Sinelyuhan na ng Pilipinas at Russia ang ilang mahahalagang kasunduan na inaasahang malaki ang maitutulong para sa pagpapalago ng ekonomiya at ugnayang panlabas.
Ito’y bilang bahagi ng dapat sana’y apat (4) na araw na pagbisita sa Russia ni Pangulong Rodrigo Duterte na naputol dahil sa nangyaring bakbakan sa Marawi City kamakailan.
Kabilang sa mga kasunduang nilagdaan nila Foreign Affairs Secretary Alan Peter Cayetano at Russian Foreign Minister Sergey Larvrov ang hinggil sa defense cooperation, nuclear energy, tourism, agriculture, trade and industry, foreign affairs, transportation maging ang culture and arts.
Kasunod nito, inihayag ni Cayetano na walang nasayang na pagkakataon sa maikling bilateral meeting sa pagitan nila Pangulong Rodrigo Duterte at Russian President Vladimir Putin dahil halos lahat aniya ng mga nilagdaang kasunduan ay natalakay sa nasabing pagpupulong.
Defense equipment
Samantala, pinasusumite na ng Russia ang listahan ng mga defense equipment na balak bilhin ng Pilipinas kasunod ng inihirit na soft loan ni Pangulong Rodrigo Duterte kay Russian President Vladimir Putin.
Ayon kay Foreign Affairs Secretary Alan Peter Cayetano, handang handa ang Russian government na pagbigyan ang request ni Pangulong Duterte.
Katunayan nito ay hinihintay na ng Russian Federation ang proposal ng bansa sa mga kukuning baril at iba pang military equipment.
Bagama’t hindi binanggit kung napagbigyan na ang soft loan na hiling ng Pangulo, sinabi ni Cayetano na handa ang Russia na tumulong sa mga bansang itinuturing nitong kaibigan.
Bansang Russia ang tinakbuhan ni Pangulong Rodrigo Duterte matapos na itigil ng Amerika ang pagbebenta ng baril sa Pilipinas matapos na kwestyunin ang paglobo ng mga kaso ng human rights violation sa bansa.
By Jaymark Dagala / Rianne Briones
Sugatan ang dating Greek Prime Minister at dalawang (2) iba pa matapos na makatanggap ng isang bomb letter.
Ayon sa ulat ng Greece Police, puno ng sugat ang mukha, dibdib, hita at braso ni Prime Minister Lucas Papademos matapos nitong buksan ang isang sulat sa loob ng kanyang sasakyan.
Dinala ang dating lider sa Evaneglismos Athens General Hospital kung saan siya isinailalim sa operasyon dahil sa tindi ng tinamong sugat.
Nilapatan din ng lunas ang drayber ni Papademos at isa pang kasama na natamo rin ng matinding pinsala.
Patuloy naman ang ginagawang imbestigasyon ng mga awtoridad para matukoy kung sino ang nasa likod ng pag- atake sa dating opisyal.
By Rianne Briones
Gustuhin man ni Kapuso primetime queen Marian Rivera na magkaroon ng isa pang baby ay sinabi ni ‘Yan-Yan’ na hindi pa ito ang tamang panahon para sundan nila ng asawang si Dingdong Dantes ang panganay nilang si Baby Zia.
Ayon kay Marian, magtatrabaho muna siya dahil halos dalawang taon siyang nagpahinga.
Bukod sa kailangan niyang magtrabaho na kabilang ang isang soap opera, ipinabatid ni Marian na kailangan din niyang bigyan ng space ang sarili.
Tiyak aniyang mamimiss niya si Baby Zia dahil magdamagan ang taping sa soap subalit kampante naman siya dahil si Dingdong ang magbabantay sa kanilang unica hija kapag nasa trabaho siya.
Ang Kapuso primetime queen ay napapanuod sa Sunday Pinasaya at bagong drama anthology na “Tadhana”.
By Judith Larino
Photo: Screenshot from marianrivera / Instagram
Itinuturing na milestone ng DOT o Department of Tourism ang nilagdaang kasunduan ng Pilipinas at Russia na naglalayong mapalakas ang turismo ng dalawang bansa.
Ito’y makaraang lagdaan ni Tourism Secretary Wanda Tulfo – Teo at ng Federal Agency of Tourism ng Russia ang joint action program of Tourism Cooperation.
Nakasaad sa nasabing kasunduan ang pagpapalitan ng impormasyon ng Russia at Pilipinas na may kaugnayan sa seguridad ng mga mamamayan nito na tutungo sa mga nabanggit na bansa.
