June 2026

Hindi na tatanggap ng anumang unsolicited proposals ang Department of Transportation para sa Operations and Maintenance ng Clark International Airport sa Pampanga.

Ito ang inihayag ni Transportation Secretary Arthur Tugade na nagsabing babalikatin na ng pamahalaan ang pagdedevelop, pagsasaayos at pagkukumpuni sa naturang paliparan.

Kadalasan aniya kasing nauuwi sa pagsasampa ng kaso ng mga natatalong bidder ang pagbubukas ng mga proyekto sa pribadong sektor kaya’t laging nababalam ang mga ito.

Kasunod nito, sinabi ni Tugade na aabisuhan nila ang kumpaniyang Megawide – GMR at JG Summit – Filinvest na siyang developer ng Clark Airport hinggil sa bagong panuntunan na ito ng kagawaran.

By: Jaymark Dagala

Doble higpit na ngayon ang ipinatutupad sa Fatima sa Portugal kasabay ng nakatakdang pagbisita ruon ni Pope Francis.

Ito’y para pangunahan ang Canonization Rites sa dalawang batang pastol na sina Franciso at Jacinta na pinagpakitaan ng Birheng Maria, 100 taon na ang nakalilipas.

Tinatayang aabot sa isang milyong mga deboto ang dadalo sa nasabing pagdiriwang lalo pa’t ipagdiriwang din ang sentenaryo o ika-isandaang taon ng aparisyon ng Birheng Maria Bukas, Mayo 13.

Bukod sa pinangangambahang pag-atake ng mga extremist, nais ding makatiyak ng Portuguese government na ligtas mula sa anumang tangkang asasinasyon ang Santo Papa.

Magugunitang tinangkang patayin ng isang Spanish fundamentalist priest ang ngayo’y santo nang si Pope John Paul II nuong 1982 gamit ang bayoneta.

By: Jaymark Dagala

Hinimok ni Pangulong Rodrigo Duterte ang mga ASEAN leader na dumadalo sa World Economic Forum sa Cambodia na maging partners para sa positibong pagbabago sa rehiyong Asya.

Sa kanyang talumpati sa nabanggit na aktibidad, inihayag ni Pangulong Duterte na mahalaga ang pagkakaisa para sa hinahangad na pag-unlad sa Asya.

Ang ASEAN anya ay unti-unti ng nakikilala bilang “emerging economic powerhouse“, pang-6 sa may pinaka-malaking ekonomiya at pangatlo sa pinakamalaking consumer base.

Sa kabila ng nakikitang positibong pagsulong ng ASEAN, aminado ang   Pangulo na    may mga balakid   at hamon lalo na sa kinabukasan ng mga kabataan gaya ng iligal na droga at trans-national crimes na nagiging banta rin sa pag-unlad.

Dahil dito, hinimok ni Pangulong Duterte ang sampung (10) ASEAN members na panindigan ang kanilang commitment na maging   drug free ASEAN community.

 By Drew Nacino |With Report from Aileen Taliping

Dapat munang magbitiw sa senado ni Senator Alan Peter Cayetano matapos siyang italaga ni Pangulong Rodrigo Duterte bilang bagong kalihim ng Department of Foreign Affairs o DFA.

Ayon kay Senador Chiz Escudero,  hindi lubusang magagampanan ni  Cayetano ang posisyon bilang kalihim ng DFA  hangga’t hindi ito nagbibitiw bilang senador at  hindi nakukumpirma sa Commission on Appointments (CA).

Kung hindi pa anya magbibitiw bilang mambabatas si Cayetano at nakalulusot sa CA ay ang  kasalukuyang Acting Secretary pa rin  ang  mamumuno at mangangasiwa sa kagawaran.

Gayunman, karaniwang hinihintay muna na makumpirma sa CA bago nagbibitiw ang isang mambabatas  para maiwasang mangyari na nawala na sa posisyon bilang senador hindi pa natuloy sa pagiging cabinet secretary  sakaling ma-reject o di makumpirma sa komisyon.

Bagaman  magkukulang ang miyembro ng senado sa pag-upo ni  Cayetano sa DFA, ipinaliwanag ni  Escudero na malabo ng magpatawag pa ng special elections  dahil malaki ang magagastos bukod pa sa dalawang (2) taon lang ang natitirang termino ni Cayetano.

Mga militar karaniwang natatatalaga sa gabinete ng nakaupong Pangulo  dahil sa malawak na karanasan

May malawak na  karanasan ang militar lalo na ang mga naging heneral at Armed Forces of the Philippines o AFP Chief of Staff.

Ito, ayon  kay Senador Chiz Escudero,  ang dahilan kaya’t karaniwang nagtatalaga ng mga militar sa  gabinete ang mga nakaupong Pangulo.

Bukod dito, inihayag ni Escudero na napaka-agang nagreretiro ang mga military general  maging ang PNP officials kaya’t kadalasang nagigng opsyon ng Pangulo ang paghirang at pagtatalaga sa mga ito sa iba’t ibang posisyon sa pamahalaan.

Ilan sa mga military general na nabigyan ng posisyon sa Duterte administration ay sina National Security Adviser Hermogenes Esperon, Acting Environment Secretary Roy Cimatu at  AFP Chief of Staff Eduardo Año na itinalaga bilang Interior Secretary.

By Drew Nacino |With Report from Cely Bueno