June 2026

Aagaw ng atensyon sa buong mundo ang Pilipinas dahil sa APEC Summit na gaganapin sa Metro Manila simula sa November 13.

Binigyang diin ito ni Cabinet Secretary Rene Almendras bilang pagkontra sa mga nagsasabi na hindi produktibo ang pagsasagawa ng APEC Summit sa bansa dahil isang linggong naka-bakasyon ang mga manggagawa at negosyante.

Ayon kay Almendras, ang pagdating pa lamang sa bansa ng may 8,000-10,000 delegasyon ng APEC Summit ay may impact na agad sa ekonomiya ng bansa.

Idagdag pa aniya ang atensyong makukuha ng bansa mula sa libong miyembro ng international press na magco-cover sa kaganapan.

“Gagastos po dito yan gagamit ng mga facilities natin, that’s one immediate economic impact, the other is yung attention na makukuha ng bansa, yung lahat po ng economic business media sa buong mundo nandito po sa Pilipinas during that conference dahil ang pinag-uusapan po sa APEC ay ang mga ekonomiya po and APEC ay isa sa pinakamalaking grupo.” Ani Almendras.

Kasabay nito, dinepensahan ni Almendras ang desisyon nila na sa Metro Manila isagawa ang APEC Summit.

Ayon kay Almendras, malaki na ang ipinagiba ng APEC summit ngayon lalo na sa bilang ng delegasyon kumpara sa APEC summit noong unang isagawa ito sa Subic noong 1996.

“Kulang po sa hotel rooms, kulang sa sasakyan kulang sa facilities ang ibang lugar, sa katunayan po sa ibang bansa nagtayo sila ng bagong syudad just to host the APEC, pero napakalaking gastos nun at ayaw po ni President Aquino na bakit tayo gagastos ng napakalaking halaga kung kaya naman natin na hindi tayo gagastos ng malaki.” Pahayag ni Almendras.

By  Len Aguirre | Ratsada Balita

Umatras na sa kanyang kandidatura sa pagka-Pangulo si Manuel Antonio Roxas, kapangalan ni Liberal Party (LP) standard bearer Mar Roxas.

Ayon kay Manuel Antonio Roxas, ayaw naman talaga niyang tumakbong pangulo ng bansa at nais lamang niyang mapansin siya ng dating DILG Secretary.

Nilinaw naman ni Manuel Antonio Roxas na wala siyang intensyong lituhin ang mga botante sa pagiging magkapangalan nila ni Mar Roxas.

Una rito, ipinadedeklara ni Mar Roxas na nuisance candidate sa COMELEC ang kanyang kapangalan tumakbong Pangulo sa 2016 elections.

By  Ralph Obina  

Inabisuhan ng Department of Foreign Affairs o DFA ang publiko na walang consular services gaya ng passport, authentication o red ribboning, consular civil registration at iba pang kaugnay ng transaksyon sa kanilang tanggapan sa DFA Aseana at sa lahat ng kanilang field o satellite offices sa buong National Capital Region mula ika-17 hanggang ika-20 ng Nobyembre.

Ito ay kaugnay ng idaraos na APEC Summit sa susunod na linggo.

Gayunman, maaari namang magtungo sa kanilang mga piling satellite office sa Metro Alabang, Ali Mall, Robinsons Galleria at SM Megamall sakaling may emergency consular needs ang ating mga kababayan.

Gaya na lamang ng pagkamatay ng kaanak na overseas, agarang medical procedures na kailangang gawin overseas at ang urgent na contractual obligations overseas.

Samantala magbabalik naman ang normal na operasyon ng DFA sa ika-21 ng Nobyembre, araw ng Sabado.

By  Ralph Obina | Allan Francisco  

Ni-raid ng mga tauhan ng Las Piñas City Police ang isang hinihinalang drug den sa Mapayapa Village sa naturang lungsod.

Naaresto sa lugar ang dalawang tao na hinihinalang mga miyembro ng Laudit Drug Group.

Narekober sa mga suspek ang ilang sachet ng shabu habang inaalam pa ng mga otoridad ang kabuuang halaga ng mga nasamsam na iligal na droga.

By  Ralph Obina  

Umani ng iba’t ibang reaksyon mula sa mga Filipino na nasa ibang bansa at maging sa international media ang isyu nang laglag-bala sa paliparan ng bansa.

Maraming mga Filipino na nasa abroad maging ang mga dayuhan ang nagparating ng kanilang pagkadismaya nang mapanood nila sa mga foreign news channel na ipinapalabas ang nangyaring modus sa NAIA.

Isa sa halimbawa ang naging komento ni Fox News Anchor Greta Van Susteren na may kaibigan daw siya na nabiktima dahil sa nasabing tanim-bala incident.

Sa bansang Japan naman, isang news channel doon ang nag-demonstrate pa kung paano inilagay ng isang airport personnel ang bala sa bag habang ang isang personnel na nakakuha ng bag ay agad pinakita sa biktima pero ito ay umaaktong tila may hinihinging pera.

By: Mariboy Ysibido