Nagsagawa ng “maneuvering drill” ang warship ng Amerika malapit sa artificial island ng China sa South China Sea.
Ayon sa mga analysts, matagal nang dumadaan ang US warships sa mga nilikhang isla ng Pilipinas sa South China Sea subalit ito ang kauna-unahang pagkakataon na nagsagawa ito ng operasyon.
Kumbinsido ang mga analysts na ito ay bilang pagkontra ng Amerika sa ginagawang pag-angkin ng China sa pinag-aagawang mga lugar sa South China Sea.
Inamin ng ilang US officials na nagsagawa ng man overboard exercise ang USS Dewey sa may 12 nautical miles ang layo sa artificial island ng China upang ipakita na hindi inosenteng pagdaan lamang doon ang kanilang pakay.
By Len Aguirre
Total blackout na ngayon sa Marawi City at ang buong Lanao del Sur.
Ayon kay Nordiana Ducul, General Manager ng LASURECO o Lanao del Sur Electric cooperative, posibleng naapektuhan ng labanan ang mga linya ng NGCP o National Grid Corporation of the Philippines.
Sa ngayon aniya ay hindi makakilos ang mga tauhan ng NGCP upang ayusin ang mga nasirang pasilidad dahil sa takot na madamay sa labanan sa pagitan ng militar at Maute.
PAKINGGAN: Bahagi ng pahayag ni Nordiana Ducul ng LASURECO
Sinabi ni Ducul na inabandona na rin nila ang kanilang tanggapan sa Marawi City makaraang magtangkang magkanlong doon ang Maute Group.
Ayon kay Ducul, sa kabila ng takot ay napilitan syang makipag-usap sa Maute Group at binigyan naman sila ng limang (5) minuto para lisanin ang LASURECO.
Ilang sandali lamang aniya matapos nilang lisanin ang LASURECO ay sumiklab na ang labanan sa pagitan ng militar at ng Maute Group.
“Paglabas na paglabas ko nakarinig na ako ng putok, sumisigaw na ako ang sabi ko ako yung manager dito tapos hinarap nila ako, pagharap nila sa akin ang sabi nila “Ma’am lumabas ka na dahil anytime darating na ang military at magkabakbakan kami”, ang sabi ko “Huwag niyo kaming idamay, ang sabi nila “Ma’am proteksyon lang po ang ipinunta namin dito”, tapos narinig ko na lang dumaan ang dalawang helicopter kaya na-alarm ako and so I decided to leave, pinaputukan nila yung helicopter na dalawa, syempre natakot na ako dahil baka anytime yung helicopter bombahan nila kami.” Pahayag ni Ducul
Stranded civilians
Samantala, marami pa umanong residente sa Marawi City ang naiipit sa labanan ng militar at Maute Group.
Napag-alaman ito kay Vice Mayor Alden Maruhom ng bayan ng Marantao subalit may bahay sa Marawi City.
Tinukoy ni Maruhom ang mga Barangay Saduc Proper, Paggao Saduc at Lilod Saduc kung saan marami pa aniya ang humihingi ng ayuda para makaalis sa lugar.
Ayon kay Maruhom, mismong ang kanyang pamilya ay dalawang araw ring hindi kumain matapos maipit ng dalawang araw sa labanan.
Nang magkaroon ng pagkakataon, dinala na ni Maruhom sa kapitolyo ang tinatayang isandaan (100) katao sa kanilang barangay na naipit sa labanan kabilang ang kanyang pamilya.
“Tuloy pa po ang bakbakan, marami pong civilian ang naipit, ang nais ko po sana ay humingi ng tulong, tulungan po natin ang mga civilian, isa na po ako doon sa na-trap sa bakbakan, malayo sa amin ang bakbakan, meron pa pong mas malapit sa bakbakan na tumawag sa akin na ang sabi “Vice tulungan niyo po kami, hindi na po namin kaya.” Pahayag ni Maruhom
By Len Aguirre | Ratsada Balita (Interview)
Kumbinsido ang si dating Senador Aquilino ‘Nene’ Pimentel na mayroong basehan ang pagdeklara ng Pangulong Rodrigo Duterte ng Martial Law sa buong Mindanao.
Si Pimentel ay isa sa mga pangunahing lumaban sa Martial Law noong panahon ni Pangulong Ferdinand Marcos.
Ayon kay Pimentel, nangamba marahil ang Pangulong Duterte na kumalat sa iba pang bahagi ng Mindanao ang kaguluhan kung lilimitahan lamang niya sa Marawi City ang Martial Law.
Posible anyang maulit ang kahalintulad ng nangyari sa Bohol na kahit nasa Visayas region ay pinasok ng Abu Sayyaf.
“Ina-anticipate siguro ni President Digong, now ang importante lamang dito ay ang pag-implementa ng Martial Law ngayon ay hindi naman maaaring pareho noong kapanahunan ni Marcos, dahil noong panahon ni Marcos, siya lang ang bahala sa lahat, ngayon sinisiguro sa ating Saligang Batas na ang karapatang pantao ay hindi puwedeng isantabi na lang.” Pahayag ni Pimentel
By Len Aguirre | Balitang Todong Lakas (Interview)
Tiwala si World’s Number 1 Andy Murray na makakabangon ang career sa paglahok sa French Open na magsisimula sa Lunes.
Magugunitang November 2016 nang tanghaling kauna-unahang British player na naging World’s Number 1 si Murray.
Si Murray din ang unang player sa Wimbledon Champion na nagkamit ng grandslam matapos ibulsa ang ATP World Tour Finals, men’s singles sa Olympic Games at Masters 1000 title sa loob lamang ng isang taon.
