June 2026

Nagpatupad na ang DTI o Department of Trade and Insdustry ng price freeze sa mga pangunahing bilihin sa Mindanao matapos isailalim sa martial law ni Pangulong Rodrigo Duterte ang rehiyon.

Ayon sa DTI, sakop ng price freeze ang regions 9, 10, 11, 12 at Caraga.

Sa ilalim ng Section 6 ng Republic Act 7581 o “The Price Act“, ang sinumang lalabag dito ay pagmumultahin ng P5,000.00 hanggang P1-M o pagkakabilanggo ng isa hanggang sampung (10) taon.

By Meann Tanbio

Mahigpit na pinababantayan ng gobyerno ang mga energy installation sa Mindanao dahil sa posibilidad na targetin ito ng mga terorista, kasunod ng deklarasyon ng martial law sa naturang rehiyon.

Sinabi ni Pangulong Rodrigo Duterte na hindi inaalis ang posibilidad na tangkaing pasabugin ng mga local terrorist group ang tower ng mga planta na nagsusuplay ng kuryente sa buong Mindanao.

Ipinabatid naman ni Energy Secretary Alfonso Cusi na humingi na siya ng tulong sa Department of National Defense o DND para mabantayan ang energy facilities sa Mindanao tulad ng power plant, transmission system, distribution facilities, oil depot at iba pa.

Agad na bumuo ang Department of Energy (DOE) ng inter-agency task force on securing energy facilities matapos pumutok ang kaguluhan sa Marawi City.

By Meann Tanbio | With Report from Aileen Taliping

Sapat ang suplay ng bigas sa buong Marawi City.

Ayon sa NFA o National Food Authority, sa kasalukuyan ay mayroong stock na tatlumpu’t walong libong (38,000) sako ng bigas ang ahensya sa marawi na sapat na sapat para sa residente doon sa susunod na limang (5) araw.

Idinagdag pa ng NFA na maging ang buong Mindanao region ay may sapat na buffer stock ng bigas na aabot sa 1.5 milyong sako.

Kaugnay nito, sinabi ni NFA Spokesperson Cynthia Suarez na tiniyak mismo ng kanilang pamunuan na hindi kakapusin sa pagkain ang Marawi City, sa kabila ng krisis na dinaranas nito dahil sa paglusob ng mga miyembro ng Abu Sayyaf group at Maute terror group.

By Meann Tanbio

Kabuuang sampung (10) kasunduan ang nilagdaan ng Pilipinas at Russia matapos ang maikling pagbisita ni Pangulong Rodrigo Duterte sa Moscow.

Naganap ang paglagda ng mga kasunduan noong Miyerkules, Mayo 24 sa pagitan ng mga cabinet official sa pangunguna ni Foreign Affairs Secretary Alan Peter Cayetano at kanilang mga Russian counterpart.

Kabilang sa mga sinelyuhan ang Defense Cooperation Agreement; Tourism Joint Action Program; Memorandum of Understanding on Agriculture Cooperation at Cooperation on Transportation.

Inihayag naman ni Cayetano na kailangan munang magpadala ng Pilipinas ng “shopping list” ng mga defense equipment na bibilhin sa Russia.

By Drew Nacino

Hawak na ng senado ang kopya ng deklarasyon ng martial law at pagsuspinde ng writ of habeas corpus sa buong Mindanao.

Ito ang Proclamation 216 na may titulong “Declaring A State of Martial Law and Suspending the Privilege Of Habeas Corpus In the Whole of Mindanao”.

Natanggap ito ng tanggapan ni Senate President Koko Pimentel mula sa Malakanyang, mag-a-alas-10:00 Miyerkules ng gabi.

Nakapaloob sa proklamasyon ang mga naging batayan ng desisyon ni Pangulong Rodrigo Duterte na magdeklara ng batas militar at suspendihin ang privilege of writ of habeas corpus.

Una ng inihayag ng mga senador na nais nilang matiyak na hindi ma-aabuso ng mga pulis at sundalo ang idineklarang Martial Law sa Mindanao.

By Drew Nacino | With Report from Cely Bueno

Handa na ang 1.8 bilyong Muslim sa iba’t ibang panig ng mundo para sa  buwan ng Ramadan na magsisimula sa Biyernes, Mayo 26.

Matinding seguridad na ang ipinatutupad ng Saudi Arabia sa banal na lungsod ng Meccah at Medina para sa pagdagsa ng milyun-milyong pilgrims.

Tinututukan na rin ng Saudi government ang iba’t ibang paliparan  maging ang mga border ng kaharian para sa pagtawid ng mga pilgrim mula Iraq, Jordan, Kuwait, United Arab Emirates o UAE, Oman at Yemen.

Ang Ramadan ang ika-9 na buwan ng Islamic calendar na magtatapos naman sa Hunyo 24 kasabay naman ng pagdiriwang ng Eid’l Fitr.

Tradisyon na sa mga Muslim na mag-ayuno at umiwas muna sa pagkain, paginom, paninigarilyo at pakikipagtalik bago mag-bukang liwayway hanggang takipsilim.

Samantala, nilinaw ng Malakanyang na wala silang inilalabas na anumang proklamasyon na  special non-working day ang pagsisimula ng Ramadan.

By Drew Nacino