June 2026

Iminungkahi ni Senador Ralph Recto na magbukas ang gobyerno ng Yolanda Facebook kung saan dito ipo-post ang mga larawan ng mga proyektong pinaglaanan ng naturang pondo.

Iginiit ni Recto na mas mabilis na mauunawaan ng publiko kung may makikitang larawan ng bilang ng mga naipatayong bahay, ni-repair na mga silid-aralan at naipagkaloob na livelihood program, kesa maglabas ng report na puro numero lamang ang makikita.

Lalagyan na lamang aniya ng caption ang mga litrato hinggil sa lokasyon at bilang ng mga naipatayong istraktura.

Binigyang-diin ni Recto na halos lahat ng ating mga kababayan ay mayroong Facebook account at magsisilbing documentary proof kung ipo-post sa Facebook ang mga litrato ng mga proyektong pinaglaanan ng halos P100 bilyong piso para sa mga biktima ng Yolanda.

By  Meann Tanbio | Cely Bueno (Patrol 19) 

Arestado ang isang Taiwanese national matapos mahulihan ng mga baril at bala sa Mactan-Cebu International Airport Authority o MCIAA.

Sa inisyal na imbestigasyon, lumabas sa x-ray image ang isang kaduda-dudang imahe na itim sa loob ng suitcase na pag-aari ng dayuhang si Chao Ching Hungs nang dumaan na ito sa x-ray screening.

Agad na tinawag ang atensyon ng suspek at kasama ang mga police personnel ng MCIAA ay binuksan ang bag ng dayuhan.

Tumambad sa mga airport officials ang isang KG-9 submachine pistol with silencer, tatlong magazine, 9mm caliber pistol at 100 round live bullet ng 9mm na binalot ng makapal na kumot na tinawag na heavy led blanket upang hindi ma-detect sa x-ray detection ang mga armas nito.

Hindi nila binuksan ang bag ng suspek na wala ang presensya nito upang masiguro nila na walang nangyayaring “laglag bala” sa nasabing paliparan.

Nasa kustodiya na ng Lapu-Lapu City Jail ang nasabing dayuhan.

By  Meann Tanbio 

Isinuko ng aktor na si Robin Padilla ang apat na high-powered firearms sa Philippine National Police (PNP) bilang pagsunod sa Republic Act 10591 Comprehensive Firearms and Ammunition Act na nagbabawal sa pag-aari ng mga hindi lisensyadong armas.

Nagtungo si Padilla sa tanggapin ng PNP Firearms and Explosives Office dahil nakatakda nang mag-expire ang lisensya ng kanyang mga baril sa Disyembre.

Ayon sa aktor, ipatatago muna niya sa PNP ang kanyang dalawang M-16 armalite rifle, isang garand rifle at isang 30-caliber machine gun habang pinoproseso pa ang kanyang license to own and possess firearms.

Nilinaw ni Padilla isa lamang siyang gun collector at hindi niya kailanman nagamit o gagamitin ang mga armas niya sa masama.

Ginamit aniya niya ang mga isinurender niyang armas sa mga pelikulang kanyang ginawa.

Pamamalakad sa NBP

Samantala, tinawag na istupido ng aktor na si Robin Padilla ang sistema ng pamamalakad sa New Bilibid Prison o NBP sa Muntinlupa.

Ito ang reaksyon ng aktor sa harap na rin ng kontrobersya na bumabalot ngayon sa NBP.

Sinabi ni Padilla na kung tutuusin, nalinis na ang NBP sa panahon ni retired Police General Vicente Vinarao.

Pero dahil aniya sa istupidong pamamalakad, kahit magaling at maganda pa ang pangangasiwa ng isang opisyal sa NBP ay inaalis din ito kapag nagpalit na ng presidente.

Kaya ang nakikitang solusyon ni Padilla sa sindikato sa loob ng Bilibid, dapat isama at bigyan ng responsibilidad ang mga pangkat o ang mga gang leaders para mapatino ang mga miyembro nito, sa halip na ang maghari- harian ay ang mga drug lords at ibang high profile criminals.

By  Meann Tanbio | Jonathan Andal

Nai-raffle na sa Sandiganbayan ang kasong graft laban kay Senador Lito Lapid dahil sa umano’y kaugnayan nito sa P728-million fertilizer fund scam.

Ang graft case ay napunta kay Associate Justice Efren dela Cruz ng Sandiganbayan First Division.

Bukod kay Lapid, nahaharap din ang 5 pang kapwa nito akusado dahil sa paglabag sa Sections 3-E at 3-G ng Republic Act Number 3019 o mas kilala bilang “Anti-Graft and Corrupt Practices Act”.

Sinasabing nagkaroon umano ng sabwatan ang mga akusado noong Mayo 2004 kaugnay ng pagbili ng overpriced na fertilizer noong gobernador pa ng Pampanga si Lapid.

By   Meann Tanbio