June 2026

Tiniyak ni bagong DENR Secretary Roy Cimatu na po-protektahan niya ang kalikasan mula sa pagmimina at iba pa sa kanyang pag-upo sa kagawaran.

Sa kanyang acceptance speech matapos  isalin ni outgoing DENR Secretary Gina Lopez  ang bandila ng kagawaran kay Secretary Cimatu, sinabi ng bagong kalihim na sisikapin niyang magampanan ang tungkuling iniatas sa kanya ni Pangulong Rodrigo Duterte.

Tinukoy pa ni Cimatu ang kanyang tatlong p na panuntunan sa panunungkulan sa gobyerno, ang una ay ang proteksyon sa sangkatauhan laban sa kalaban ng estado; proteksyon sa mga Overseas Filipino Workers at panghuli ay proteksyon sa kalikasan.

Nakahanda rin aniya siyang makinig at gamitin  ang kapangyarihan  at pondo ng DENR  para matugunan ang mga concern ng iba’t ibang sektor .

Kasabay nito, hinimok ni Cimatu ang lahat ng puwersa ng DENR mula sa mga matataas na opisyal ng kagawaran,  mga ranger, mga forester, geologist at maging ang janitor na makipagtulungan sa kanyang liderato para sa maayos na pangangasiwa sa kagawaran.

By: Meann Tanbio

Magiging personal nurse ni Pangulong  Rodrigo Duterte  ang  kanyang  common-law wife  na  si Honeylet  Avanceña  sa  kanyang  biyahe sa  Cambodia, Hongkong  at China.

Kasama si Honeylet at anak na si Kitty  nang  umalis  kahapon  ang  Pangulo patungong  Cambodia  para  dumalo sa World  Economic  Forum.

Ayon sa  Pangulo, dahil bakasyon naman ng anak na si Kitty, magkakaroon sila ng saglit  na “bonding time” habang  personal  na pangangasiwaan  ni Honeylet  ang  pag-inom nito ng mga  gamot.

Sinabi  ng  Pangulo na hindi siya komportable sa  pagpasok-pasok ng  mga  police  nurse sa kanyang  kuwarto at  mas  gusto niyang  si Honeylet  ang  magpainom ng  kanyang  mga  gamot.

Ang maybahay ng Pangulo ay isang professional nurse na  nagtrabaho noon sa  Estados Unidos.

By Meann Tanbio |With Report from Aileen Taliping

Suportado ng mga senador ang pagtatalaga ni Pangulong Rodrigo Duterte kay Senador Alan Peter Cayetano bilang bagong kalihim ng Department of Foreign Affairs o DFA.

Ayon kay Senate President Pro-Tempore Ralph Recto, naniniwala siya sa kakayanan ni Cayetano para pamunuan ang DFA at tiyak aniyang malaki ang maitutulong nito sa Pangulo at sa sambayanang  Pilipino.

Iginiit naman ni Senate Majority Floorleader Vicente “Tito” Sotto III na good choice ang pagtatalaga kay Cayetano sa DFA

Samantala, hindi na ikinagulat ni Senador Francis Escudero ang pagkakatalaga kay Cayetano bilang DFA Secretary dahil matagal na itong binabanggit ng Pangulo.

Senador Lacson planong ipakumpirma si DFA Sec. Cayetano by acclamation

Plano ni Senate Committee on Foreign Affairs Chairman Panfilo Lacson na hingin ang permiso ng mayorya ng miyembro ng Commission on Appointments o CA para ikumpirma si bagong DFA Secretary Alan Peter Cayetano by acclamation.

Ibig sabihin, maaaring isuspinde na ang ipinaiiral na rules ng CA at huwag nang obligahing magpasa si Cayetano ng mga kaukulang requirements.

Paliwanag ni Lacson, ito’y bilang courtesy kay Cayetano bilang kapwa mambabatas at bilang miyembro na rin ng CA.

Nais aniya niyang agarang makumpirma si Cayetano para agad itong opisyal na makaupo bilang kalihim ng DFA, dahil nomination at hindi appointment ang ginawa sa pagtatalaga sa kanya sa pwesto.

Lumilitaw na maaari lamang maupo si Cayetano sa DFA kapag nakumpirma na.

By Meann Tanbio |With Report from Cely Bueno