June 2026

Anim (6) na opisyal ng Commission on Audit o COA ang pinakakasuhan at pinasisibak ng Office of the Ombudsman dahil sa pagtanggap ng sobra-sobrang kompensasyon mula sa LWUA o Local Water Utilities Administration kung saan sila nakatalaga.

Lumabas sa imbestigasyon ng Ombudsman na nilagdaan ng mga LWUA Executives and Letters of Instructions para sa pagpapalabas ng P25 milyong pisong bonus para sa COA officials mula 2006 hanggang 2010.

Inihalimbawa ng Ombudsman ang kaso ng machine operator ng COA na nakatalaga sa LWUA na nakatanggap ng P140,000 at isa pang P43,000 bonus noong November 2006.

Natuklasan rin ng Ombudsman na dalawang beses nakatanggap ng bonus ang mga COA officials noong Nobyembre, September at December 2007, September at December ng 2008 at March 2010.

Ang mga sinibak ng Ombudsman ay kinilalang sina State Auditors Juanito Daguno, Jr., Proceso Saavedra, Teresita Tam, Corazon Cabotage, Evangeline Sison at Vilma Tiongson, kasama sina data machine operators Violeta Gamil at Roberto Villa.

Ang mga nabanggit ay hindi na puwedeng mamasukan sa pamahalaan at tinanggalan na rin sila ng retirement benefits.

Maliban sa 6 na nabanggit, pinakakasuhan ng paglabag sa Anti Graft and Practices Act sina COA executives Edna Anical, Thelma Baldovino, Evelyn de Leon, Nestorio Ferrera, Zoharayda Obog, Ligaya Principio, Jesusa Punsalan at Paulino Sarmiento.

Samantala, ipinag-utos ni Ombudsman Conchita Carpio Morales ang 6 na buwang suspension without pay laban sa LWUA executives na sina Lorenzo Jamora, Wilfredo Feleo, Orlando Hondrade at Daniel Landingin dahil sa simple misconduct.

By  Len Aguirre

Ikinahihiya ng grupo ng mga Overseas Filipino workers o OFW sa bansang israel ang lumalalang kaso ng tanim-laglag bala sa Ninoy Aquino International Airport o NAIA.

Ayon sa Federation of Filipino Community sa Israel, labis nilang ikinadidismaya ang mga pangyayari ngayon sa NAIA lalo’t dito dumaraan ang lahat ng mga turista sa bansa.

Nangangamba rin ang grupo na mangyari rin sa kanila ang mga kahalintulad na insidente partikular sa kaso ni Ginang Gloria Ortinez.

Kasunod nito, nanawagan ang grupo sa pamahalaan na gawin ang lahat ng hakbang upang papanagutin sa batas ang mga nasa likod ng nasabing modus operandi.

By: Jaymark Dagala I Allan Francisco

Hihigpitan ng Philippine Navy ang kanilang pagpapatrulya sa Manila bay sa kasagsagan ng Asia Pacific Economic Summit summit

Ayon kay Navy Spokesman Col. Edgardo Arevalo, kanilang ipakakalat ang mga seaborne patrol na kinabibilangan ng mga navy personnel at marines.

Layon nitong matiyak ang seguridad ng mga delagado sa apec lalo’t malapit lamang ang Manila Bay sa mga pagdarausan ng mga pagpupulong

Nakapaligid din sa manila bay maging ang mga hotel aniya na pansamantalang tutuluyan ng mga delegado sa pagpupulong kaya’t nararapat lamang na higpitan ang seguridad ng mga ito

Una rito, inihayag ng Navy na ipatutupad ang no sail zone sa manila bay sa panahon ng APEC summit sa ikatlong linggo ng Nobyembre.

By: Jaymark Dagala I Jonathan Andal

Tataas ang singil sa kuryente ng Manila Electric Company (MERALCO) ngayong buwan .

Ayon sa MERALCO, ito ay bunsod ng mataas na generation charge.

Dahil dito, madadagdagan ng P26 ang madadagdag sa electric bill ng mga kumokonsumo ng 200 kilowatt per hour.

Una rito, nagmahal ng P1.19 kada kilowatt hour ang ipinataw singil ng Wholesale Electricity Spot Market dahil sa pagbagsak ng ilang planta ng kuryente noong nakaraang buwan.

