Environmental factor, hindi technical error.
Ito, ayon sa Armed Forces of the Philippines (AFP) ang dahilan ng pagsadsad ng UH-1 helicopter ng Philippine Air Force (PAF) sa Malapatan, Sarangani Sabado ng umaga.
Nangyari ang aksidente habang nagsasagawa ng casualty evacuation mission nang humampas ang malakas na hangin na nagtulak sa piloto na i-crash land ang naturang helicopter.
Dahil sa insidente, siyam ang nasugatan kasama ang 2 piloto.
By Meann Tanbio
Walang basehan.
Ito ang sagot ni Senadora Grace Poe kaya’t ayaw niyang sumailalim sila sa DNA testing ni Senador Bongbong Marcos.
Sa kabila ito ng pagiging bukas ni Marcos na sumalang sa naturang pagsusuri upang malaman kung sila nga ay tunay na magkadugo.
Sa panayam ng DWIZ, binigyang diin ni Poe na batid naman nilang tsismis lang ang balitang umano’y pagiging magkapatid nila ni Marcos at ayaw niyang madamay sa gulo ang personal na buhay ng mga Marcos at maging ng mga pinsang niyang si Sheryl Cruz.
“Ayokong sabihin kung saka-sakaling maging desperado pero para sa akin kung meron mang ibang lead eh yun na muna at hindi naman madedetermina ng DNA ang iyong intensyon para sa bayan, ang iyong pagkatao at isa pa, kung isusulong ko lang ang DNA, yung mga ibang batang foundlings din ay magiging parang hindi rin mareresolba ang kanilang sitwasyon sa ating bayan, kaya nga po ito’y hindi lang laban natin, hindi po ito pagkatao ng isang kandidato yung DNA.” Pahayag ni Poe.
By Ralph Obina | Karambola
Nagbabadya na namang tumaas ang presyo ng langis ngayong linggo.
Ayon sa ulat , posibleng umakyat sa P0.75 ang presyo ng kada litro ng diesel habang P0.10 naman ang inaasahang umento sa gasolina.
Kung sakali, ito na ang ikalawang oil price hike na ipatutupad ng mga kumpanya ng langis ngayong buwan ng Nobyembre.
By Ralph Obina
Asahan ang maulap na kalangitan na may kasamaang katamtamang pag-ulan at isolated thunderstorm sa bahagi ng Quezon, Palawan, Bicol Region, Soccsksargen, Zamboanga Peninsula at Davao Region.
Ayon sa Philippine Atmospheric Geophysical and Astronomical Services Administration (PAGASA) ito ay epekto ng umiiral na easterlies o hanging nagmumula sa silangan.
Samantala ang nalalabing bahagi naman ng bansa ay makakaranas ng maulap hanggang sa maulap na may kasamang isolated thunderstorm.
By Ralph Obina
Laglag sa kamay ng Sta. Ana Police ang most wanted na lalake sa Maynila.
Kinilala ang suspek na si Frederick Zamora, 29-anyos.
Si Zamora ay may existing na dalawang warrant of arrest dahil sa mga kaso ng robbery, theft, snatching at illegal drugs.
Batay sa CCTV footage ng Barangay 774, pumasok ng barangay hall si Zamora bitbit ang improvised na baril para tangkaing patayin ang kapitan ng naturang barangay dahil sa personal na galit.
Napigilan naman si Zamora sa kanyang maitim na balak at kasalukuyang nakakulong na at hinaharap ang kanyang mga kaso.
By Ralph Obina
Nagpapatuloy ang search and rescue operations sa isang binatilyo na nalunod sa Abra river.
Kuwento ng ina ng biktima, nagpaalam ang kanyang anak na si Mark Jemery Torralba na makikipagkita sa kanyang kaklase para sa gagawing school project.
Aniya, nabalitaan na lamang niya na nalunod ito sa ilog noong Sabado ng tanghali.
Nagpunta umano si Torralba sa tabing ilog kasama ang kanyang apat na kaibigan.
Pero, mag-isang lumangoy ang biktima sa Abra river hanggang sa tangayin ng malakas na current ng tubig.
