June 2026

Isang 14-wheeler truck ang sumalpok sa pader ng Presidential Security Group (PSG) Compound sa Nagtahan Bridge sa Maynila.

Sugatan ang driver ng truck na kinilalang si Lexter Garung na nagtamo ng sugat at galos sa kaniyang paa at binti.

Ayon sa pahinante, nawalan umano ng preno ang truck na pagmamay-ari ng Federico So Builders and Development Incorporated.

Sa halip na may madamay, minabuti ng tsuper na ibangga na lamang sa pader ang kaniyang minamaneho.

Ligtas naman ang 2 pahinante ng truck habang nagdulot naman ng masikip na daloy ng trapiko ang insidente.

By  Jaymark Dagala

Nilinaw ng pamunuan ng Ninoy Aquino International Airport o NAIA na mananatiling bukas sa mga motorista ang lahat ng kalsadang nakapaligid sa paliparan.

Kasunod ito ng pangamba ng maraming motorista sa kasagsagan ng Asia Pacific Economic Cooperation o APEC summit sa ikatlong linggo ng buwang ito.

Una nang inilabas ng Metro Manila Development Authority o MMDA ang listahan ng mga isasarang kalsada sa ilang bahagi ng Metro Manila mula Nobyembre 16 hanggang Nobyembre 20.

Ngunit nakasentro lamang anila ito sa mga lugar na pagdarausan mismo ng pagpupulong tulad ng Roxas Blvd. gayundin sa ilang bahagi ng EDSA.

By  Jaymark Dagala  

Nagmistulang anino ng USS Lassen, ang guided destroyer ng Estados Unidos ang isang warship ng China sa buong panahon ng pagpapatrolya nito sa South China Sea.

Ayon kay Commander Robert Francis, Commanding Officer ng USS Lassen, paulit-ulit silang tinatanong ng kanilang mga aninong Chinese kung ano ang ginagawa nila sa bahagi ng karagatang inaangkin ng China.

Isa lamang aniya ang sagot ng USS Lassen crew, na naaayon sa international law ang kanilang ginagawang malayang paglalayag sa South China Sea.

Sinabi ni Francis na hindi bababa sa 50 ang bilang ng kanilang interactions sa Chinese warship na nakasunod sa kanila.

Subalit nagkaroon aniya ng isang pagkakataon na ang palitan ng salita ay tungkol sa kung ano ang gagawin nila ng weekend at nagkaroon rin ng palitan ng kwento tungkol sa kani-kanilang mga pamilya.

Nang makalampas ang patrolya ng USS Lassen sa mga pekeng isla na ginawa ng China, unti-unti na ring kumawala sa kanila ang kanilang anino na Chinese destroyer.

By  Len Aguirre

Pauwi na ng bansa ang 10 Pinay na nailigtas sa Kurdistan region sa Iraq.

Ayon kay Philippine Charge D’Affaires Elmer Cato, magkatulong ang Philippine Embassy at Kurdistan Regional Government ng Iraq sa pag-rescue sa mga Pinay.

Ang sampung Pinay ay nagtratrabaho sa isang spa sa Erbil na pag-aari ng isang Lebanese national.

Labing dalawang (12) oras umano kada araw ang kanilang trabaho at tatlong oras lamang sa loob ng isang linggo ang kanilang off.

Maliban dito, 300 dolyar lamang umano ang kanilang natatanggap mula sa 500 dolyar na pangakong suweldo ng spa.

Nakatali rin sa debt bondage ang mga Pinay kung saan pinagbabayad sila ng 10,000 dolyar kung gusto na nilang umuwi kahit hindi pa tapos ang kanilang kontrata.

By  Len Aguirre