June 2026

Hindi na biro ang pag-akyat sa halos isanlibo (1,000) ang bilang ng kaso ng Human Immunodeficiency Virus/ Acquired Immune Deficiency Syndrome o HIV/AIDS sa bansa na naitala noong Marso.

Ayon kay Health Assistant Secretary at Spokesman Eric Tayag, mas nakaaalarma ang sitwasyon ng HIV/AIDS cases ngayon lalo’t tila hindi mapigilan ang pagsirit ng bilang ng nagkakasakit sa nakalipas na mahigit tatlong dekada.

Nangangahulugan anya ito na nasa tatlumpung (30) kaso ng nabanggit na sakit ang naitatala kada araw sa iba’t ibang panig ng bansa.

Aminado naman si Tayag na isang malaking hamon para sa gobyerno ang pagkakaloob ng libreng medical attention sa mga nagkakaroon ng HIV/ AIDS.

“1 out of 3 HIV cases ay nasa 15-24 years old, may mga menor de edad, nagpapaalala sa publiko ang panganib na andiyan patungkol sa pagkalat ng HIV. Sa katunayan nasa halos 20,000 na ang nabibigyan natin ng libreng gamot, tataas pa po yan, malaking gastusin yan para sa pamahalaan kapag hindi natin napababa ang pagdami ng kaso ng HIV sa bansa, ang dapat nating tutukan ay ang kaalaman ng mga kabataan.” Pahayag ni Tayag

By Drew Nacino | Balitang Todong Lakas (Interview)

Nagpalabas ng shoot on site order si Pangulong Rodrigo Duterte sa mga teroristang nagpaplanong manggulo sa Palawan at sa iba pang bahagi ng bansa.

Kasunod ito ng inilabas na travel advisory ng Amerika, United Kingdom at Canada na nagbabawal sa kanilang mga mamamayan na magtungo sa ilang mga lugar sa bansa dahil sa banta ng terorismo.

Sa departure speech ng Pangulo bago ang kanyang biyahe sa Cambodia, sinabi nito na dapat na hindi na payagang mabuhay pa ang naturang mga terorista dahil idinudulot nitong takot at panganib sa kaayusan at kapayapaan ng bansa.

PAKINGGAN: Bahagi ng pahayag ni Pangulong Rodrigo Duterte

By  Rianne Briones

Bumaba ang trust rating ni Vice President Leni Robredo sa unang quarter ng taong ito.

Ayon sa survey ng SWS o Social Weather Stations, 55% ng mga Pilipino ang nagsabing may “much trust sila kay Robredo, 25% ang mayroong ‘little trust’ at 20% ang undecided.

Dahil dito, ang net trust rating ni Robredo ay good plus 30 o 15 points na mababa mula sa plus 45 na nakuha nito noong December 2016 kung saan 62% ng respondents ang nagsabing may ‘much trust’ sila sa Bise Presidente at 18% ang ‘little trust’.

Isinagawa ang naturang survey noong March 25 hanggang 28 gamit ang face to face interviews sa 1, 200 respondents sa buong bansa.

By  Judith Larino

Lusot na sa House Committee on Population and Family Relations ang panukalang National ID system na naglalayong magkaroon na lamang ng iisang government ID ang bawat Pilipino.

Nakasaad sa panukala ang obligasyon ng mga Pilipinong nasa 18-taong gulang pataas na kumuha ng national ID na libreng ibibigay ng gobyerno sa unang pagkakataon subalit may bayad na kapag mapapa-reissue nito.

Batay pa nasabing panukala, ang PSA o Philippine Statistics Authority ang magiging repository o tagapangalaga ng lahat ng personal na datos para sa national ID at bawal itong ilabas ng walang permiso.

Makukulong ng hanggang dalawang (2) taon at magmumulta ng hanggang dalawandaang libong piso (P200,000) ang sinumang magbibigay ng maling impormasyon.

Ang panukalang national ID ay ididiretso na sa House Appropriations Committee para mapondohan bago iakyat sa plenaryo.

Samantala, pinalagan ni Bayan Muna Partylist Representative Carlos Zarate ang panukalang national ID o identification card system.

Kasunod ito ng pagkakapasa ng naturang panukalang batas sa committee level ng Kamara.

Ayon kay Zarate, kung sakali ay maaari itong gamitin para lumabag sa right to privacy ng mga mamamayan.

Posible rin aniyang magamit sa iba ang mga impormasyon dahil isang American based firm ang humahawak ng Civil Registry Records ng Philippine Statistics Office.

Hindi rin tiwala rin si Zarate kung kakayanin ng gobyerno na maproseso at maprotektahan ang mga maseselang impormasyon.

By Judith Larino | Rianne Briones

Nanawagan ang Save Sulu Movement kay Pangulong Rodrigo Duterte na magdeklara ng Martial Law sa anim (6) na munisipalidad ng Sulu.

Tinukoy ni Professor Octavio Dinampo, tagapagsalita ng grupo, ang mga bayan ng Patikul, Indanan, Parang, Maimbung, Talipao, Kalingalan Caluang na sinasabing binabalot ng terorismo.

Hinikayat din ng grupo ang Senado na imbestigahan ang nangyayaring ugnayan ng mga pulitiko at Abu Sayyaf Group.

Umapela rin ang mga ito sa Kongreso na gawing kasong krimen ang pagbabayad at pagtanggap ng ransom.

By Rianne Briones