Ayon kay Secreatary Teo, indikasyon lamang aniya ng nasabing kasunduan ang kumpiyansa ng Russia sa kakayahan ng Pilipinas na maresolba ang peace and order issues nito.
Bagama’t interesado ang mga Ruso na bumisita sa Pilipinas dahil sa napakagandang klima, ngunit kinakailangan nilang matiyak na ligtas sila sa mga pupuntahan nilang destinasyon.
By: Jaymark Dagala
Walang nakikitang dahilan si Surigao Del Norte Rep. Robert Ace Barbers para hindi giyerahin ng pamahalaan ang Maute Terrorist Group na kumubkob sa Marawi City simula nuong Martes.
Ito ang reaksyon ni Barbers kasunod ng pagdideklara ni Pangulong Rodrigo Duterte ng batas militar sa buong isla ng Mindanao kabilang na ang Sulu at Tawi-Tawi.
Ayon kay Barbers, sapat na ang mga nagbuwis ng buhay para sa kapayapaan ng bayan kaya’t hindi na dapat pang hayaan na madagdagan pa ang mga pinsalang dulot ng nasabing pag-atake.
Kinakailangan din aniyang maging proactive ang mga awtoridad upang hindi na lumawak o kumalat pa sa ibang lugar sa Mindanao ang mga bandido.
By: Jaymark Dagala
Nasa maayos nang kalagayan ang tinatayang nasa 600 mga mag-aaral ng Mindanao State University.
Ito’y makaraang ma-trap ang mga ito sa loob ng naturang pamantasan sa kasagsagan ng bakbakan sa pagitan ng militar at ng Maute Terrorist Group sa Marawi City.
Ayon kay Lt/Col. Jo-Ar Herrera, tagapagsalita ng 1st infantry division ng Philippine Army, nai-uwi na ng ipinadala nilang sasakyan ang mga mag-aaral makaraang matiyak na wala sa paligid ng unibersidad ang mga bandido.
Gayunman, kinakailangang maisailalim sa stress debriefing ang ilan sa mga mag-aaral dahil sa matinding trauma na kanilang inabot sa kasagsagan ng bakbakan.
By: Jaymark Dagala
Tiwala si Senador Francis Escudero na nais lamang bigyang diin ni Pangulong Rodrigo Duterte ang kaniyang kapangyarihan sa ilalim ng umiiral na saligtang batas.
Ito ang dahilan kaya’t wala siyang nakikitang mali sa pagsususpinde ni Pangulong Duterte sa pribelehiyo ng Writ of Habeas Corpus sa Mindanao na kasalukuyang nasa ilalim ng batas militar.
Ayon kay Escudero, ginagarantiya ng kasalukuyang konstitusyon ang safeguards sa pagdideklara ng martial law gayundin ang pagsususpinde sa prebilehiyo ng Writ of Habeas Corpus kaya’t malabo aniyang maabuso ito ngayon.
Kasunod nito, ayaw ding bigyang kulay ni Escudero ang naging pahayag ng Pangulo na posibleng isailalim sa batas militar ang buong bansa upang ilayo sa peligro ang sambayanan.
By: Jaymark Dagala
Mariing kinondena ng Amerika ang ginawang pagsalakay ng teroristang grupong Maute sa Marawi City sa Mindanao.
Batay sa ipinalabas na pahayag ng White House, nangako ang Amerika na magpapatuloy ang kanilang ipinadadalang tulong sa Pilipinas para labanan ang terorismo.
Isa sa mga malapit na kaalyado ng Amerika ang Pilipinas kaya’t patuloy na magkakaisa ang dalawang bansa para sama-samang panatilihin ang kapayapaan at bantayan ang seguridad.
Ginawa ng Amerika ang nasabing pahayag sa harap na rin ng panibagong banat ni Pangulong Rodrigo Duterte sa US Government dahil sa pagbatikos nito sa kampaniya kontra droga.
By: Jaymark Dagala
Niyanig din ng Magnitude 4.2 na lindol ang bayan ng Wao sa lalawigan ng Lanao Del Sur mag-aala 1:00 kaninang madaling araw.
Naitala ng PHIVOLCS ang sentro ng pagyanig sa layong sampung kilometro timog silangan ng nasabing bayan.
Tectonic din ang pinagmulan ng nasabing pagyanig at may lalim itong 15 kilometro mula sa episentro.
Dahil dito, naramdaman ang intensity 4 sa Wao, intensity 3 sa Malaybalay at Valencia City sa Bukidnon, intensity 2 ang naramdaman sa Cagayan de Oro, Iligan at Marawi City.
Habang intensity 1 naman sa Cotabato City gayundin sa Midsayap sa North Cotabato.
By: Jaymark Dagala