban kay dating Pangulong Gloria Macapagal Arroyo at napabilang rin sa kudeta laban kay dating Pangulong Corazon Aquino noong 1989.

By  Katrina Valle | Ratsada Balita (Interview) | AR