Isa (1) ang patay habang tatlong (3) iba pa ang sugatan matapos na pagbabarilin ng hindi nakikilalang salarin ang magkakabarkada sa Brgy. Holy Spirit, Quezon City kagabi.
Sa ulat ng QCPD o Quezon City Police District Station 6, dead on the spot ang biktimang si Johares Cordeta 21 taong gulang habang kritikal naman ang kaibigan nitong si Aaron Centeno, 23 anyos na may tama sa batok.
Nasugatan ang kasamahan nilang babaeng si Ella Mae Buenaventura habang nadaplisan naman sa paa ang isa pa kinilala lamang sa tawag na Gerald.
Tinukoy ng mga awtoridad na posibleng paghihiganti ang motibo sa insidente dahil may nakasuntukan pa umano ang mga biktima bago naganap ang pamamaril.
By Rianne Briones | with report from Jopel Pelenio (Patrol 17)
Posibleng desisyunan na ng Commission on Appointments (CA) ang kapalaran ni Environment Secretary Gina Lopez ngayong araw na ito.
Kasunod ito ng muling paggulong ng confirmation hearing ni Lopez sa pagbabalik sesyon ng Kongreso.
Matatandaan na bypass ang appointment ni Lopez matapos ang dalawang hearing at muli itong ni-reappoint ng Pangulong Rodrigo Duterte noong Abril 17.
Sa mga naunang confirmation hearing , dumalo ang iba’t ibang grupo na nanawagan ng pagkontra sa kumpirmasyon ni Lopez dahil sa pagiging incompetent nito para maging Environment Secretary.
Pinakatinutulan sa mga naging desisyon ni Lopez ay ang pagpapasara sa halos tatlumpung (30) minahan at pagkansela sa higit 70 mga mining contracts.
By Rianne Briones
Epektibo na ang bawas-presyo sa produktong petrolyo ngayong araw na ito.
Sa abiso ng mga kumpanyang Petron, Eastern Petroleum, Phoenix, PTT, Sea Oil, Unioil at Shell, nagpatupad na ang 85 centavos na rollback sa kada litro ng gasolina kaninang alas-6:00 ng umaga.
Habang 70 centavos naman ang tapyas presyo sa kada litro ng diesel.
Piso ang ibinaba ng presyo ng kada litro ng kerosene ng kumpanyang Petron, Seaoil at Shell.
Nauna nang magpatupad ng kapehong bawas presyo sa halaga ng kada litro ng kanilang gasolina, diesel at kerosene ang Flying V kaninang hatinggabi.
By Rianne Briones
Iimbestigahan ng Department of Justice o DOJ ang gambling operator na si Charlie “Atong” Ang sa posibleng tax evasion.
Ito ang inihayag ni Justice Secretary Vitaliano Aguirre.
Ayon kay Aguirre, kakausapin niya ang Bureau of Internal Revenue o BIR upang malaman ang tax liabilities ng mga operasyon ni Ang at mga kumpanya nito.
Sinabi rin ng kalihim na aalamin din nila ang posibleng koneksyon ni Ang sa mga nasa likod ng destabilization plot laban sa administrasyon.
Una nang inakusahan ni Ang sina Secretary Aguirre at National Security Adviser Hermogenes Esperon Jr. na nagbabalak na magpapatay sa kanya.
By Meann Tanbio
Niyanig ng magnitude 6.2 na lindol ang remote border area sa pagitan ng Canada at southeastern Alaska.
Ayon sa US Geological Survey (USGS), naitala ang epicenter ng lindol sa teritoryo ng Canada na matatagpuan sa layong 83 kilometro, hilagang kanluran ng Skagway, Alaska at may lalim na 2.2 kilometro.
Agad itong nasundan ng mga aftershocks na may lakas na 5.2 magnitude.
Wala namang naitalang nasugatan o namatay sa insidente at wala ring nasirang ari-arian.
By Meann Tanbio
Dalawang (2) hinihinalang miyembro ng NPA o New People’s Army ang napatay ng mga sundalo sa engkwentro sa Barangay Hilumot sa San Jose de Buan, Samar Sabado ng madaling araw.
Ayon sa 8th Infantry Division ng Philippine Army, inatake ng hindi mabilang na mga rebelde ang kampo ng mga sundalo sa nasabing lugar na ikinasugat ng limang (5) sundalo.
Narekober ang isang AK-47 rifle, mga handheld radio, at iba pang gamit.
Dahil sa pag-atake ng mga rebelde, inalerto na ang iba pang mga kampo at istasyon ng pulisya.
By Meann Tanbio
Bukas si Pangulong Rodrigo Duterte na magkaroon ng joint military exercise ang China at Pilipinas sa Sulu Sea.
Inihayag ito ng Pangulo sa kanyang pagbisita sa Chinese People’s Liberation Army Navy Flagship Destroyer Chang Chun sa Sasa Port, Davao City.
Bukod sa China, pabor din ang Pangulo na magkaroon ng joint military exercise ang Pilipinas sa Russia.
Sa kasalukuyan, tuloy ang Balikatan exercise sa pagitan ng Pilipinas at Amerika.
By Meann Tanbio
Walang pagsidlan ang kaligayahan ng dating sexy actress na si Michelle Madrigal matapos na kumpirmahin nito ang kanyang pagbubuntis.
Sa Instagram makikita ang ultrasound ni Michelle kung saan tinukoy na higit tatlong (3) buwan na itong buntis.
Ibinahagi rin ng actress ang kanyang nararanasang pagkahilo at morning sickness nitong mga nakalipas na buwan.
Sa kabila ng kanyang nararanasang hirap sa pagbubuntis ay excited na siya at ang kanyang partner na si dating football player Troy Woolfolk sa pagdating ng kanilang baby.
Matatandaang nag lie-low sa showbiz si Madrigal at noong 2016 ay lumipad ito papuntang US para mag-aral ng culinary.
Sumikat si Michelle matapos sumali sa Star Circle Quest noong 2004, at matapos ang kontrata sa Kapamilya network ay lumabas din ito sa ilang programa sa GMA-7.
By Rianne Briones
Photos: Screengrab from mitch_madrigal / Instagram
