June 2026

Niyanig ng magnitude 5.4 na lindol ang Central Luzon na naramdaman hanggang sa Metro Manila at ilang bahaging katimugang Luzon

Naitala ng PHIVOLCS ang sentro ng nasabing pagyanig 12 kilometro silangan ng bayan ng San Marcelino sa Zambales dakong alas 10:27 kagabi

Sa panayam ng DWIZ kay Tom Simborio, Science Research Analyst ng PHIVOLCS, Tectonic ang pinagmulan ng pagyanig at may lalim itong 88 kilometro mula sa episentro nito

Naitala ng PHIVOLCS ang Intensity 4 sa Quezon City, Marikina at Pateros sa Metro Manila gayundin sa Malolos City sa Bulacan

Intensity 3 ang naramdaman sa Pasay, Makati Mandaluyong, Manila, Parañaque at Taguig gayundin sa San Miguel sa Tarlac, Marilao at San Jose Del Monte sa Bulacan maging sa Tagaytay City sa Cavite

Intensity 2 ang naramdaman sa Palayan City sa Nueva Ecija, San Jacinto sa Pangasinan gayundin sa Bacoor sa Cavite habang intensity 1 naman sa Sinait sa Ilocos Sur

Wala namang nasaktan o naitalang pinsala ang nasabing pagyanig at hindi rin nagpalabas ng Tsunami warning ang PHIVOLCS hinggil dito

Gayunman muling nakaramdam ng magnitude 2.3 na aftershock ang bayan ng San Marcelino mahigit dalawampung minuto mula nang maitala ang unang pagyanig.

By: Jaymark Dagala

Naisumite na ni Pangulong Rodrigo Duterte kay House Speaker Pantaleon Alvarez ang report kaugnay sa deklarasyon ng Martial Law sa Mindanao.

Alas-9:41 kagabi nang matanggap ni Alvarez ang nasabing report.

Samantala, napasakamay na rin ni Senate President Aquilino “koko” Pimentel ang naturang report alas-9:55 kagabi.

Sa ilalim ng saligang batas, ang Pangulo ay mayroong 48 oras para ipaliwanag sa Kongreso ang nilalaman ng deklarasyon ng martial law.

Martes ng gabi nang isailalim sa batas militar ng Pangulo ang Mindanao kasunod ng nangyaring bakbakan sa pagitan ng militar at Maute group sa Marawi City.

By: Meann Tanbio / Jill Resontoc

Naka-half mast ngayon ang bandila ng Pilipinas sa Senado.

Ito’y dahil sa pagpanaw ni dating Senador Eva Estrada-Kalaw sa edad na 96.

Nakatakdang dalhin sa Senado ang labi ni Kalaw sa Huwebes, June 1 para sa Neurological Service.

Si Kalaw ay nagsilbing Senador mula 1965 hanggang 1972, at ang kauna-unahang babae na na-re elect sa mataas na kapulungan.

By: Meann Tanbio / Cely Bueno

Nais ni Senate President Aquilino “koko” Pimentel na magpatawag ng majority caucus sa weekend at all Senators Caucus sa Lunes, Mayo 29.

Ito’y para malaman ang sentimiyento ng mga Senador may kaugnay pa rin sa idineklarang martial law sa Mindanao ni Pangulong Rodrigo Duterte.

Ayon kay Pimentel, sa ngayon ay halos wala naman siyang naririnig na nagbabalak isulong na i-revoke ang batas militar sa Mindanao.

Mayroon lang aniyang ilan na nagsasabi na dapat bantayan ang posibleng pag-abuso ng mga otoridad.

By: Meann Tanbio

Patay ang dalawang (2) police official matapos ang nangyaring engkwentro sa pagitan ng government security forces at mga miyembro ng Maute group sa Marawi City.

Kinilala ni Philippine National Police o PNP Spokesman Sr. Supt. Dionardo Carlos ang mga nasawi na sina Senior Insp. Freddie Solar (Chief of Police ng Saguiran Police sa Lanao del Sur) at Senior Insp. Edwin Placido (hepe ng Marawi Police).

Ipinabatid ni Carlos na wala pa silang hawak na impormasyon tungkol sa sinabi ni Pangulong Rodrigo Duterte na may napugutang pulis sa Marawi.

Samantala, sinabi ni Carlos na bagamat totoo na inatake ng mga teorista ang istasyon ng pulisya sa Marawi, wala naman aniya silang natatanggap na anumang report hinggil sa umano’y pagsunog at pagkubkob ng mga ito sa nasabing istasyon.

Publiko hindi dapat mangamba sa deklarasyon ng martial law sa Mindanao

Umapela ang PNP o Philippine National Police sa publiko na huwag mangamba sa deklarasyon ng martial law sa Mindanao, kasabay ng pagtitiyak na hindi aabuso sa kapangyarihan ang mga pulis.

Ayon kay Chief Insp. Jose Najera ng PNP Legal Service, walang mababago sa ipinaiiral na sistema ng pulisya kahit pa may batas militar.

Sa ngayon, may nakahandang memorandum ang PNP na naglalaman ng guidelines ng mga dapat at hindi dapat gawin ng mga pulis sa ilalim ng martial law.

Ilan sa nakasaad sa draft ng guidelines ay dapat walang warrantless arrest, maliban na lamang kung naaktuhang may ginagawang krimen.

Hindi rin maaaring ikulong ng lagpas ng tatlong araw ang sinumang akusado at dapat pairalin ang police operational procedure.

By Meann Tanbio | With Report from Jonathan Andal