June 2026

Nanawagan si Manila Archbishop Luis Antonio Cardinal Tagle na itigil na ang pagpatay sa mga katutubong Lumad.

Inihayag ito ng Kardinal kasabay ng kaniyang pagbisita sa mga katutubo na nagkakampo sa Liwasang Bonifacio sa Lungsod ng Maynila.

Kinumusta ng arzobispo ang kalagayan ng mga Lumad na naglakbay pa mula Surigao City patungong Maynila para lamang manawagan ng katarungan sa mga pinaslang nilang katribu.

Kasunod nito, umapela rin si Tagle sa publiko na tulungan ang mga katutubo sa pamamagitan ng pagbibigay ng pagkain, tubig at gamut.

Hangad din ni Tagle na mapanagot ang mga taong nasa likod ng mga pagpatay sa mga Lumad.

Bilang ganti, binigyan ng mga Lumad ng tubaw o katutubong sumbrero ang kardinal bilang pasasalamat.

By Jaymark Dagala  

Magkaiba ang mga programang ipinatutupad sa mga sinalanta ng super bagyong Yolanda sa Tacloban sa mga palaboy sa Metro Manila.

Ito ang sagot ng Malakaniyang sa puna ni Senador Francis Escudero kung bakit mas nabibigyan ng agarang tulong pinansyal ang mga palaboy at informal settlers sa Metro Manila kaysa tulungan pabilisin ang rehabilitasyon sa mga sinalanta ng bagyo sa Leyte.

Ayon kay Presidential Communications Secretary Herminio Coloma, dapat lawakan ng senador ang kaniyang isipan sa usapin.

Binigyang diin ni Coloma na bahagi ng pambansang programa ang Expanded Conditional Cash Transfer program para sa mga street dwellers na bahagi ng kampaniya ng gobyerno para sugpuin ang kahirapan.

Hiwalay aniya ito para sa resettlement at permanent housing para sa mga sinalanta ng super bagyo.

By  Jaymark Dagala | Aileen Taliping (Patrol 23)  

Sa Pasay City piniling ipagdiwang ni Vice President Jejomar Binay ang kaniyang ika-73 kaarawan.

Nagsimula ang kaniyang aktibidad sa isang misa sa Sta. Clara de Montefalco Parish saka tumungo sa mga residente ng Barangay 60 sa bahagi ng Tramo.

Doon nagkaroon ng isang boddlefight kasama ang iba pang opisyal at residente ng mga Barangay 60, 61 at 62.

Kasamang nakipag-boodle fight ni Binay ang kaniyang running mate na si Senador Gringo Honasan gayundin ang senatoriable at batikang brodkaster na si Rey Langit.

By Jaymark Dagala | Aya Yupangco (Patrol 5)  

Umapela ng pasensya at pang-unawa si PNP Chief Dir. Gen. Ricardo Marquez sa publiko.

Kaugnay ito sa ipatutupad nilang mahigpit na seguridad para sa 20 heads of state sa panahon ng APEC Summit.

Sinabi ni Marquez, may mga protocol silang sinusunod lalo na sa pagbibigay seguridad kaya’t makapagdudulot ito ng malaking abala sa publiko partikular sa Metro Manila.

Tinukoy ni Marquez ang mga sinasabing abala tulad ng plastic barriers na nakalatag sa outermost lane ng north at southbound ng EDSA mula Shaw Blvd. hanggang Taft Avenue.

Giit pa ni Marquez, minsan lamang sa loob ng 20 taon magho-host ang Pilipinas sa nasabing okasyon kaya’t dapat ipakita ng lahat ang kanilang pakikiisa.

By Jaymark Dagala | Jonathan Andal  

Nagbanta ang malaking grupo ng mga exporters, truckers, licensed brokers na magsagawa ng truck caravan bilang protesta sa mabagal na pagpapalabas ng mga container trucks sa pier.

Tinukoy ni Neri Zapata, Pangulo ng Aduana Business Club ang kasunduan sa pagpapatupad ng terminal appointment booking system at online cargo release system para maging maayos ang pagpapalabas ng mga trucks.

Binatikos ni Zapata ang hindi pagtalima ng Asian Terminal Inc. sa nilagdaan nilang MOA upang mapabilis ang pagpapalabas ng mga container trucks at hindi abutan ng total truck ban sa panahon ng APEC Summit.

Target sana ng grupo na mailabas sa pier ang may 5,000 container vans upang maiwasan na naman ang port congestion.

By Len Aguirre | Aya Yupangco (Patrol 5) 

Duda si Senador Sergio Osmeña kung maaaprubahan pa ng senado ang maraming mahahalagang panukalang batas tulad ng BBL o Bangsamoro Basic Law bago matapos ang termino ng Pangulong Benigno Aquino III.

Sa susunod na linggo ay isang araw lamang ang pasok ng senado dahil sa APEC Summit at nakatakda na rin silang mag-recess para sa panahon ng Kapaskuhan.

Sinabi ni Osmeña na 3 linggo na lamang ang matitira sa kanilang sesyon pagbalik nila sa Enero bago ang campaign period para sa 2016 elections kung saan kalahati ng mga senador ang tumatakbo.

Ayon kay Osmeña, malabo na silang makapagpasa ng batas sa sandaling mangampanya ang mga reelectionist senators dahil majority ang kailangan para mag-apruba ng panukalang batas.

Maliban sa BBL, posible aniyang kapos na rin sa oras para ibalik pa sa committee level ang Mamasapano report tulad ng kahilingan ni Senador Juan Ponce Enrile.

By  Len Aguirre | Cely Bueno (Patrol 19) 

Desidido si Senador Antonio Trillanes na itulak ang plano niyang one stop shop government center sa Pilipinas.

Ayon kay Trillanes, maaaring mag-develop ang pamahalaan ng isang modernong syudad kung saan ililipat ang mga government offices at mabawasan ang siksikan sa Metro Manila.

Maaari anyang lumikha ng modernong government district na puwedeng ipagmalaki sa buong mundo sa Clark o kaya ay sa Fort Magsaysay sa Laur Nueva Ecija na lupain ay pag-aari ng pamahalaan.

“Paplanuhin natin ang isang modern city na maganda yung mga daan, transport system, drainage system, maganda yung zoning, parang one stop shop siya, nandun na yung Kongreso, Senado yung mga iba’t ibang departments so kung may kailangan ka sa gobyerno, nandun na lahat.” Paliwanag ni Trillanes.

By Len Aguirre | Ratsada Balita 

Walang plano ang Department of Foreign Affairs na ipaharang ang mga kilos protesta sa panahon ng APEC Summit sa susunod na linggo.

Ayon kay Assistant Secretary Charles Jose, Spokesman ng DFA, malaya ang sinuman na ipahayag ang kanilang saloobin laban sa APEC Summit.

Gayunman, umapela si Jose sa mga magsasagawa ng pagkilos na maging mahinahon at iwasang magresulta sa karahasan ang kanilang aktibidad.

“Hindi po natin mapipigilan ang mga kababayan natin na magsagawa ng ganyang klaseng pagkilos dahil right po nila yun, freedom of expression, so iginagalang po natin yan ang pakiusap lang po natin sana huwag maka-disrupt sa proceedings ng APEC o hindi mag-result in injury, or death or damage to properties.” Pahayag ni Jose.

By  Len Aguirre | Ratsada Balita