By Meann Tanbio
Sa #SiyasatExpress, ang mga ‘social media sites’ at ang gamit nito.
Listen To Siyasat Express Part 1
Listen To Siyasat Express Part 2
Aabisuhan ng Philippine Overseas Employment Administration o POEA ang mga foreign employer ng mga OFW na nabiktima o mabibiktima ng umano’y tanim o laglag bala modus sa Ninoy Aquino International Airport (NAIA).
Ayon sa POEA, layon nitong mabigyan ng sapat at resonableng panahon ang pinagbibintangang OFW na linisin ang kaniyang pangalan sa mga otoridad dito sa Pilipinas bago umalis.
Kasabay nito, muling binalaan ng ahensya ang Pinoy migrant workers na huwag magdala ng mga live ammunition o mga baril, bala, gun powder, cartridge case at primer alinsunod sa isinasaad ng Republic Act Number 10591.
Bukod dito, pinayuhan din ng POEA ang mga OFW na siguruhing naka-lock ng maayos ang kanilang mga bagahe at maging vigilant at mapagmasid sa kanilang mga gamit.
By Allan Francisco
Nanganganib kapusin sa inuming tubig ang Legazpi City, Albay.
Isinisi ng Legazpi City Water District o LCWD ang nagbabadyang water shortage sa provider nitong Philippine Hydro Incorporated dahil sa kabiguang maglatag ng mga hakbang upang maabot ang water requirements para sa libu-libong residente.
Ayon kay LCWD Spokesman Richard Atun, ang Philhydro ay nagbabayad ng 8.1 million pesos kada buwan para sa 20,000 cubic meters ng tubig kada araw o 600,000 cubic meter kada buwan.
Gayunman, mas mataas anya sana ang water supply kung tinupad lamang ng Philhydro ang kasunduang naglalayong dagdagan kada taon ng 1,000 cubic meter per day ang supply.
Ang kakulangan ng tinatayang 7,000 cubic meters ng tubig kada araw ay naging resulta upang maapektuhan ang nasa 4,000 consumer lalo sa mga mataas na lugar gaya ng mga Barangay Old Albay District.
Ang Philhdryo ay pinangangasiwaan ng Maynilad at nag-seserbisyo sa tinatayang 21,000 household sa 70 barangay sa lungsod.
By Drew Nacino
Nanawagan na si Senador Chiz Escudero sa pagbibitiw ni Transportation Secretary Joseph Emilio Abaya.
Ito’y sa gitna ng mga kontrobersyang kinakaharap ng Ninoy Aquino International Airport (NAIA) bunsod ng tanim-bala modus.
Ayon kay Escudero, malinaw na palpak ang pinuno ng Department of Transportation and Communications mula sa kalupaan hanggang sa himpapawid.
“Huwag nang hintayin pang magbitiw, bitiwan na ni Pangulong Aquino ang pinuno ng DOTC, dahil parang walang nagawang tama, isa-isahin natin, transportation and communications, unahin natin ang transportation, by air, by sea, by land and by rail. By air, airport ang pinakapangit sa buong mundo, ma-traffic ang airport at ngayon may tanim bala pa, by sea, import congestion na hanggang ngayon nandiyan pa at lalala pa yan pagpasok ng Pasko, by land, traffic sa Metro Manila gayundin sa iba’t-ibang syudad sa buong Pilipinas, by rail, hindi naman na siguro dapat pahabain pa kung gaano kapalpak ang MRT sa ngayon.” Ani Escudero.
Kahit anya sa komunikasyon ay palpak si Abaya na magpatupad ng mga reporma o pagbabago.
“Pagdating naman sa lisensya ganun din walang plaka, walang sticker, walang ID card, pag-usapan naman natin ang communication, napakasama na din ng serbisyo ng telco ngayong sa ating bansa at pangalawa tayo sa pinakamabagal na internet speed sa buong Asya, ano ang nagawa sa loob ng 5 taon diyan sa DOTC?, kaya parang lahat ay sumasabog at pumuputok.” Pahayag ni Escudero.
By Drew Nacino | Cely Bueno (Patrol 19)