June 2026

Patay ang 3 hinihinalang miyembro ng Abu Sayyaf habang 3 sundalo ang sugatan sa bakbakan sa Tuburan, Basilan.

Ayon kay Col. Rolando Bautista, hepe ng Joint Task Group Basilan, target ng operasyon sa barangay Campo Dos sa Lamitan City ang lider ng grupo na si Abdul Hassan Tanadjalun alias “Bullet.”

Sa isinagawang pursuit operations, naka-engkwentro naman ng militar ang 15 bandido sa Lower Sinangkapan sa bayan ng Tuburan.

Matapos ang bakbakan ay narekober ng mga sundalo ang 3 bangkay na kinabibilangan ni Tanadjalun.

Ayon kay Bautista, ang grupo ni Tanadjalun ay sangkot sa kidnapping at extortion sa naturang lugar.

By Jelbert Perdez  

Idedeklara umanong constitutional ng Korte Suprema ang kontrobersiyal na Enhanced Defense Cooperation Agreement o EDCA sa pagitan ng Pilipinas at Estados Unidos.

Sa ulat ng Manila Times, sinasabing pinaiikot na sa 14 na mga mahistrado ang 82-pahinang draft decision na sinulat ni Chief Justice Maria Lourdes Sereno.

Batay sa draft decision ni Sereno, hindi labag sa Salitang Batas ang EDCA dahil may kapangyarihan si Pangulong Aquino na lumagda ng kasunduan na may kaugnayan sa ugnayang panlabas at pambansang seguridad.

Sinasabing tatalakayin na ng mataas na hukuman ang desisyon ni Sereno bukas, November 10.

Kung wala umanong sasalungat dito, posibleng pagbotohan na ng mga mahistrado ang hatol o kaya’y i-reset ito sa November 16 na bisperas ng APEC Summit.

By Jelbert Perdez  

Ikinadismaya ng mga health advocate ang umano’y kabiguan ng Department of Health o DOH na ipatupad ang paglalagay ng graphic health warnings sa mga pakete ng sigarilyo.

Sa ilalim ng Republic Act 10643 o ang Graphic Health Warnings Law, ngayong Nobyembre ang implementasyon ng batas kung saan dapat ilagay sa bawat pakete ng yosi ang mga imahe ng masasamang epekto ng paninigarilyo.

Ayon kay Atty. Karla Rocas-Dejelo ng Health Justice Philippines, hindi dapat naaantala ang pagpapatupad nito lalo’t mahigit 200 Pinoy ang namamatay kada araw dahil sa yosi.

Next year

Samantala, binigyang diin ng Department of Health o DOH na sa susunod na taon pa ang implementasyon ng Republic Act 10643 o ang Graphic Health Warnings law.

Ayon kay DOH External Affairs and Regulations Chair Alex Padilla, tinatapos pa lamang ng ahensya ang draft ng implementing rules and regulations o IRR para sa naturang batas.

Giit ni Padilla, hindi na dapat magre-release ang mga kompanya ng sigarilyo ng pakete ng yosi na walang graphic warning labels simula sa March 2016.

Ipatutupad na rin aniya ang mahigpit na pagbabawal sa pagbebenta ng walang warning labels sa Nobyembre ng susunod na taon.

Ang Pilipinas ay isa sa apat na bansa sa ASEAN Region na walang graphic warnings sa mga pakete ng yosi.

By Jelbert Perdez  

Aminado si Social Welfare Secretary Dinky Soliman na ang pagpapatayo ng mga permanenteng pabahay para sa mga survivor ng pananalasa ng bagyong Yolanda ang isa sa pinakamalaking hamon na kinakaharap ng gobyerno.

Ayon kay Soliman, mayroong 92,554 units ang pinondohan at nasa 52,000 pa lamang ang nasa iba’t ibang completion stages habang tinaya sa 3,400 pa lamang ang natapos.

Base sa Comprehensive Rehabilitation and Recovery Plan, kabuuang 205,128 families sa lahat ng rehiyong naapektuhan ang target para sa permanent resettlement.

Sa kabila nito, inihayag ni Soliman na planong tapusin ang lahat ng permanent resettlement units sa katapusan ng taong 2016 habang ang kalahati ng lahat ng kabuuang bilang ng mga apektadong pamilya ay kailangan pang maghintay sa magiging aksyon ng susunod na adminstrasyon.