Tinapos ni Murray ang 2016 sa pamamagitan ng dalawampu’t apat (24) na sunud-sunod na panalo.
Gayunman, minalas si Murray sa pagsisimula ng taong 2017 matapos maagang ma-etsapuwersa sa Indian Wells, Monte Carlo, Barcelona at Madrid.
By Judith Larino
Tinawag na mini-dictator ng CPP o Communist Party of the Philippines si Davao City Mayor Sara Duterte-Carpio matapos na isailalim nito sa hold and secure status ang lungsod ng Davao.
Ayon sa CPP, sinamantala ni Inday Sara ang ipinatupad na Martial Law ng kanyang amang si Pangulong Rodrigo Duterte para magpatupad ng anti-democratic measures tulad ng paglilimita sa kalayaan ng mga Davaoeño.
Tulad aniya ng kanyang ama ay pinaiiwas niya ang kanyang mga kababayan sa mga pagkilos na maaaring humamon sa kanyang awtoridad at kapangyarihan tulad ng pagsasagawa ng kilos protesta.
Una nang nagpatupad ng lockdown ang syudad kasabay ang pagpapatupad ng ilang restriction tulad ng pagpasok at paglabas sa syudad, palagiang pagdadala ng ID, pag iwas sa mga mataong lugar at iba pa.
By Rianne Briones
Arestado ang isang nakatakas na bilanggo ng Marawi City Jail sa Iligan City makaraang mabigo itong magpalit ng kanyang uniporme.
Kinilala ang pugante na si Macmac Aguam Laguindab, 29-anyos at residente ng Marawi City.
Naaresto si Laguindab sa isang checkpoint sa Barangay Suarez makaraang mamataan itong naglalakad sa highway ng Barangay Ditucalan sa Iligan City.
Aminado si Laguindab na naglakad lang siya mula Marawi makaraang palayain sila ng Maute Terrorist Group na kumubkob sa nasabing lungsod noong Martes ng gabi.
Ayon naman kay PO3 Michael Guisando ng Iligan Police Station 2, inaalam pa nila ang iba pang impormasyon kay Laguindab sa kabila ng pag-amin nito na mahigit isang taon na siyang nakakulong sa Marawi City Jail dahil sa kasong carnapping.
By Jaymark Dagala
Mas hinigpitan pa ang seguridad sa NAIA o Ninoy Aquino International Airport matapos ang deklarasyon ng Martial Law sa Mindanao.
Ipinabatid ni NAIA General Manager Ed Monreal na higit pa nilang pinag-ibayo ang koordinasyon ng Airport Police Department at Aviation Security Group gayundin ang iba pang law enforcement group para tutukan ang seguridad sa apat na terminal sa NAIA.
Sa katunayan, sinabi ni Monreal na nakaalerto na kaagad ang mga awtoridad sa pagpasok pa lamang ng mga pasahero sa NAIA at tinitiyak nilang gumagana ang x-ray machines sa bukana pa lamang ng paliparan.
Maliban pa ito aniya sa mga CCTV camera sa paligid, loob at labas ng paliparan para hindi malusutan ng mga masasamang loob.
By Judith Larino
Labing dalawang (12) senador sa Amerika ang umapela kay US President Donald Trump na ipagpaliban ang imbitasyon kay Pangulong Rodrigo Duterte sa pagbisita sa White House.
Sa sulat ng nasabing mga senador mula sa Democratic Party noong Miyerkules, May 24, naniniwala ang mga ito na hindi dapat na ituloy ang imbitasyon kay Pangulong Duterte hanggat hindi ito naninindigan para sa karapatang pantao.
Anila, posibleng magdulot ng maling mensahe ang imbitasyon kay Duterte na tila sinusuportahan ng Amerika ang umiiral na human rights violation sa Pilipinas.
Hinikayat din ng naturang mga mambabatas si Duterte na itigil na ang madugong kampanya nito laban sa gumagamit ng iligal na droga sa halip ay magkaroon ng komprehensibong public health treatment para sa mga adik.
Matatandaang sinabi ni Pangulong Rodrigo Duterte na hindi nya papaunlakan ang imbitasyon sa kanya ng Amerika dahil sa kanyang busy schedule.
US and EU aid
Nananatiling bukas ang Amerika sa pagbibigay ng tulong sa Pilipinas para sa paglaban nito sa terorista.
Kasunod ito ng panibagong pahayag ni Pangulong Rodrigo Duterte na hindi na kukuha ng armas sa amErika dahil sa pagkuwestyon sa estado ng human rights sa bansa.
Ayon kay US Ambassador to Manila Kim Sung, nanatiling ally o kakampi ng Amerika ang Pilipinas kaya’t tuloy ang pag-ayuda nito para palakasin ang anti-terrorism effort ng bansa.
Samantala, handa rin ang European Union na ituloy ang pagbibigay ng grant sa bansa sa kabila ng pagtanggi ng Pilipinas.
Ngunit iginiit ni European External Action Service Managing Director Gunnar Wiegand na hindi magmamakaawa ang EU sa Pilipinas para lamang kunin ang kanilang iniaalok na tulong.
Aniya, marami pang ibang bansang maaaring makinabang sa higit isang bilyong pisong tulong na laan sana sa Pilipinas.
Muli ay iginiit ng EU na hindi lamang sa Pilipinas itinatalaga ang kondisyon sa human rights at rule of law para sa mga ipinamamahaging tulong.
By Rianne Briones
