June 2026

Itinatag ang isang Inter-Agency Task Group sa Palawan para tiyakin na hindi makapanggugulo roon ang anumang teroristang grupo.

Tugon ito ng mga otoridad sa umano’y banta ng terorismo makaraang maglabas ng travel advisories ang embahada ng Amerika at United Kingdom.

Ipinabatid ni Armed Forces of the Philippines o AFP Western Command Chief Lt. Gen. Raul Del Rosario na nagpulong na ang mga bumubuo sa inter-agency task group kabilang na ang Philippine National Police (PNP), Philippine Coast Guard (PCG) at lokal na pamahalaan ng Palawan.

Kinumpirma ni Del Rosario na nakausap na nila ang mga Muslim leader sa lugar, mga negosyante at resort owners kung saan hinikayat ang mga ito na makipagtulungan sa mga otoridad para hindi magtagumpay ang mga terorista sa kanilang masamang balakin.

By Meann Tanbio |With Report from Jonathan Andal

Binasahan na ng sakdal si dating Vice President Jejomar Binay sa ikatlong dibisyon ng Sandiganbayan.

Ito ay para sa kanyang mga kinakaharap na kasong falsification of public documents, graft, malversation of public funds kaugnay sa mga umano’y maanomalyang transaksyon para sa pagtatayo ng Makati City Hall Building 2.

Ang conditional arraignment ay upang makapag pasya na ang Korte kung papayagan siyang makabiyahe patungo sa Israel sa Mayo 15 hanggang 29, para sa isang pilgrimage.

By Katrina Valle |With Report from Jill Resontoc

Dapat payagan na ng pamahalaan na mag imbestiga sa  alegasyong mga extra judicial killings o EJK si UN Rapporteur Agnes Callamard.

Ayon kay Senate President Koko Pimentel, ganito ang tamang attitude kung wala namang itinatago ang Pilipinas at walang katotohanan ang mga paratang na EJK.

Ginawa ni Pimentel ang pahayag makaraang batikusin ng  maraming bansang kasapi ng United Nations Human Rights Committee  ang anila’y hindi nakabase sa reyalidad na report ng Pilipinas sa sitwasyon ng karapatang pantao sa Pilipinas.

By Len Aguirre |With Report from Cely Bueno

Lusot na sa House Committee on Population and Family Relations ang panukalang National ID System.

Layon nito na magkaroon na lamang ng iisang government ID ang bawat Pilipino.

Sa ilalim ng panukala, ang bawat Pilipino na may edad 18 pataas ay obligadong kumuha ng National ID.

Libre itong ibibigay ng gobyerno sa unang pagkakataon subalit may kaukulang bayad kapag magpapa-reissue ng ID.

Inaatasan sa panukalang batas ang Philippine Statistics Authority o PSA na syang maging repository o tagapangalaga ng lahat ng personal na datos para sa National ID at bawal itong ilabas nang walang permiso.

Sinuman ang magbigay ng maling impormasyon ay maaring makulong ng mula 6 na buwan hanggang dalawang (2) taon at magmulta ng mula animnapung (60) libo hanggang dalawandaang (200) libong piso.

Ang panukalang National ID ay idi-diretso na sa House Appropriations Committee upang mapondohan bago i-akyat sa plenaryo.

By Len Aguirre

Sasampahan na ng ethics complaint ng isang grupo ng kababaihan si Senador Tito Sotto, kaugnay sa kanyang binitiwang hindi magandang biro kay DSWD Secretary Judy Taguiwalo tungkol sa pagiging solo parent.

Hiniling din ng grupo kay Sotto na mag – inhibit bilang chairman ng komite, para matalakay ng maayos ang kanilang reklamo.

Nagpahayag naman ng kahandaan si Ethics Committee Vice Chairman Ping Lacson na hawakan ang reklamo, sakaling ito ay ibigay sa kanya.

By Katrina Valle |With Report from Cely Bueno