By  Ralph Obina  

Nagbigay ng libreng sakay sa Pasig River Ferry ang Metropolitan Manila Development Authority (MMDA) ngayong araw.

Ito ay paraan ng MMDA para magpasalamat sa publiko ngayong ipinagdiriwang ng ahensya ang ika-40 anibersaryo nito.

Nagsimula ang libreng sakay kaninang alas -8:00 ng umaga na tatagal hanggang alas-5:00 ng hapon sa 11 istasyon ng ferry service.

Kabilang sa mga ito ang Pinagbuhatan at San Joaquin sa lungsod ng Pasig, Guadalupe at Valenzuela sa Makati, Hulo sa Mandaluyong, PUP Sta. Mesa, Sta. Ana, Lambingan, Lawton, Escolta at Plaza Mexico sa Maynila.

By  Ralph Obina | Allan Francisco  

Handang harapin ni Senador Lito Lapid ang kasong graft na isinampa laban sa kaniya ng Ombudsman sa Sandiganbayan.

Ayon sa senador, kaniya itong tinitingnan bilang isang oportunidad upang patunayang inosente siya sa mga bintang na ibinabato laban sa kaniya.

Nakalulungkot lamang ani Lapid ang timing ng Ombudsman dahil tumagal ng 12 taon o halos papatapos na ang kaniyang termino nang i-akat ng Ombudsman sa Sandiganbayan ang kaso.

Nag-ugat ang kaso laban kay Lapid makaraang masangkot ito sa kontrobersyal na fertilizer fund scam na nangyari sa panahon ng administrasyong Arroyo.

By: Jaymark Dagala I Cely Ortega-Bueno (patrol 19)

Nasa Pilipinas ngayon ang isa sa mga submarines ng US Navy para sa 4 na araw na port visit.

Kasalukuyang nasa Subic Bay ang Los Angeles – class fast attack submarine na USS Key West na dumating kamakalawa.

Batay sa impormasyon mula sa US embassy, bahagi ang routine port visit na ito ng deployment ng nasabing submarino sa Kanlurang pasipiko.

Lulan ang 150 marino, unang tumigil ang USS Key West sa bahagi ng Subic matapos ang isang buwan nitong paglalayag

Idinesensyo ang USS Keywest para sa anti-submarine at anti-surface ship operations gayundin, may kakayahan din ito para sa anti- reconnaissance at intellegence surveillance.

By: Jaymark Dagala I Jonathan  Andal

Palaban na ang Malakaniyang sa mga binibitawang pahayag ni Sen. Bongbong Marcos.

Kasunod ito ng pahayag ng senador na posibleng magamit sa kampaniya ng administrasyon ang mga hindi nagamit na pondong nakalaan para sa mga sinalanta ng super bagyong yolanda na nagkakahalaga ng bilyun-bilyong piso

Ayon kay Presidential Spokesman Edwin Lacierda, iba na ang panahon ngayong 2015 kung saan, hindi isang Marcos ang nakaupong pangulo at lalong hindi kilusang bagong lipunan o KBL ang ruling party.

Giit ni Lacierda, posibleng ganito ang nakamulatan ng senador kaya’t naitanim sa isip nito ang paraan kung paano ginagastos ang pondo sa panahong iyon

Binigyang diin pa ni Lacierda, hindi na panahon ng martial law ngayon dahil ang isinusulong ay ang daang matuwid na hindi na aniya kayang sundan pa ng senador.

By: Jaymark Dagala I Aileen Taliping (patrol 23)

Target ngayon ng Bureau of Customs o BOC na magbawas ng kanilang mga tauhan sa kalagitnaan ng susunod na taon.

Bahagi ito ng kampaniya ng pamahalaan upang supilin ang talamak na korapsyon sa nasabing ahensya.

Ayon kay Customs Commissioner Alberto Lina, sobra-sobra na aniya ang dami ng kanilang mga tauhan kaya’t napapanahon na upang i-akma ito.

Sa kasalukuyan, mayroong 4,400 tauhan ang BOC gayung ang tamang bilang lamang dapat ay nasa 2,200.

Kasabay nito, inihayag din ni Lina na balak din nilang taasan ang suweldo ng kanilang mga kawani sa ilalim ng panukalang Customs Modernization and Tariff Act.

By Jaymark Dagala