June 2026

Excited na si US President Donald Trump na makita at makausap si Pangulong Rodrigo Duterte.

Ayon kay Trump, mahalaga sa kanya ang Pilipinas dahil sa ito aniya ay strategic na kaalyado ng estados Unidos.

Bilib din si Trump sa matinding kampanya ng Pangulong Duterte kontra ilegal na droga.

Matatandaang noong Sabado ay inimbitahan ni Trump si Pangulong Duterte sa White House.

Sa Nobyembre naman ay nakatakdang bumisita sa bansa si Trump para naman sa 31st ASEAN Summit.

By Ralph Obina

Inamin ng Department of Agriculture (DA) ang umiiiral na kakapusan ng suplay ng karne ng baboy sa bansa.

Ayon kay Agriculture Secretary Manny Piñol, dahil sa kakulangan ng suplay kaya’t umabot na sa P240.00 ang kada kilo ng karne ng baboy sa pamilihan.

Ipinaliwanag ni Piñol na hindi lamang sa Pilipinas nararanasan ang kakulangan ng suplay ng baboy kundi isa itong worldwide phenomenon.

Kabilang anya sa mga dahilan ng mataas na presyo ng karne ng baboy ang pagtigil ng mga backyard raising dahil sa matumal na bentahan noong nakaraang taon.

Naka-apekto rin umano ang malakihang pag-angkat ng karne ng baboy ng China at ang pagkalat ng porcine epidemic diarrhea na naka-apekto sa produksyon.

Tiniyak ni Piñol na kumikilos na sila upang solusyonan ang problema at isa lamang ang pag-angkat sa kanilang mga naiisip na paraan.

By Len Aguirre

Nangutang si Vice President Leni Robredo para mabuo ang P8-M na ibinayad niya  sa Presidential Electoral Tribunal o PET para sa kanyang counter protest sa election case ni dating Senador Bongbong Marcos.

Ayon sa legal adviser ni Robredo na si Atty. Barry Gutierrez, bahagi ng  P8-M ay mula sa personal na pondo ng Bise Presidente habang ang iba ay hiniram nito sa mga kamag-anak ng kanyang yumaong asawang si Jesse Robredo na sina Vicente Hao Chin, Pablito Chua at Rafael Bundoc.

Ayon kay Gutierrez, handa ang Bise Presidente na magkabaun-baon sa utang mapigil lang ang tangkang pag-agaw sa pwesto nito.

Sa ilalim ng Code of Conduct for Public Officials ipinagbabawal sa sinumang opisyal ng gobyerno na tumanggap o manghingi ng anumang salapi mula sa kahit na sino habang ito’y nanunungkulan.

P8-M ni Robredo bahagi lamang ng mahigit sa P81-M na dapat nilang bayaran ni Marcos

Naglagak na ng P8-M cash deposit si Vice President Leni Robredo para sa kanyang kontra protesta laban sa election protest sa kanya ni dating Senador Bongbong Marcos.

Ang inilagak na pera ni Robredo sa PET ay bahagi lamang ng mahigit sa P81-M na dapat nilang bayaran ni Marcos para sa magkahiwalay nilang protesta.

Mahigit P66-M dito ang gagamitin para makuha ang mga materyales na gagamitin para sa protesta ni Marcos at mahigit P5-M para sa mga election materials sa petisyon naman ni Robredo.

Una nang humirit si Robredo sa Korte Suprema na i-delay ang pagbabayad subalit ibinasura ito ng hukuman.

By Len Aguirre |With Report from Jonathan Andal / Bert Mozo

Sasampahan na ng impeachment complaint sa Mababang Kapulungan ng Kongreso si Vice President Leni Robredo.

Ayon kay Atty. Tom Berenguer, isa sa mga maghahain ng reklamo, betrayal of public trust, graft and corruption at paglabag sa Saligang Batas ang gagamitin nilang batayan sa pagsasampa ng kasong impeachment.

Ito ay matapos umanong siraan ng Pangalawang Pangulo ang kampanya ng gobyerno kontra iligal na droga sa pamamagitan ng video message na ipinadala nito sa United Nations o UN.