Samantala, ipinaliwanag ng kalihim na sadyang may katagalan ang pagpapatayo ng mga pabahay lalo’t maraming pamilya ang naapektuhan kaya’t naiintindihan nila ang mga hinaing ng mga survivor.

By  Drew Nacino

Hinihingi ng pamunuan ng Manila International Airport Authority o MIAA ang tulong ng kanilang mga empleyado upang matukoy at makasuhan ang mga pasimuno sa tanim bala scam sa paliparan.

Tiniyak ni MIAA General Manager Jose Angel Honrado, sa memorandum na inilabas nito na gumagawa na sila ng kaukulang mga hakbang upang matukoy ang puno’t-dulo ng naturang kontrobersya.

Hiniling din ni Honrado na ireport agad sa kinauukulan ang mga gumagawa ng hindi maganda upang malinis ang hanay ng mga inosenteng manggagawa sa Ninoy Aquino International Airport.

Nanawagan din si Honrado sa mga empleyado ng paliparan na manatiling kalmado sa kabila ng mga insulto at pagpuna na kanilang tinatanggap mula sa publiko.

Dapat din aniyang manatili ang dignidad sa hanay ng mga manggagawa ng paliparan habang ginagampanan ang kanilang tungkulin.

By: Mariboy Ysibido

Nanawagan ang pamunuan ng Metropolitan Manila Development Authority (MMDA) sa mga opisyales ng mga barangay na tumulong sa ginagawang paglilinis sa lahat ng uri ng obstruksyon sa mga tinukoy na “mabuhay lanes” o alternatibong ruta ngayong lumalapit ang kapaskuhan.

Sinabi ni MMDA Chairman Emerson Carlos, na kulang pa rin ang tulong mula sa mga barangay officials sa ginagawa nilang clearing operations katuwang ang pnp-highway patrol group.

Minsan umano ay may mga opisyal at tanod na sumusulpot ngunit kadalasan ay wala.

Iginiit nito na may memorandum circular na inilabas ang Department of Interior and Local Government (DILG) kamakailan na inaatasan ang lahat ng pinuno ng mga “Local Government Units (LGUS)” kabilang ang mga alkalde at mga barangay chairman na manguna sa paglilinis ng mga obstruksyon sa Mabuhay lanes.

By: Mariboy Ysibido

Nagsampa ng P3.5 mil­yong damage suit ang isang negosyante laban kay dating Laguna Congressman Edgar “Egay” San Luis dahil sa pag­kabigo nitong bayaran ang pinaimprentang mga tarpaulin na ginamit sa pagtakbo nitong gobernador sa lokal na halalan sa Laguna noong 2013.

Ayon kay Marynie C. Balota, may-ari ng Signeffex Art Design ng Sta. Cruz, Laguna, nagpaimprenta sa kanila si San Luis ng mga tarpaulin at iba pang campaign paraphernalia noong panahon ng kampanya para sa naturang halalan.

Nakasaad sa kaso na sa humigit sa P4 Million kontrata ang inabot ng pagpapagawa ng tarpaulin, may natira pang P800,000 pagkakautang si San Luis na 3 taon ng hindi niya binabayaran kahit na makailang ulit na siyang sinisingil ng Signeffex.

Ang kaso ay isinampa sa Regional Trial Court sa sta. Cruz noong Oktubre 28, 2015. Ang Signeffex at may-aring si Mrs. Balota ay kinakatawan ni Atty. Carlo Gregorio.

By: Mariboy Ysibido

Ipinasara umano ng Makati City Hall ang opisina ni Makati City Congresswoman Mar-Len Abigail Binay campos para ipagamit sa acting Vice Mayor ng lunsod.

Ito ang ibinunyag ni Rep. Binay. Ipinaalam umano sa kanya noong nakaraang linggo na ipapagamit sa Acting Vice Mayor ang kanyang tanggapan habang ang kanyang mga tauhan ay ipinababalik sa mga mother unit ng mga ito.

Sinabi ni Binay na nakalimutan   na ng mga taga city hall ang diwa ng serbisyo publiko ay hindi ang partido o pangalan kundi ang paglilingkod sa mga taga-Makati.

Gayunman, sinabi ni Rep. Binay na ipagpapatuloy niya ang paglilingkod sa mga mamamayan ng makati na tulad ng kanilang ginagawa sa nagdaang 9 na taon kasabay ng pagdidiin na siya at ang kanyang pamilya ay hindi mapaghiganti.

By: Mariboy Ysibido