Sa naturang video din ay isiniwalat ni Robredo ang ukol sa ‘palit-ulo’ scheme at ang warrantless arrests na ginagawa ng mga pulis.

PAKINGGAN: Bahagi ng pahayag ni Atty. Tom Berenguer

By  Ralph Obina | Karambola (Interview)    

Nakapagbayad na ngayong araw si Vice President Leni Robredo ng walong (8) milyong piso sa Korte Suprema para sa kanyang counter protest sa natalong si dating Senador Bongbong Marcos.

Sinamahan si Robredo ng kanyang mga supporter sa pangunguna ng ‘The Silent Majority’ at ng abogado nitong si Atty. Romulo Macalintal sa opisina ng Presidential Electoral Tribunal o PET.

Sa ipinalabas na press statement ng Office of the Vice President, tinukoy na ang perang ibinayad ni Robredo ay galing sa personal na pondo ng Pangalawang Pangulo at ang natitirang pera ay  inutang mula sa mga kamag-anak ng yumao nitong asawang si dating DILG Secretary Jesse Robredo na sina Vicente Hao Chin, Pablito Chua at Rafael Bundoc.

Idinagdag din na wala mang ganoong kalaking pera ang Bise kagaya ng mga Marcos ay handa siyang magkabaun-baon sa utang mapigil lamang aniya ang pagtatangkang pagnakaw sa puwesto na ibinigay sa kanya ng taumbayan.

Binigyang diin din ng kampo ni Robredo na sa maikling panahon nito sa pulitika ay nananatiling malinis ang pangalan ni VP Leni sa anumang katiwalian, korapsyon at pagnanakaw kasabay ng tanong sa huli na: “Masasabi rin ba ito ng aming mga katunggali?”

By  Aiza Rendon 

Photo: OVP

Hihintayin muna ng Buklurang Manggagawang Pilipino ang nilalaman ng lalagdaang EO o Executive Order ng Pangulong Rodrigo Duterte para wakasan ang kontraktwalisasyon bago magbunyi.

Sinabi ni Leody de Guzman, lider ng grupo, ito ay dahil baka matulad lamang sa department order na inilabas ni Labor Secretary Silvestre Bello ang naturang kautusan na hindi naman kinatatakutan ng mga employer.

Bagamat nagsumite na ng draft EO, nakahanda parin aniya silang magbigay ng panibagong kopya nito.

PAKINGGAN: Bahagi ng pahayag ni Mr. Leody de Guzman ng Buklurang Manggagawang Pilipino

Bukas din, aniya, silang isantabi muna ang kahilingan nilang madagdagan ang sahod ng mga manggagawa, kapalit ng pagtatanggal ng kontraktwalisasyon.

“Gusto namin yung makuha dahil mataas nag presyo ng bilihin ngayon, presyo ng serbisyo, pamasahe, ang rent tumaas na rin, puwede naman differed muna basta tiyakin lamang na ang contractualization ay magkaroon ng total prohibition.” Pahayag ni De Guzman

By Katrina Valle | Ratsada Balita (Interview)

Photo Credit: KMK

Malaking bilang pa rin ng mga Pinoy ang nananatiling walang tiwala sa China at Russia.

Ito ay sa kabila ng patuloy na pakikipagmabutihan ng Pangulong Rodrigo Duterte sa naturang mga bansa.

Batay sa pinakahuling survey ng Pulse Asia, lumalabas na 63 percent ng mga Pinoy ang hindi nagtitiwala sa China habang 56 percent naman sa Russia.

Pinakapinagkakatiwalaang bansa pa rin ng mga Pinoy ay ang Estados Unidos na nasa 79 percent, Japan na may 75 percent, Australia na may 69 percent at United Kingdom na nakakuha naman ng 53 percent na tiwala ng mga Pinoy.

Samantala, kabilang naman sa mga pinagkakatiwalaang international groups ng mga Pinoy ay ang United Nations na may 82 percent at Southeast Asian Nations o ASEAN na may 81 percent.

Ang naturang survey ay isinagawa noong March 15 hanggang 20 sa may isanlibo dalawandaang (1,200) respondents sa kasagsagan ng isyu ukol sa presensya ng Chinese survey vessel sa Benham Rise.

By   Ralph Obina